រាជធានីភ្នំពេញ ៖ ដើម្បីពង្រឹងគុណភាពផលិតផលទេសចរណ៍ក្នុងឱកាសបុណ្យចូលឆ្នាំថ្មី ប្រពៃណីជាតិខាងមុខនេះ ក្រសួងទេសចរណ៍ បានចេញសារាចរណែនាំដល់មន្ទីរទេសចរណ៍រាជធានី-ខេត្ត អនុវត្តនូវការងារមួយចំនួនសម្រាប់បម្រើ និងទទួលភ្ញៀវទេសចរជាតិ និងអន្តរជាតិ ។
យោងតាមសារាចរនោះ ក្រសួងបានណែនាំដល់មន្ទីរទេសចរណ៍រាជធានី-ខេត្ត ត្រូវសហការជាមួយអាជ្ញាធរដែនដី និងសមត្ថកិច្ចគ្រប់លំដាប់ថ្នាក់ ដើម្បីធានាសន្តិសុខ សុវត្ថិភាព សណ្តាប់ធ្នាប់ចរាចរណ៍ ទីចំណត ជូនភ្ញៀវទេសចរឲ្យបានល្អប្រសើរ ។ ត្រូវសហការជាមួយមន្ទីរវប្បធម៌ និងវិចិត្រសិល្បៈ មន្ទីរអប់រំ យុវជន និងកីឡា បំផុសចលនាឲ្យមានការរៀបចំព្រឹត្តិការណ៍សង្ក្រាន្តនៅតាមគោលដៅទេសចរណ៍សំខាន់ៗ ព្រមជាមួយការប្រឡងចម្រៀងបុរាណ កំណាព្យ អាយ៉ៃ ចាប៉ី ដោយសង្កត់ធ្ងន់លើខ្លឹមសារស្តីពីសក្តានុពល និងសកម្មភាពទេសចរណ៍ដែលមានក្នុងមូលដ្ឋាន និងត្រូវរៀបចំឲ្យមានការលេងល្បែងប្រជាប្រិយទៅតាមប្រពៃណីជាតិខ្មែរ ដូចជា បោះអង្គុញ ចោលឈូង ទាញព្រ័ត្រ លាក់កន្សែង ស្តេចចង់ ។ និងត្រូវជួយសម្រួលឲ្យមានការសម្តែងរបាំត្រុដិនៅតាមមូលដ្ឋានអាជីវកម្មទេសចរណ៍ ដូចជា សណ្ឋាគារ ផ្ទះសំណាក់ ភោជនីយដ្ឋាន កន្លែងកម្សាន្ត និងមូលដ្ឋានអាជីវកម្មផ្សេងៗ ។
ទន្ទឹមនឹងនោះ ត្រូវសហការជាមួយមន្ទីរបរិស្ថាន មន្ទីរសុខាភិបាល និងផ្នែកពាក់ព័ន្ធនានា ដើម្បីធ្វើការណែនាំម្ចាស់មូលដ្ឋានអាជីវកម្ម សេវាកម្មទេសចរណ៍ ពិសេសភោជនីយដ្ឋាន អាហារដ្ឋានប្រជាពលរដ្ឋ និងភ្ញៀវទេសចរឲ្យចូលរួមថែរក្សាអនាម័យ ដោយលុបបំបាត់ការបោះសំរាម និងកាកសំណល់ផ្សេងៗនៅក្រៅធុង ជាពិសេសជំរុញយុទ្ធនាការ «ភោជនីយដ្ឋានគ្មាន សំរាមក្រោមតុ» និងត្រូវចាត់វិធានការតាមគ្រប់រូបភាព ដើម្បីធានាឲ្យបានអនាម័យល្អនៅក្នុង ភោជនីយដ្ឋាន រួមទាំងបន្ទប់ទឹក បង្គន់អនាម័យ ហើយបុគ្គលិកបម្រើការងារត្រូវមានឯកសណ្ឋានឲ្យបានល្អ ។
ក្រសួងក៏បានណែនាំឲ្យគ្រប់មន្ទីរទេសចរណ៍រាជធានី-ខេត្ត ត្រូវខិតខំសហការជាមួយផ្នែកពាក់ព័ន្ធ ធ្វើការអប់រំអ្នកលក់ដូរម្ហូបអាហារភេសជ្ជៈតាមដងផ្លូវ ( Street Food ) ឲ្យថែរក្សា អនាម័យឲ្យបានត្រឹមត្រូវ និងផ្តល់បដិសណ្ឋារកិច្ចល្អចំពោះភ្ញៀវទេសចរ ។ ចំពោះខេត្តតំបន់ឆ្នេរសមុទ្រទាំងបួន មន្ទីរទេសចរណ៍ត្រូវសហការជាមួយអាជ្ញាធរដែនដីចាត់តាំងឲ្យមានអ្នក ប្រចាំការនៅតាមបណ្តោយឆ្នេរ និងមានអ្នកសម្អាតបរិស្ថាន អនាម័យជាប្រចាំ ។
ទន្ទឹមនឹងនោះ ត្រូវសហការជាមួយប្រតិបត្តិករទេសចរណ៍ក្នុងការពង្រឹងគុណភាពផលិត ផលទេសចរណ៍ និងចូលរួមទប់ស្កាត់ការជួញដូរ ការប្រើប្រាស់គ្រឿងញៀន និងការធ្វើ អាជីវកម្មជួញដូរផ្លូវភេទលើកុមារ ទប់ស្កាត់រាល់សកម្មភាពក្មេងទំនើង និងត្រូវអនុវត្តច្បាប់ និងការណែនាំរបស់រដ្ឋ លើកកម្ពស់គុណភាពសេវាកម្ម និងអនាម័យម្ហូបអាហារ ព្រមទាំងរក្សាតម្លៃផលិតផល និងសេវាកម្មឲ្យបានសមរម្យ។ រាល់ថ្លៃស្នាក់នៅ ម្ហូបអាហារ ត្រូវសរសេរឲ្យច្បាស់លាស់ក្នុងតារាង ដើម្បីជម្រាបជូនភ្ញៀវឲ្យបានដឹងជាមុន ជៀសវាងការកំណត់ថ្លៃខ្ពស់ហួសហេតុ ។ ករណីដែលមិនអនុវត្តតាមតារាងដែលបានបិទផ្សាយ ម្ចាស់មូលដ្ឋាន ឬសេវាកម្មទេសចរណ៍ត្រូវទទួលខុសត្រូវចំពោះមុខច្បាប់ជាធរមាន ។
ដើម្បីបង្កើនប្រសិទ្ធភាពការងារ មន្ទីរនីមួយៗ ត្រូវសហការជាមួយសាលារាជធានី-ខេត្ត និងប្រព័ន្ធផ្សព្វផ្សាយដូចជា សារព័ត៌មាន វិទ្យុ និងទូរទស្សន៍ ដើម្បីផ្សព្វផ្សាយស្បតទេសចរណ៍ ដែលបានអប់រំ និងចូលរួមជំរុញចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ» ។ ដោយឡែក មន្ទីរទេសចរណ៍ខេត្តសៀមរាប ត្រូវខិតខំសហការជាមួយសហភាពសហព័ន្ធយុវជនកម្ពុជា ដើម្បីចូលរួមរៀបចំព្រឹត្តិការណ៍អង្គរសង្ក្រាន្តឲ្យបានជោគជ័យល្អប្រសើរ ។
តាមសារាចរណែនាំខាងលើ ក្រសួងក៏បានក្រើនរម្លឹកដល់មន្ទីរទេសចរណ៍ត្រូវសហការជាមួយមន្ទីរធម្មការ និងសាសនា រៀបចំវត្តទេសចរណ៍គំរូសម្រាប់ភ្ញៀវទេសចរអន្តរជាតិអាចឈ្វេងយល់អំពីប្រវត្តិ និងទំនៀមទម្លាប់នៃការរៀបចំពិធីបុណ្យចូលឆ្នាំខ្មែរប្រពៃណីជាតិ ត្រូវសហការគ្នាចុះតាមគោលដៅទេសចរណ៍សំខាន់ៗ ដើម្បីអប់រំផ្សព្វផ្សាយបញ្ជ្រាបការយល់ដឹងជាសាធារណៈដល់ភ្ញៀវទេសចរ និងប្រជាពលរដ្ឋ។ ត្រូវបន្តសហការជាមួយអាជ្ញាធររាជធានី-ខេត្ត រៀបចំព្រឹត្តិការណ៍ទេសចរណ៍វប្បធម៌ និងកីឡា នៅតាមមូលដ្ឋានឲ្យបានល្អប្រសើរ ៕
ចែករំលែកព័តមាននេះ