រូបវិទូ Stephen Hawking ទទួលមរណភាព
រូបវិទូដែលជាអ្នកវិទ្យាសាស្ត្រជាតិអង់គ្លេសដ៏ល្បីល្បាញបំផុតក្នុងប្រវត្តិសាស្ត្រសម័យថ្មី លោក Stephen Hawking បានទទួលមរណភាពនៅថ្ងៃពុធ ទី១៤ មីនា ២០១៨ ក្នុងជន្មាយុ៧៦ឆ្នាំ ។…
រូបវិទូដែលជាអ្នកវិទ្យាសាស្ត្រជាតិអង់គ្លេសដ៏ល្បីល្បាញបំផុតក្នុងប្រវត្តិសាស្ត្រសម័យថ្មី លោក Stephen Hawking បានទទួលមរណភាពនៅថ្ងៃពុធ ទី១៤ មីនា ២០១៨ ក្នុងជន្មាយុ៧៦ឆ្នាំ ។ លោកបានខិតខំស្រាវជ្រាវ ទម្លាយអាថ៌កំបាំងរបស់ចក្រវាឡ ទាំងខ្លួនលោកមានជំងឺ ធ្លាក់ខ្លួនពិការ និយាយមិនចេញ កម្រើកបានតែម្រាមដៃមួយសម្រាប់វាយអក្សរ។
លោក Stephen Hawking មានឈ្មោះល្បីរន្ទឺពេញពិភពលោក តាមរយៈស្នាដៃស្រាវជ្រាវជាច្រើនប្រមាណ១៣០អត្ថបទស្តីអំពីអវកាស អំពីរូបវិទ្យា ភាពងងឹត … ដែលសឹងថាមានតែអ្នកវិទ្យាសាស្ត្រខ្លាំងៗមួយក្តាប់តូចអាចអានយល់ ។ ភាពល្បីល្បាញរបស់លោកមានកាន់តែខ្លាំងតាមរយៈការសរសេរសៀវភៅមួយក្បាលស្តីអំពីប្រវត្តិខ្លីនៃពេល “A brief history of Time” ចេញលក់នៅឆ្នាំ១៩៨៨ និងជាសៀវភៅដែលលក់ដាច់ជាងបង្អស់នៅលើពិភពលោក ដោយលក់អស់ដល់ទៅរាប់លានក្បាល។
ក្នុងពិភពលោកអ្នកវិទ្យាសាស្ត្រ បន្ទាប់ពីអ្នកប្រាជ្ញ Albert Einstein គឺលោក Stephen Hawking នេះឯងទន្ទឹមនឹងសមត្ថភាពផ្នែកបញ្ញាគ្មានប្រៀប លោក Stephen Hawking ត្រូវរស់ប្រឈមនឹងភាពពិការ ដែលបង្កឡើងដោយជំងឺខូចប្រព័ន្ធប្រសាទដ៏កម្រ ។ ជំងឺដែលបានធ្វើឱ្យបាត់បង់សមត្ថភាពផ្នែកសរពាង្គកាយស្ទើរទាំងស្រុង អាចបញ្ចេញអារម្មណ៍ មតិយោបល់ តែតាមរយៈម្រាមដៃមួយគត់ ចុចក្តារកុំព្យូទ័រសរសេរ និងការ
កន្ត្រាក់សាច់មុខ សម្រាប់ធ្វើសំយោគសំឡេង ប៉ុន្តែមានបញ្ញា និងខួរក្បាលខ្លាំងក្រៃ ។ ចូលចិត្តកំប្លុកកំប្លែង លោកធ្លាប់បាននិយាយថា ពិការភាពរបស់លោកជាចំណែកមួយនៃភាពល្បីល្បាញ។
កើតនៅOxford ថ្ងៃទី៨ មករា ឆ្នាំ១៩៤២ ត្រូវនឹង៣០០ថ្ងៃគត់ក្រោយមរណភាពរបស់ Galilée។ លោក Stephen Hawking ជាក្មេងដែលខ្ជិល មិនសូវចូលចិត្តសាលារៀនទេ រវល់គិតស្រមៃ និងបង្កើតល្បែងលេងជាក្រុមដែលមានក្បួនច្បាប់ប្លែកៗ ផលិតកាំជ្រួច ឬគំរូកុំព្យូទ័រ … ពោលគឺលោកមានជំនាញខ្លាំងលើផ្នែកវិទ្យាសាស្ត្ររូបវិទ្យា ដែលបានចូលសិក្សាយកជំនាញនៅមហាវិទ្យាល័យ Oxford នៅឆ្នាំ១៩៥៩។
លោកមានភាពវៃឆ្លាត ងឿងឆ្ងល់ និងតស៊ូព្យាយាមប្លែកខុសពីមនុស្សទូទៅ ។ បីឆ្នាំក្រោយមកទៀត នៅឆ្នាំ១៩៦២ លោកបានបន្តការសិក្សានៅសាកលវិទ្យាល័យ Cambridge ដើម្បីបន្តការស្រាវជ្រាវផ្នែកតារាវិទ្យា ។ ប៉ុន្តែជាសំណាងអាក្រក់ ពេលចូលដល់វ័យ២១ឆ្នាំ (១៩៦៤) លោកបានធ្លាក់ខ្លួនឈឺខូចប្រព័ន្ធប្រសាទដ៏កម្រ ។ ជំងឺនោះមានឈ្មោះថា Chacot ដែលធ្វើឱ្យលោកធ្លាក់ខ្លួនពិការបន្តិចម្តងៗ។ កាលណោះគ្រូពេទ្យគិតថា លោកអាចមានពេលរស់បានតែពីរឆ្នាំប៉ុណ្ណោះ ! មិនដឹងថាតើលោកអាចបញ្ចប់និក្ខេបបទថ្នាក់បណ្ឌិតរបស់លោកបានឬអត់ឡើយ ។ ដំណឹងនេះបានធ្វើឱ្យលោកមានជំងឺធ្លាក់ទឹកចិត្ត តែត្រូវបានជាដោយសារនិស្ស័យស្នេហ៍ជួបយុវតីនិស្សិត Jane Wilde ដែលលោកបានរៀបការជាមួយនៅឆ្នាំ១៩៦៥ និងរួមរស់ជាមួយមានកូនបីនាក់ក្នុងរយៈពេល៣០ឆ្នាំ។
នៅឆ្នាំ១៩៧៤ លោកលែងមានសមត្ថភាពហូបចុក និងងើបឈរអង្គុយដោយខ្លួនឯង ហើយត្រូវបាត់បង់សមត្ថភាពនិយាយស្តីទាំងស្រុងនៅឆ្នាំ១៩៨៥ ។ ប៉ុន្តែស្មារតី និងបញ្ញាគ្មានប្រែប្រួល ! បំណងដ៏សាមញ្ញរបស់លោក គឺសិក្សាស្រាវជ្រាវដើម្បីបានយល់ទាំងស្រុងពីចក្រវាឡ ថាហេតុអ្វីបានជាដូច្នេះ និងហេតុអ្វីបានជាកើតឡើង។
នៅក្នុងទសវត្សរ៍ឆ្នាំ១៩៧០ លោកបានអភិវឌ្ឍទ្រឹស្តីស្តីពីភាពងងឹត និងពន្លឺ ព្រមទាំងកាំរស្មី ដែលពេលនេះជាប់ជាក្បួនសិក្សាថា កាំរស្មីHawking ។ លោកគឺជាជនទីមួយដែលសិក្សាពន្យល់អំពីដំណើរការនៃចក្រវាឡ អំពី យន្តការកង់ទិច និងដែលគួរតែអាចបានទទួលពានរង្វាន់ណូបែលរូបវិទ្យាផង ប្រសិនបើមានពិសោធន៍បង្ហាញ។
នៅឆ្នាំ១៩៨៨ លោកបានបោះផ្សាយសៀវភៅអំពីប្រវត្តិនៃពេលសម្រាប់ពន្យល់អ្នកអានជាពលរដ្ឋសាមញ្ញ អំពីគោលការណ៍នៃលោហធាតុវិទ្យា ពីបន្ទុះធំទៅទ្រឹស្តីខ្សែអក្សរ។
ពុំដែលធ្លាប់មានទេសៀវភៅវិទ្យាសាស្ត្រទទួលបានការអានច្រើនយ៉ាងដូច្នេះ !
បានក្លាយជាអ្នកវិទ្យាសាស្ត្រដ៏មានប្រជាប្រិយភាព ! បង្កើនយុទ្ធនាការឃោសនាគាំទ្រការស្រាវជ្រាវវិទ្យាសាស្ត្រ ។ ដោយមាននិស្ស័យកំប្លុកកំប្លែង ពូកែខាងទំនាក់ទំនង រហូតមានចំណែក និងដើរតួក្នុងរឿងភាគ Star Trek រឿង The Big Bang Theory និងរឿង The Simpsons៕
ចែករំលែកព័តមាននេះ