រាជធានីភ្នំពេញ ៖ បុរសម្នាក់អតីតជាមុខសញ្ញាកាច់សោ.កម៉ូតូ ហើយធ្លាប់ជាប់ពន្ធនាគារជិត១ឆ្នាំ លុះពេលចេញមកវិញតែងតែអុកឡុកវាយបំផ្លិចបំផ្លាញទ្រព្យសម្បត្តិនៅក្នុងផ្ទះជាបន្តបន្ទាប់ ។ ដោយឡែកចុងក្រោយនេះបានធ្វើសកម្មភាពបោកបំផ្លាញចានឆ្នាំងបង្កឲ្យមានការភ្ញាក់ផ្អើលដល់អ្នកជិតខាង និងធ្វើឲ្យក្រុមគ្រួសារមានការភិតភ័យ ហើយដោយអត់ទ្រាំងលែងបាន ទើបបងស្រីបង្កើតប្ដឹងសុំឲ្យនគរបាលចាប់ខ្លួនតែម្ដង ។ ហេតុការណ៍នោះបានបង្កឲ្យមានការភ្ញាក់ផ្អើលឡើងកាលពីវេលាម៉ោង១១និង១០នាទីព្រឹក ថ្ងៃទី២១ ខែមីនា ឆ្នាំ២០១៨ នៅក្នុងភូមិចំការឪឡឹក សង្កាត់កាកាប១ ខណ្ឌពោធិ៍សែនជ័យ ។
បុរសជាជនសង្ស័យរូបនោះឈ្មោះ ជា សុផាន់ណា អាយុ២៩ឆ្នាំ កន្លងមកជននេះធ្លាប់បានជាប់គុករយៈពេល១០ខែមកហើយ ពីបទលួចម៉ូតូនៅមុខអាកាសយានដ្ឋានអន្តរជាតិភ្នំពេញ ។ និងបានចេញមកវិញមានសេរីភាពនៅអំឡុងឆ្នាំ២០១៥កន្លងទៅនេះ ថ្វីដ្បិតតែមិនបានធ្វើសកម្មភាពលួចម៉ូតទៀត ប៉ុន្តែតែងរករឿងអុកឡុកនៅក្នុងគ្រួសារជាញឹកញាប់ ។
ប្រភពដដែលបានបន្តឲ្យដឹងថា ដោយសារតែបែបនេះ ទើបមិនសូវត្រូវគ្នាជាមួយស្ត្រីជាបងឡើយ ដោយឡែកនៅមុនពេលកើតហេតុ ជនដៃដល់បានរៀបចំហូបបាយហើយបានបង្ករឿងទំនាស់ក៏ត្រូវបានបងស្រីទាញចានសម្លរចេញ ។ ពេលនោះជនសង្ស័យខឹងច្រឡោតតួង ហើយក៏បានបោកចានឆ្នាំងចោលខ្ទេចខ្ទីរបង្កឲ្យមានការភ្ញាក់ផ្អើលដល់អ្នកជិតខាង និងបង្កការភ័យខ្លាចនៅក្នុងគ្រួសារថែមទៀតផង ។ ដោយទ្រាំលែងបានបងស្រីក៏បានប្ដឹងនគរបាលប៉ុស្តិ៍កាកាប១ចុះចាប់ខ្លួនសួរនាំ ប៉ុន្តែបន្ទាប់ពីបានធ្វើការអប់រំរួចនគរបាលបានដោះលែងឲ្យត្រលប់ទៅផ្ទះវិញ ៕
ចែករំលែកព័តមាននេះ