ខេត្តកណ្ដាល ៖ សាកសពបុរសម្នាក់ដែលមានសភាពឡើងស្អុយរលេះរលួយទៅហើយ ត្រូវបានគេប្រទះឃើញបង្កការភ្ញាក់ផ្អើលកាលពីវេលាម៉ោង១១និង៤៥នាទីព្រឹក ថ្ងៃទី០១ ខែមេសា ឆ្នាំ២០១៨ នៅត្រង់ចំណុចក្បែរអង់តែនទូរស័ព្ទ ស្ថិតក្នុងភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្ដាល ។
ក្រោយទទួលបានព័ត៌មាន កម្លាំងនគរបាលនៃការិយាល័យបច្ចេកទេសវិទ្យាសាស្ត្រខេត្ត-ស្រុក សហការជាមួយនគរបាលប៉ុស្តិ៍ ក្រុមប្រឹក្សាឃុំ-ភូមិ និងគ្រូពេទ្យឃុំចុះទៅបង្កើតគណៈកម្មាការចម្រុះពិនិត្យ និងធ្វើកោសល្យវិច្ច័យសពយ៉ាងយកចិត្តទុកដាក់បំផុត ។ បន្ទាប់ពិនិត្យរួច សមត្ថកិច្ចបានឲ្យដឹងថា សាកសពមានសភាពរលេះរលួយសាច់ទៅហើយ ពុំមានអ្នកស្គាល់អត្តសញ្ញាណទេ ភេទប្រុស អាយុប្រហែលចន្លោះពី៤០ឆ្នាំទៅ៥០ឆ្នាំ ស្លៀកខោខោវប៊ូយជើងវែង ក្រណាត់យឺតពណ៌ខៀវ ខ្សែក្រវាត់ព៌ណខ្មៅក្បាលដែករូបផ្កាយ (ទាហាន) អត់មានពាក់អាវ ស្លៀកខោលីអូពណ៌ខ្មៅ សក់ស្លូត មានស្នាមចាក់សាក់លើកំភួនដៃរូបផ្កាកូលាប នៅក្នុងហោប៉ៅខោខាងស្តាំមាននាទ្បិកា១គ្រឿងពណ៌ស និងលុយចំនួន១៦,០០០រៀល ។
សមត្ថកិច្ចបញ្ជាក់បន្ថែមថា នៅលើដងខ្លួនសាកសពមានស្នាមកាប់ដាច់រយះក្បាលផ្នែកខាងក្រោយ២កន្លែង ដល់ខាងមុខរហូតដល់មុខលើចុងចិញ្ចើមខាងឆ្វេង ដាច់ពីលើជើងសក់ផ្នែកខាងក្រោយកាត់ទទឹងដល់ស្លឹកត្រចៀកខាងឆ្វេងមកដល់លើចិញ្ចើមខាងស្តាំ មានស្នាមបាក់ឆ្អឹងកំភួនដៃខាងឆ្វេងជាពីរកំណាត់ដាច់ចេញពីគ្នា និងបាក់ភ្លៅខាងឆ្វេងលើក្បាលជង្គង់ ។
តាមការសន្និដ្ឋានរបស់សមត្ថកិច្ចជំនាញថា ករណីនេះគឺជាករណីឃាតកម្ម ។ សពត្រូវបានកប់នៅវត្តឧទុម្ពរក្នុងភូមិ-ឃុំខាងលើ ហើយបើបងប្អូនប្រជាពលរដ្ឋណាមានបាត់ខ្លួនសមាជិកគ្រួសារដូចភិនភាគបានរៀបរាប់ខាងលើ សូមមកទំនាក់ទំនងជាមួយសមត្ថកិច្ចស្រុកល្វាឯម គាស់យកសាកសពទៅធ្វើបុណ្យតាមប្រពៃណី និងដាក់ពាក្យបណ្តឹងដើម្បីឲ្យកម្លាំងសមត្ថកិច្ចធ្វើការស្រាវជ្រាវតាមស្វែងរកចាប់ខ្លួនជនដៃដល់យកមកផ្តន្ទាទោសតាមផ្លូវច្បាប់ ៕
ចែករំលែកព័តមាននេះ