រាជធានីភ្នំពេញ ៖ ធនាគារ ABA ដែលជាសមាជិកនៃសម្ពន្ធធនាគារជាតិកាណាដា បានបើកសម្ពោធដាក់ឱ្យដំណើរការជាផ្លូវការឡើងវិញ នូវអគារការិយាល័យកណ្តាល (អគារថ្មី) និងអគារសេវាអតិថិជន កាលពីថ្ងៃទី១៤ មីនា។ពិធីនេះ មានការអញ្ចើញចូលរួមជាកិត្តិយសពីលោក Askhat Ahikhanov នាយកប្រតិបត្តិធនាគារ ABA និង លោក Louis Vachon នាយកប្រតិបត្តិធនាគារជាតិកាណាដា។
លោក Askhat Ahikhanov នាយកប្រតិបត្តិធនាគារ ABA មានប្រសាសន៍ថា៖ « ការបើសម្ពោធជាផ្លូវការនៃអគារការិយាល័យកណ្តាល ដែលបានជួសជុល និងតុបតែងលម្អថ្មីនេះ ជាមួយអគារសេវាអតិថិជនប្រចាំការិយាល័យកណ្តាលដែលស្ថិតនៅចំ ចំណុចបេះដូងនៃរាជធានីភ្នំពេញរបស់យើង»។
លោកបន្តថា អគារដែលយើងទាំងអស់គ្នាកំពុងស្ថិតនៅពេលនេះ បានចាប់ផ្តើមយុគសម័យទំនើបរបស់ធនាគារ ABA កាលពីឆ្នាំ២០១៦ ដែលកាលណោះ វាជាការិយាល័យកណ្តាលផង និងជាសាខាមួយរបស់ ABAផង។ យើងដឹងហើយថា យើងត្រូវវិវឌ្ឍន៍អគារដ៏ទំនើប និងថ្មីមួយនេះ ។ ឥឡូវនេះយើងមានកន្លែងធំទូលាយ សម្រាប់ប្រជុំ ពិភាក្សាការងារ ក៏ដូចជាកិច្ចការ និងសកម្មភាពកម្សាន្ត ដើម្បីប្តូរបរិយាកាសរបស់បុគ្គលិកយើងផងដែរ»។
លោកលើកឡើងថា ការបើកអគារសេវាអតិថិជនប្រចាំការិយាល័យកណ្តាល នៅចំណុចស្តុបត្រង់កែងមហាវិថីព្រះសីហនុ និងផ្លូវ៦៣ បង្កើតឡើងក្នុងគោលបំណងពង្រឹងគុណភាពសេវាអតិថិជនឱ្យប្រសើរឡើង ដើម្បីឆ្លើយតបនឹងកំណើនអតិថិជនដែលបន្តកើនឡើងជាលំដាប់។ អគារសេវាអតិថិជនបានបន្ថែមម៉ោងប្រតិបត្តិការ ព្រមទាំងបើកដំណើរការ៧ថ្ងៃ ក្នុងមួយសប្តាហ៍ និងរយៈពេល១២ម៉ោង ក្នុងមួយថ្ងៃ ដែលនឹងផ្តល់ភាពងាយស្រួលបន្ថែមទៀតដល់អតិថិជន។
លោក Louis Vachon នាយកប្រតិបត្តិធនាគារជាតិកាណាដា មានប្រសាសន៍ថា សមិទ្ធផលនេះ ជានិមិត្តរូបនៃការប្តេជ្ញា ចិត្តដ៏រឹងមាំរបស់សម្ពន្ធ ធនាគារជាតិកាណាដានៅកម្ពុជា។ ការវិនិយោគដំបូងនៅក្នុងធនាគារ ABA បានចាប់ផ្តើមតាំងពីឆ្នាំ២០១៤មក ។
ការបន្តពង្រឹងភាពជាដៃគូ បាននាំឆ្ពោះទៅរកជំហានជោគជ័យដ៏សំខាន់មួយនៅក្នុងឆ្នាំ២០១៦ ជាមួយនឹងលទ្ធកម្មភាគហ៊ុនរហូត៩០% នៅក្នុងធនាគារ ABA។
លោកបន្តថា ៖ «យើងពិតជាមានមោទនភាពដោយធនាគារ ABA បានក្លាយជាផ្នែកមួយនៃសម្ពន្ធធនាគារជាតិកាណាដា ក្នុងការបម្រើសេវាដល់ប្រជាជន ក៏ដូចជាប្រទេសកម្ពុជាទាំងមូល។ ស្ថាប័នទាំងពីរ មានការប្តេជ្ញាចិត្តខ្ពស់ក្នុងការជួយដល់សហគ្រិន និងអាជីវកម្មគ្រួសារ, ផ្តល់សេវាឈានមុខដល់អតិថិជនទាំងអស់, ផ្តល់ដំណោះស្រាយធនាគារបែបឌីជីថលទំនើបឈានមុខ និងរក្សាបទដ្ឋានអភិបាលកិច្ចល្អ»៕
ចែករំលែកព័តមាននេះ