ខេត្តក្រចេះ ៖ ពលរដ្ឋរស់នៅតាមដងផ្លូវកៅស៊ូតាមឃម និងសង្កាត់នានាក្នុងក្រុងក្រចេះ បានលើកឡើងដោយសម្តែងក្តីបារម្ភពីការខូចខាតផ្លូវ ក៏ដូចជាបាក់ស្រុតស្ពានដែកបេឡេជាច្រើនទៀត នៅលើផ្លូវក្រាលកៅស៊ូដ៏តូចចង្អៀតពីរថយន្តដឹកខ្សាច់ធំៗ ខណៈដែលពពួករថយន្តរបស់ឈ្មួញកំពុងតែសម្រុកដឹកជញ្ជូនកានតែខ្លាំងឡើងៗទាំងយប់ទាំងថ្ងៃគ្មានស្រាកស្រាន្ត ។
មិនថាតែពលរដ្ឋនោះទេដែលព្រូយបារម្ភពីការខូចខាតសម្បត្តិរដ្ឋព្រោះតែការធ្វើអាជីវកម្មឯករបស់ឈ្មួញខ្សាច់ធំៗ ដែលបានដឹកចេញខ្សាច់ក្រួសតាមរថយន្តធំៗពីដេប៉ូក្នុងភូមិឬស្សីចារ ឃុំថ្មគ្រែ ស្រុកចិត្របុរី សូម្បីតែអ្នកធ្វើដំណើរក៏សម្តែងនូវក្តីបារម្ភពីសុវត្ថិភាពការធ្វើដំណើររបស់ពួកគាត់នៅតាមផ្លូវ និងតាមស្ពានដែលជិះបញ្ជ្រៀតគ្នាជាមួយពពួករថយន្តធុនធំទាំងអស់នោះ ។
ទន្ទឹមគ្នានេះ ពួកគាត់បានអំពាវនាវស្នើរឲ្យអាជ្ញាធរមានវិធានការទប់ស្កាត់លើក្រុមរថយន្តដឹកខ្សាច់ទាំងនេះដើម្បីរក្សាគុណភាពផ្លូវថ្នល់ និងស្ពានឱ្យបានយូរអង្វែង ។ ស្ពានដែកបេឡេពីរកន្លែង គឺស្ពានក្រគរ នឹងស្ពានអណ្តែងដូន ស្ថិតក្នុងក្រុងក្រចេះ ដែលជាស្ពានមានសភាពចាស់ទ្រុឌទ្រោម ហើយប្រឈមនឹងការបាក់ស្រុតដោយសាររថយន្តដឹកខ្សាច់ធំៗដឹកឆ្លងកាត់រាល់ថ្ងៃដោយការផ្ទុកលើសទម្ងន់ ។
បើទោះជាសកម្មភាពដឹកជញ្ជូនខ្សាច់ក្រូស របស់ឈ្មួញបានកើតមានជាយូមកហើយយ៉ាងណាក្តី តែអាជ្ញាធរក៏ដូចជាមន្ត្រីជំនាញ ត្រូវគេមើលឃើញថា នៅមិនទាន់មានវិធានការនៅឡើយទេ គឺទុកឱ្យឈ្មួញធ្វើអាជីវកម្មដឹកខ្សាច់បំផ្លាញផ្លូវស្ពានក្នុងភូមិតាមអំពើចិត្ត ។
ពលរដ្ឋម្នាក់ដែលមានលំនៅដ្ឋានក្បែរនឹងគល់ស្ពានអណ្តែងដូន ក្នុងសង្កាត់ក្រគរ ក្រុងក្រចេះ បាននិយាយថា ពេលដែលរូបគាត់ឃើញរថយន្តដឹកខ្សាច់ធំៗដឹកឆ្លងកាត់ ស្ពានម្តងៗពួកគាត់មានការបារម្ភជាខ្លាំង ។ ហើយថ្ងៃណាមួយស្ពាននេះនឹងបាក់ស្រុតជាក់ជាមិនខានឡើយ បើសិនជាអាជ្ញាធរនៅព្រងើយកន្តើយមិនមានវិធានការទប់ស្កាត់ លើសពីនេះពេលដែលរថយន្តដឹកខ្សាច់បើកដឹកឆ្លងកាត់ស្ពានម្ដងៗអ្នកធ្វើដំណើរពីក្រោយព្រលឹងចុងសក់ដោយស្ថានភាពស្ពាននោះញ័រយោលរំជួយយ៉ាងខ្លាំង ។
ពលររដ្ឋបានបន្តថា ក្នុងមួយថ្ងៃៗគឺមានរថយន្តដឹកខ្សាច់រាប់សឹបគ្រឿងបានធ្វើសកម្មភាពដឹកជញ្ជូនចេញពីដេប៉ូ លោក មៀច ម៉ុច ដែលមានទីតាំងនៅភូមិឬស្សីចារ ឃុំថ្មក្រែ ស្រុកចិត្របុរី បន្ដឆ្ពោះទៅស្រុកស្នួលជាប់ព្រំដែនវៀតណាម ។ លើសពីនេះ ពួកគាត់បានបារម្ភពីបញ្ហាករណីគ្រោះថ្នាក់ចរាចរ ដែលនិងអាចកើតឡើងដោយសារ ក្រុមរថយន្តដឹកខ្សាច់ទាំងនោះដែលបើកបរក្នុងល្បឿនលឿននៅក្នុងតំបន់ទីប្រជុំជនក្រុងក្រចេះ ។
ពាក់ព័ន្ធនិងការលើកឡើងដោយសម្តែងការព្រួយបារម្ភនេះកន្លងមក ប្រធានមន្ទីរសារធារណៈការ និងដឹកជញ្ជូនខេត្តក្រចេះ គឺលោក ស្រេង ស្រស់ ធ្លាប់បានប្រាប់ថា លោកបានដាក់ស្លាកសញ្ញាស្ពានទ្រុឌទ្រោមជាសាធារណៈ ហើយហាមរថយន្ដផ្ទុកលើសទម្ងន់ដឹកឆ្លងកាត់ជាពិសេសរថយន្ដខ្នាតធំៗ បើបុគ្គលណានៅតែប្រព្រឹត្តដឹកឆ្លងកាត់ បើមានបញ្ហា ឬបាក់ស្រុតស្ពានបុគ្គលរូបនោះ ត្រូវតែទទួលខុសត្រូវដោយខ្លួនឯង ។ តែទោះជាបែបណាការដឹកជញ្ជូនគឺមិនថមថយនោះទេ គឹឈ្មួញនៅតែសម្រុកការដឹកជញ្ជូនរាល់ថ្ងៃ ខណៈទីផ្សារខ្សាច់ត្រូវគេនិយាយថា កំពុងតែមានតម្លៃខ្ពស់សម្រាប់លក់ឲ្យទៅប្រទេសវៀតណាម ៕
ចែករំលែកព័តមាននេះ