រាជធានីភ្នំពេញ ៖ បុរសម្នាក់ជិះម៉ូតូចេញពីធ្វើការត្រូវជនមិនស្គាល់មុខជិះម៉ូតូដេញតាមពីក្រោយកាប់មួយដាវរងរបួសធ្ងន់សង្ស័យជារឿងគំនុំ ឬកាប់ប្លន់យកម៉ូតូ Zoomer-X បង្កឱ្យមានការភ្ញាក់ផ្អើលកាលពីវេលាម៉ោង៧និង២០នាទីយប់ថ្ងៃទី១៤ ខែមីនា ឆ្នាំ២០១៨ ស្ថិតនៅភូមិត្រពាំងគល់ សង្កាត់កន្ទោក ខណ្ឌពោធិ៍សែនជ័យ ។
ជនរងគ្រោះមានឈ្មោះ ជឹម ឧត្តម ភេទប្រុស អាយុ២៣ឆ្នាំ មុខរបរជាងជួសជុលរថយន្ត ស្នាក់នៅបន្ទប់ជួលនៅម្តុំលូប្រាំ ស្ថិតសង្កាត់ស្ទឹងមានជ័យ ខណ្ឌមានជ័យ និងមានស្រុកកំណើតនៅខេត្តតាកែវ ។ ជនរងគ្រោះជិះម៉ូតូម៉ាក Zoomer-X ពណ៌ខ្មៅលាយស ពាក់ផ្លាកលេខ ភ្នំពេញ ១FP-៩៥៨៣ ។
តាមប្រភពព័ត៌មានពីកន្លែងកើតហេតុបាននិយាយប្រាប់ថា មុនពេលកើតហេតុគេឃើញជនរងគ្រោះជិះម៉ូតូម៉ាក Zoomer-X បើកបរតាមបណ្តោយផ្លូវជាតិលេខ៤ ក្នុងទិសដៅពីលិចទៅកើតជិះម្នាក់ឯង លុះបើកមកដល់ចំណុចកើតហេតុស្រាប់តែមានជនបង្កមានគ្នា២នាក់បើកម៉ូតូមួយគ្រឿងម៉ាកហុងដាឌ្រីមមិនចាំផ្លាកលេខជិះស្របជាមួយជនរងគ្រោះដោយបើកមកពីក្រោយទន្ទឹមនឹងម៉ូតូជនរងគ្រោះ ស្រាប់តែជនបង្កខាងលើប្រដាប់ដោយដាវមួយដើមបានកាប់ទៅលើជនរងគ្រោះចំក្បាលផ្នែកខាងឆ្វេងបណ្តាលឱ្យដួលភ្លាមៗផងដែរ សំណាងហើយដែលជនរងគ្រោះពាក់មួកការពារសុវត្ថិភាព ។ ពេលជនរងគ្រោះដួលប្រលាក់សុទ្ធតែឈាមប្រជាពលរដ្ឋនៅកន្លែងកើតហេតុឃើញជនរងគ្រោះដួលស្មានថា គ្រោះថ្នាក់ចរាចរណ៍បាននាំគ្នាមកជួយភ្លាមៗនោះដែរស្រាប់តែឃើញជនបង្កមានដាវហើយជិះទៅមុខបាត់ទៅ ។
បើតាមសំដីជនរងគ្រោះបាននិយាយថា គាត់មិនដែលមានទំនាស់ជាមួយជនដៃដល់ទេ ហើយគាត់បានបញ្ជាក់ទៀតថា រូបគាត់ទើបចេញពីធ្វើការនៅការ៉ាស់រថយន្តនៅម្តុំកន្លែងលក់សាច់ក្រក ខណៈជិះម៉ូតូមកដល់ចំណុចខាងលើស្រាប់តែមានជនមិនស្គាល់មុខខាងលើកាប់គាត់តែម្តង ។
ក្រោយពេលកើតហេតុបន្ទាប់ពីប្រជាពលរដ្ឋនាំជនរងគ្រោះទៅព្យាលនៅមន្ទីរពេទ្យ សុខា កំបូល ហើយជនរងគ្រោះរងរបួសធ្ងន់ធ្ងរពេកមន្ទីពេទ្យបានបញ្ជូនបន្តទៅព្យាបាលនៅមន្ទីរពេទ្យព្រះកុសុមៈភ្លាមៗផងដែរ ។ ចំណែកសមត្ថកិច្ចកំពុងតែស្រាវជ្រាវករណីខាងលើនេះ ជារឿងគំនុំឬក៏ជាករណីកាប់ប្លន់យកម៉ូតូរង់ចាំជនរងគ្រោះបានធូរស្រាលបន្តិចទៅដាក់ពាក្យបណ្តឹង ៕
ចែករំលែកព័តមាននេះ