ខេត្តប៉ៃលិន ៖ យុវជនម្នាក់បើកបរម៉ូតូក្នុងល្បឿនលឿន ដោយទិសដៅពីជើងទៅត្បូងលុះដល់ត្រង់កន្លែងផ្លូវកោង ស្រាប់តែបួងចង្កូតមិនទាន់ក៏ជ្រុលធ្លាក់ទៅក្នុងប្រឡាយអត់ទឹកដួលទាំងម៉ូតូ និងម្ចាស់ជាច្រើនត្រឡប់ បណ្តាលឱ្យរងរបួសធ្ងន់តែម្តង ។ ក្រោយពេលកើតហេតុគេទូរស័ព្ទហៅរថយន្តសង្គ្រោះរបស់មន្ទីរពេទ្យខេត្តដឹកយកទៅសង្គ្រោះនៅមន្ទីរពេទ្យបង្អែកខេត្ត ។ ហេតុការណ៍នេះបានកើតឡើងកាលពីវេលាម៉ោង៥និង០០នាទីល្ងាច ថ្ងៃទី៣០ ខែមីនា ឆ្នាំ២០១៨ ស្ថិតនៅចំណុចភូមិកូនភ្នំ ឃុំអូរអណ្ដូង ស្រុកសាលាក្រៅ ។
ប្រភពព័ត៌មានបានឱ្យដឹងថា ជនរងគ្រោះមានឈ្មោះ ឈាន សុផានិត ភេទប្រុស អាយុ១៨ឆ្នាំ មានទីលំនៅភូមិរោងចក្រ សង្កាត់បរយ៉ាខា ក្រុងប៉ៃលិន ខេត្តប៉ៃន ដោយជិះម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ ប៉ៃលិន១B-០៣១៩ ។
ប្រភពបន្តទៀតថា មុនពេលកើតហេតុគេឃើញជនរងគ្រោះខាងលើ បើកបរម៉ូតូក្នុងល្បឿនលឿនតែម្នាក់ឯង ចេញពីផ្សារសាលាក្រៅឆ្ពោះទៅក្រុងប៉ៃលិន ។ ពេលនោះដល់ចំណុចផ្លូវកោង ស្រាប់តែរូបគេមិនបន្ថយល្បឿននោះទេ ក៏ជ្រុលទៅខាងស្តាំដៃ ធ្លាក់ក្នុងប្រឡាយអត់ទឹករងរបួសធ្ងន់តែម្តង ។
ក្រោយពេលសន្លប់មួយសន្ទុះធំ ជនរងគ្រោះដែលរងរបួសធ្ងន់ត្រូវបានគេបញ្ជូនទៅមន្ទីរពេទ្យបង្អែកខេត្តប៉ៃលិន ចំណែកម៉ូតូបានប្រគល់ជូនក្រុមគ្រួសារយកទៅជួសជុល ៕
ចែករំលែកព័តមាននេះ