ប្រទេសនីហ្សេរីយ៉ា ៖ ក្រោយ៦ថ្ងៃស្ថិតក្នុងការស្ងៀមស្ងាត់ និងភាពមិនច្បាស់លាស់ ទីបំផុតរដ្ឋាភិបាលនីហ្សេរីយ៉ាអះអាងនាថ្ងៃទី២៥ កុម្ភៈ ពីការបាត់ខ្លួនសិស្សស្រី១១០នាក់នៅទីក្រុង DAPCHI ភាគឦសានប្រទេស បន្ទាប់ពីការវាយប្រហារលើសាលារៀនរបស់ពួកគេដោយពួកមនុស្សនៃក្រុមជីហាដបូកូហារ៉ាម ។
តាមសេចក្តីប្រកាសមួយ ក្រសួងព័ត៌មាននីហ្សេរីយ៉ានិយាយថា រដ្ឋាភិបាលសហព័ន្ធអាចបញ្ជាក់ថា និស្សិតស្រី១១០នាក់នៃសាលារដ្ឋមួយនៅ DAPCHI ក្នុងរដ្ឋ YOBE នៅពុំទាន់អាចរកឃើញក្រោយពីពួកមនុស្សសន្មត់ស្ថិតក្នុងក្រុមបូកូហារ៉ាមវាយប្រហារលើសាលាពួកគេកាលពីថ្ងៃទី១៩ កុម្ភៈ ។ ក្រសួងនេះបន្តថា តួលេខនេះទទួលបានក្រោយការប្រមូលបណ្តាទិន្នន័យរបស់ក្រសួងអប់រំ និងរបស់សាលាដែលមានសិស្ស៩០៦នាក់ ។ ចំណែកមាតា បិតា សិស្សវិញ កាលពីថ្ងៃទី២២ កុម្ភៈ ធ្លាប់និយាយពីចំនួនយុវនារី១០៥នាក់ ដែលបាត់ពុំទទួលដំណឹង ។
ពួកមនុស្សក្រុមបូកូហារ៉ាមកាលពីព្រលប់ថ្ងៃទី១៩ កុម្ភៈ បានលើកគ្នាមកតាមក្បួនរថយន្តមួយមកកាន់វិទ្យាល័យ DAPCHI ក្នុងគោលបំណងចាប់ពង្រត់បណ្តាសិស្សសាលានោះ ខណៈសិស្សស្រីជាច្រើនរយនាក់ភ័យផ្អើលនាំគ្នារត់គេចខ្លួន តែសិស្សស្រីច្រើនរយនាក់ត្រូវបានគេចាប់នាំយកទៅ ។ អាជ្ញាធរបានធ្វើប្រតិបត្តិការតាមរករួចប្រកាសកាលពីសប្តាហ៍មុនថា សិស្សស្រីមួយចំនួនត្រូវបានគេឃើញដោយកងទ័ព ។
គួររំលឹកថា កាលពីខែមេសា ឆ្នាំ២០១៤ សិស្សស្រីវិទ្យាល័យ២៧៦នាក់ ត្រូវក្រុមបូកូហារ៉ាមចាប់ពង្រត់ តែសសិស្សស្រីសាលា CHIBOK ជិត១០០នាក់ ត្រូវបានដោះលែងវិញជាថ្នូរនឹងការបង់ប្រាក់លោះ ៕
ចែករំលែកព័តមាននេះ