ខេត្តបន្ទាយមានជ័យ ៖ រយៈពេល២ថ្ងៃ ឆេះរថយន្ត២គ្រឿងដោយសារឆ្លងប្រព័ន្ធភ្លើង ។ ដោយក្នុងនោះ១ករណីបានកើតឡើងនៅស្រុកព្រះនេត្រព្រះ នៅវម៉ោង០៥ល្ងាច ថ្ងៃទី១៤ ខែមីនា ឆ្នាំ២០១៨ នៅលើកំណាត់ផ្លូវជាតិលេខ៦ ស្ថិតក្នុងភូមិរំដួល ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ និងករណីទី២ នៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ នៅវេលាម៉ោង០៩និង៣០នាទី ថ្ងៃទី១៥ ខែមីនា ឆ្នាំ២០១៨ ។
ប្រភពព័ត៌មានពីសមត្ថកិច្ចកងរាជអាវុធហត្ថមូលដ្ឋានបានឲ្យដឹងថា រថយន្តដែលរងនូងនូវការខូចខាតម៉ាកតូយ៉ូតាកាមរី ស៊េរី៩៣ ពណ៌សម្បកឪឡឹក ពាក់ផ្លាកលេខ ភ្នំពេញ ២E-5208 កំពុងបើកបរនៅលើកំណាត់ផ្លូវជាតិលេខ៦ ស្ថិតក្នុងភូមិរំដួល ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ។ ក៏ឆ្លងភ្លើងបណ្ដាលឲ្យឆាបឆេះយ៉ាងសន្ធោសន្ធៅឡើង ប៉ុន្តែអ្នកបើកបរអ្នករួមដំណើរ និងអ្នកដំណើរមិនមានអ្នកណារងរបួស ឬស្លាប់ឡើយ ។
ប្រភពដដែលបានឲ្យដឹងថា តាមការរៀបរាប់ពីអ្នកបើកបររថយន្តឈ្មោះ ម៉ក់ សំអុល ភេទប្រុស អាយុ៥២ឆ្នាំ រស់នៅភូមិ២ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បានប្រាប់ថា នៅពេលដែលបើកបរមកដល់ចំណុចកើតហេតុ រថយន្តក៏ឆ្លងចរន្ដអគ្គិសនីឆាបឆេះឡើងបង្កឲ្យភ្លើងឆេះយ៉ាងសន្ធោសន្ធៅតែម្តង បើទោះបីអ្នកជិៈក្នុងរថយន្តស្ទើររត់ចេញមិនទាន់ ។ ដោយឡែកនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ នៅវេលាម៉ោង០៩និង៣០នាទី ថ្ងៃទី១៥ ខែមីនា ឆ្នាំ២០១៨ ក៏មានរថយន្តម៉ាកឡុចស៊ីស ពណ៌ស្ករ គ្មានស្លាកលេខ ត្រូវបានឆាបឆេះ ខណៈពេលអ្នកបើកបរយករថយន្តមកសប់កង់ នៅជិតមន្ទីរនគរូបនីយកម្មសំណង់ និងសូរិយោដី ខេត្តបន្ទាយមានជ័យ ស្ថិតក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។
តាមប្រភពព័ត៌មាននៅកន្លែងកើតហេតុ ក៏ដូចជាអ្នកបើកបរបានឲ្យដឹងថា មុនពេលកើតហេតុ បងប្អូនបានពឹងឲ្យបើករថយន្តមកសប់កង់ ពេលឈប់កំពុងតែសប់កង់នោះ ក៏ស្រាប់តែគេឃើញមានផ្សែងឆេះហុយនៅផ្នែកម៉ាស៊ីន ស្របពេលនោះ ប្រជាពលរដ្ឋនៅទីនោះបានជួយយកបំពង់ឧស្ម័នជួយអន្តរាគមន៍បាញ់ពន្លត់ និងមានរថយន្តពន្លត់អគ្គីភ័យរបស់ស្នងការដ្ឋាននគរបាលបាលខេត្តជួយអន្តរាគមន៍បាញ់ពន្លត់ ។ ករណីនេះរថយន្តឆេះតែផ្នែកម៉ាស៊ីនខាងមុខ ។ បើតាមការសន្និដ្ឋាន គឺបណ្ដាលមកពីការឆ្លងចរន្តអគ្គិសនីផងដែរ ៕
ចែករំលែកព័តមាននេះ