ប្រធានាធិបតីមីយ៉ាន់ម៉ា សុំលាលែងពីតំណែង
ប្រទេសមីយ៉ាន់ម៉ា ៖ ប្រធានាធិបតីមីយ៉ាន់ម៉ា លោក HTIN KYAW ជាមនុស្សជំនិតរបស់លោកស្រីអ៊ួង សាន់ស៊ូជី បានសុំលាលែងកាលពីថ្ងៃទី២១ មីនា…
ប្រទេសមីយ៉ាន់ម៉ា ៖ ប្រធានាធិបតីមីយ៉ាន់ម៉ា លោក HTIN KYAW ជាមនុស្សជំនិតរបស់លោកស្រីអ៊ួង សាន់ស៊ូជី បានសុំលាលែងកាលពីថ្ងៃទី២១ មីនា ជាមួយការអនុវត្តភ្លាមៗ ជិត២ឆ្នាំក្រោយលោកកាន់តំណែងនេះមក ខណៈប្រទេសស្ថិតក្នុងស្ថានភាពស្មុគស្មាញ ហើយរងការចោទប្រកាន់ពីការលុបបំបាត់ចោលជនជាតិភាគតិចរ៉ូហ៊ីងយ៉ា ។
ក្នុងសេចក្តីប្រកាសខ្លីមួយតាម FACEBOOK វិមានប្រធានាធិបតីនិយាយថា ប្រធានាធិបតីលោក HTIN KYAW បានស្នើនាថ្ងៃទី២១ មីនា សុំលាលែងចេញពីតំណែង ។
លោក HTIN KYAW ជាបញ្ញវ័នមួយរូប កូនប្រុសរបស់កវីមីយ៉ាន់ម៉ាល្បីឈ្មោះមួយរូប និងជាមិត្តតាំងពីក្មេងក្តីមករបស់លោកស្រីអ៊ួង សាន់ស៊ូជី បានក្លាយកាលពីខែមេសា ឆ្នាំ២០១៦ ជាជនស៊ីវិលដំបូងគេកាន់តំណែងប្រធានាធិបតីពុំធ្លាប់មានចាប់តាំងពីច្រើនទសវត្សមកហើយ ។
ពុំមានហេតុផលណាមួយត្រូវបានលើកដោយវិមានប្រធានាធិបតីពីការសុំលាលែងនេះឡើយ ក៏ប៉ុន្តែគេសង្កេតឃើញថា លោក HTIN KYAW ហាក់មានរូបរាងស្គមខ្លាំង រយៈពេលប៉ុន្មានខែចុងក្រោយនេះ ហើយមានលេចពាក្យចចាមអារ៉ាមនានាពីសុខភាពរបស់លោកផ្សាយក្នុងសារព័ត៌មាន ។
លោកស្រីស៊ូជី ឱ្យមនុស្សជំនិតរូបនេះកាន់តំណែងប្រធានាធិបតីគ្រាន់ជានិមិត្តរូប ព្រោះ
លោកស្រីពុំអាចកាន់តំណែងនេះបាន មកពីរដ្ឋធម្មនុញ្ញកំណត់ហាមមិនឱ្យនរណាម្នាក់មានកូនសញ្ញាតិបរទេសកាន់កាប់តំណែងប្រធានាធិបតី ។ លោកស្រីស៊ូជី មានកូនប្រុស២នាក់សញ្ជាតិអង់គ្លេសដូចឪពុកពួកគេ ៕
ចែករំលែកព័តមាននេះ