ប្រទេសស៊ីរី ៖ ក្រោយការវាយប្រហារយ៉ាងបង្ហូរឈាមរយៈពេលជាង១ខែ របបស៊ីរីពេល
នេះដណ្តើមត្រួតត្រាជាង៩០% ហើយតំបន់ GHOUTA ខាងកើតជាទីតាំងចុងក្រោយរបស់ពួកឧទ្ទាមនៅក្បែរក្រុងដាម៉ាស់ ។
ជួយទ្រទ្រង់ដោយរុស្ស៊ី កិច្ចព្រមព្រៀងជម្លៀសចេញដែលប្រៀបដូចជាការសុំចុះចាញ់ត្រូវបានរកឃើញរវាងពួកបះបោរ២ក្រុម និងរបបលោកបាចា អាល់អាសាដ ។ នៅទីក្រុង HARASTA ជាទីក្រុងសំខាន់មួយក្នុងចំណោមទីក្រុងសំខាន់៣ កាន់កាប់ដោយពួកបះបោរនៅ GHOUTA ខាងកើត ពួកឧទ្ទាម និងសាច់ញាតិគ្រួសារពួកគេជម្លៀសចេញអស់ហើយ ។ នេះជាការអះអាងរបស់ទូរទស្សន៍រដ្ឋស៊ីរីកាលពីយប់ថ្ងៃទី២៣ មីនា ។ ការចាកចេញចាប់ផ្តើមពីថ្ងៃទី២២ មីនា មក ។ រយៈពេល២ថ្ងៃមនុស្សជាង៤.០០០នាក់ ក្នុងនោះមានយុទ្ធជនក្រុម AHRAR AL CHAM ១.៤០០នាក់ បានយល់ព្រមចាកចេញទៅកាន់ខេត្តអ៊ីដលីប ដែលគេចផុតពីការត្រួតត្រារបស់របបស៊ីរី ។
អ្នកជំនាញការខាងបញ្ហាស៊ីរីម្នាក់លោក NAWAR OLIVER និយាយថា ក្រុមឧទ្ទាមត្រូវបង្ខំចិត្តទទួលយកកិច្ចព្រមព្រៀងដោយមិនចាំបាច់ចរចា ។ អ្វីដែលពួកគេទទួលបាននេះគឺការចាកចេញដោយពុំត្រូវគេសម្លាប់ ។ ពួកគេពុំអាចរស់នៅលើដីបានទេ ព្រោះតែការរោយគ្រាប់បែក ។ កុមារៗស្ថិតនៅតែក្នុងជម្រកក្រោមដីរយៈពេល៤ខែមកហើយ ។
នៅផ្នែកខាងត្បូងតំបន់ GHOUTA ក្រុមឧទ្ទាមមួយទៀតគឺក្រុម FAYLAQ AL RAHMANE បានយល់ព្រមកាលពីថ្ងៃទី២៣ មីនា ចុះហត្ថលេខាលើការជម្លៀសចេញដោយទទួលយកការចាកចេញរបស់មនុស្សជិត៧.០០០នាក់ ។ ពួកយុទ្ធជនត្រូវបោះបង់ចោលគ្រឿងសព្វាវុធមួយផ្នែករបស់ពួកគេ ព្រមទាំងសាច់ញាតិគ្រួសារផងដែរ ។
ក្រសួងការពារប្រទេសរុស្ស៊ីថ្លែងនាថ្ងៃទី២៤ មីនា ថា មនុស្សជាង១០៥.០០០នាក់ បានចាកចេញពីតំបន់ GHOUTA ខាងកើតតាំងពីចាប់ផ្តើមមានការឈប់បាញ់មនុស្សធម៌មក ។ ជនស៊ីវិលប្រមាណជា៧០០នាក់បានចាកចេញពីទីនោះនាថ្ងៃទី២៤ មីនា ខណៈតំបន់នេះមួយផ្នែកនៅកាន់កាប់ ដោយពួកឧទ្ទាមដែលក្រាញតស៊ូប្រឆាំងរដ្ឋអំណាចស៊ីរី ។ កងទ័ពរដ្ឋាភិបាលចាប់ពីពាក់កណ្តាលយប់ថ្ងៃទី២៤ មីនា បានផ្អាកការវាយប្រហារលើក្រុងឌូម៉ា ជាទីក្រុងធំនៃតំបន់នេះ ក្នុងក្របខណ្ឌនៃការផ្អាកបាញ់មនុស្សធម៌ ។ ថ្ងៃទី២៤ មីនា មនុស្សប្រមាណជា៧.០០០នាក់នាំគ្នាចាកចេញពីទីក្រុង ZAMALKA ក្រុង DJOBAR ក្រុង ARBINE និងក្រុង EIN TERMA ។ អមដោយសាច់ញាតិគ្រួសារពួកយុទ្ធជនឧទ្ទាមត្រូវដឹកចេញតាមក្បួនរថយន្តបឺសទៅកាន់ខេត្តអុីដលីបភាគពាយ័ព្យប្រទេស។
ការដណ្តើមយកបានតំបន់ GHOUTA ខាងកើតទាំងមូលនឹងជាតំណាងនៃជោគជ័យខាងយោធាដ៏សំខាន់បំផុតមួយសម្រាប់លោកបាចា អល់អាសាដ បន្ទាប់ពីរំដោះបានទីក្រុងអាឡែបទាំងមូលកាលពីដំណាច់ឆ្នាំ២០១៦មក ។
យោងតាមអង្គការសិទ្ធិមនុស្សស៊ីរី OSDH ថា មនុស្សជាង១.៦០០នាក់ស្លាប់ ក្នុងការទម្លាក់គ្រាប់បែក និងការប្រយុទ្ធតាំងពីចាប់ផ្តើមការវាយលុករបស់រដ្ឋាភិបាលពីខែមុនមក ។ OSDH វាយតម្លៃពីចំនួនមនុស្សដល់ទៅជាង៥០.០០០នាក់ត្រូវជម្លៀសចេញពី GHOUTA រយៈពេលជិត២សប្តាហ៍កន្លងទៅនេះ ៕
ចែករំលែកព័តមាននេះ