ខេត្តកណ្ដាល ៖ កសិករប្រកបរបរដាំដំណាំបន្លែគ្រប់ប្រភេទនៅបណ្តាស្រុកមួយចំនួនក្នុងខេត្តកណ្តាល កំពុងតែរអ៊ូរទាំគ្រប់ៗគ្នា ដោយសារបន្លែដែលពួកគាត់ផលិតបានហើយ ពិបាករកទីផ្សារ និងធ្លាក់ថ្លៃយ៉ាងគំហុក ធ្វើឲ្យពួកគាត់ជួបការលំបាក និងប៉ះពាល់ដល់សេដ្ឋកិច្ចគ្រួសារ គ្រាដែលពួកគាត់យកប្លង់ដីទៅបញ្ចាំតាមធនាគារ ឬមីក្រូហិរញ្ញវត្ថុ ដើម្បីយកលុយមកធ្វើដើមទុនក្នុងការដាំដុះ ។
កសិករទាំងនោះនិយាយថា ទីផ្សារបន្លែក្នុងស្រុកបានធ្លាក់ថ្លៃពីមួយឆ្នាំទៅមួយឆ្នាំ ដោយសារតែឈ្មួញសម្រុកនាំចូលពីប្រទេសជិតខាងច្រើនលើសលប់ ធ្វើឲ្យពួកគាត់មួយចំនួនខ្លាចរអាលែងហ៊ានដាំ សុខចិត្តទុកដីទំនេរចោល និងនាំគ្នាចំណាកស្រុកទៅធ្វើការនៅក្រៅប្រទេសអស់មួយចំនួន និងមួយចំនួនតូចទៀត ព្រោះតែជំពាក់បំណុលគេច្រើនពេក រត់ទៅបាត់រហូតមិនមកវិញក៏មានដែរ ។
ពួកគាត់ក៏បានសំណូមពរដល់ក្រសួងពាក់ព័ន្ធ មេត្តាជួយរកទីផ្សារដំណាំបន្លែក្នុងស្រុកឲ្យមានតម្លៃសមរម្យផង ដើម្បីឲ្យពួកគាត់មានទឹកចិត្តបន្ដដាំដុះ និងជាប្រភពចំណូលសម្រាប់ដោះស្រាយជីវភាពគ្រួសារ ជាពិសេស ដើម្បីកាត់បន្ថយការធ្វើចំណាកស្រុក ព្រោះពួកគាត់មិនចង់ទៅធ្វើការបែកបាក់ពីក្រុមគ្រួសារឡើយ ។
ពាក់ព័ន្ធនឹងបញ្ហានេះ លោក ប៊ុន ទួនស៊ីបូណា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកណ្តាល បានលើកឡើងថា ទីផ្សារបន្លែធ្លាក់ថ្លៃ នៅពេលរដូវសម្បូរ ។ ដូច្នេះហើយ មន្ទីរចង់ឲ្យពួកគាត់ចងក្រងជាសហគមន៍ និងដាំដុះបន្លែសុវត្ថិភាព និងបន្លែសរីរាង្គវិញ ទើបមានទីផ្សារ និងតម្លៃខ្ពស់ ។
លោកបន្ដថា ៖« ឥឡូវ មានពលរដ្ឋមួយចំនួនហើយដែលផលិតបន្លែសុវត្ថិភាពបាន និងកំពុងមានទីផ្សារ ។ ចំណែកអ្នកដាំបន្លែដែលប្រើសារធាតុគីមី មិនទាន់មានទីផ្សារច្បាស់លាស់ទេ ពិសេសនៅពេលសម្បូរបន្លែច្រើន ទើបធ្លាក់ថ្លៃ ។ ហេតុដូច្នេះ មន្ទីរចង់ឲ្យពួកគាត់ចងក្រងប្រមូលផ្តុំគ្នាជាសហគមន៍ផលិតបន្លែសុវត្ថិភាព ហើយយើងនឹងភ្ជាប់ពួកគាត់ជាមួយទីផ្សារ ដែលនេះជាគោលនយោបាយដោះស្រាយបញ្ហាតម្លៃទីផ្សាររបស់កសិករ » ។
លោកបានបន្ថែមថា ការដាំបន្លែដោយប្រើជីគីមី និងបាញ់ថ្នាំដោយមានសារធាតុគីមី ធ្វើឲ្យពួកគាត់ចំណាយទុនខ្ពស់ ។ ដូច្នេះ មន្ទីរចង់ឲ្យពួកគាត់ងាកមកប្រើជីធម្មជាតិវិញ ហើយប្រើថ្នាំសម្លាប់សត្វល្អិតផ្សំពីរុក្ខជាតិតាមការផ្សព្វផ្សាយណែនាំរបស់មន្ត្រីជំនាញ ដែលវាអាចកាត់បន្ថយទាំងថ្លៃដើមផលិត បន្លែធម្មជាតិមានទីផ្សារ និងមិនប៉ះពាល់ដល់សុខភាពខ្លួនយើងផង ។
លោកក៏សូមអំពាវនាវដល់ប្រជាកសិករដាំបន្លែទាំងអស់ ចូលរួមចងក្រងជាសហគមន៍ផលិតបន្លែសុវត្ថិភាព និងបន្លែសរីរាង្គ ដើម្បីលើកតម្កើងជីវភាពគ្រួសារ និងសុខភាពទាំងខ្លួនឯង និងអ្នកបរិភោគ ៕
ចែករំលែកព័តមាននេះ