ខេត្តក្រចេះ ៖ អាជ្ញាធរស្រុកព្រែកប្រសព្វបានអះអាងថា ក្រុមមន្ត្រីកំពុងតែបន្តការរុករក គ្រឿងចក្ររបស់ក្រុមជនល្មើសដែលលួចធ្វើសកម្មភាព ឈូសឆាយ ដើម្បីរំលោភយកដីធ្វើកម្មសិទ្ធ ខុសច្បាប់ ខណៈមានដីព្រៃជាច្រើនហិកតា នៅតាមតំបន់មួយចំនួន ក្នុងស្រុកសំបូរ និងស្រុកព្រែកប្រសព្វ ក្បែរព្រំប្រទល់ព្រៃឡង់ កំពុងរងការឈូសឆាយយ៉ាងរង្គាល ។
នាយផ្នែករដ្ឋបាលព្រៃឈើព្រែកប្រសព្វលោក ប៊ួយ រតនា បានបញ្ជាក់ប្រាប់ថា គ្រឿងចក្រមួយគ្រឿង ត្រូវបានក្រុមមន្ត្រីចម្រុះ ចាប់បង្ក្រាបនៅពេលកំពុងឈូសឆាយដីព្រៃមួយ កន្លែង នៅខាងក្រោយឃុំជ្រោយបន្ទាយ ស្រុកព្រែកប្រសព្វ កាលពីថ្ងៃទី៣០ មីនា ឆ្នាំ២០១៨ ។ ហើយ ក្រោយពីការចាប់ឃាត់នាំមករក្សាទុកអាជ្ញាធរ និងស្រាវជ្រាវម្ចាស់ ដើម្បីមានវិធានការតាមផ្លូវច្បាប់ ជុំវិញករណីការទន្ទ្រានដីព្រៃខុសច្បាប់ ។
សេចក្តីរាយការណ៍ពីពលរដ្ឋនៅស្រុកព្រែកប្រសព្វបានឲ្យដឹងថា ដីព្រៃនៅតំបន់ជាប់ព្រៃឡង់សព្វថ្ងៃ កំពុងរង់ការកាប់បំផ្លាញឥតឈប់ឈរ ។ មានដីព្រៃរាប់ពាន់ហិកតាត្រូវបានកាប់បំផ្លាញទន្ទ្រានយកដី និងច្រើនពាន់ហិកតាទៀត ត្រូវបានកាប់អារយកឈើដែលពួកអ្នកមានប្រាក់មានអំណាចទើបហ៊ានប្រព្រឹត្ត ។ ជុំវិញការលើកឡើងនេះ ក្រុមអាជ្ញាធរបានបញ្ជាក់តបថា អាជ្ញាធរមានភាពស្មុគស្មាញលើការគ្រប់គ្រងដីព្រៃនៅតំបន់នោះ ដោយសារមានខ្លះត្រូវបានវាស់វែង និងខ្លះមិនទាន់វាស់វែង និងខ្លះជាដីព្រៃ តែត្រូវក្រុមជនទុច្ចរិត ចូលទៅកាប់ឆ្ការ ដើម្បីរំលោភយក ។
ពលរដ្ឋមានការសោកស្តាយ និងព្រួយបារម្ភពីវិនាសកម្មព្រៃតំបន់នោះ នាពេលដ៏ខ្លីខាងមុខនេះ ប្រសិនបើអាជ្ញាធរ មិនវិធានទប់ស្កាត់សកម្មភាពឲ្យបានខ្លាំងក្លារនៅឡើយទេនោះ ។ ពលរដ្ឋថា សព្វថ្ងៃពួកគាត់ ទទួលបានប្រយោជន៍ពីព្រៃនៅតំបន់នោះជាច្រើន តាមរបរជាលក្ខណៈគ្រួសារ ម្យ៉ាងទៀតព្រៃតំបន់នោះ មានតំបន់ខ្លះជាព្រៃអភិរក្សតែត្រូវរងការរំលោភបំពានពីឈ្មួញដី និងឈ្មួញឈើ ៕
ចែករំលែកព័តមាននេះ