ខេត្តកំពត ៖ ស្ពានឥន្ទធនូ ឬស្ពានចាស់ដែលបណ្ដែតខ្លួនលើព្រែកកំពតតាំងពីសម័យអាណានិគមបារាំងនោះ បច្ចុប្បន្នមានសភាពទ្រុឌទ្រោមណាស់ទៅហើយ ។ ទោះជាយ៉ាងនេះក្ដី រាជរដ្ឋាភិបាលមិនបណ្ដោយឲ្យស្ពានប្រវត្តិសាស្ត្រមួយនេះបាត់បង់នោះទេ ដោយគ្រោងនឹងជួសជុលកែលម្អឡើងវិញនាពេលឆាប់ៗខាងមុខ ។ បន្ទាប់ពីជួសជុលរួច ស្ពាននេះនឹងចូលរួមចំណែកកាត់បន្ថយការកកស្ទះចរាចរណ៍ កាត់បន្ថយពេលវេលាធ្វើដំណើរ និងជួយទាក់ទាញភ្ញៀវទេសចរមកទស្សនាទឹកដីកំពតកាន់តែកើនឡើងថែមទៀត ។ នេះបើតាមលោកអភិបាលខេត្តកំពតបានបញ្ជាក់ប្រាប់កោះសន្តិភាពកាលពីពេលថ្មីៗនេះ ។
លោក ជាវ តាយ អភិបាលខេត្ត បានថ្លែងតាមទូរស័ព្ទថា ស្ពានឥន្ទធនូ ឬហៅថាស្ពានចាស់នេះ មានប្រវែងជាង៣០០ម៉ែត្រ ឆ្លងកាត់ព្រែកដៃសមុទ្រក្នុងក្រុងកំពត នឹងត្រូវជួសជុលឡើងវិញ ដោយមិនអាចទុកឲ្យនៅទ្រុឌទ្រោមបែបនេះទៀតឡើយ ។
លោកថ្លែងយ៉ាងដូច្នេះថា ៖« ពាក់ព័ន្ធនឹងស្ពាននេះ ខ្ញុំបានទាក់ទងទៅខាងបារាំងដែលមានជំនាញឲ្យមកពិនិត្យមើលរួចរាល់ហើយថា អាចជួសជុលតាមរបៀបណា ដោយរក្សាភាពដើម ត្រូវឲ្យគេបញ្ជាក់ឲ្យបានច្បាស់ ហើយខេត្តក៏មិនទុកឲ្យស្ពាននៅបែបនេះដែរ គឺត្រូវតែធ្វើឡើងវិញ ដើម្បីជួយសម្រួលក្នុងការធ្វើដំណើររបស់ប្រជាពលរដ្ឋ » ។
លោកអភិបាលខេត្តបន្តថា បច្ចុប្បន្ន ស្ពាននេះនៅបើកឲ្យឆ្លងកាត់ជាធម្មតា ប៉ុន្តែសម្រាប់តែម៉ូតូ កង់ និងអ្នកថ្មើរជើងប៉ុណ្ណោះ ។ បើវាទ្រុឌទ្រោមខ្លាំង យើងនឹងបិទមិនឲ្យធ្វើដំណើរឆ្លងកាត់ទៀតឡើយ ។ ស្ពាននេះបានជួយសម្រួលដល់ប្រជាពលរដ្ឋក្នុងការធ្វើដំណើរទៅប្រកបការងារ ឬកម្សាន្តប្រចាំថ្ងៃ ។
ទោះជាយ៉ាងនេះក្ដី ខេត្តមិនទាន់ប្រាប់ច្បាស់ថា នឹងចាប់ផ្ដើមជួសជុលស្ពានមួយនេះនៅពេលណាឡើយ ពីព្រោះអ្នកពាក់ព័ន្ធកំពុងតែពិនិត្យថា គួរធ្វើបែបណាមុន ជាមួយអ្នកជំនាញ ។ នេះបើតាមលោកអភិបាលខេត្តបានបញ្ជាក់ ។
ស្ពានឥន្ទធនូបានសាងសង់ឡើងនៅឆ្នាំ១៩២២ គ្រាដែលបារាំងត្រួតត្រាស្រុកខ្មែរ ប៉ុន្តែក្រោយមក ត្រូវបានខ្មែរក្រហមដាក់មីនបំផ្លាញអស់មួយផ្នែកធំនៅសម័យសង្គ្រាមក្នុងទសវត្សរ៍ឆ្នាំ១៩៧០ ហើយបានជួសជុលឡើងវិញនៅទសវត្សរ៍ឆ្នាំ១៩៨០ ដោយក្រាលដែកបន្ទះ ។
រហូតដល់ថ្ងៃទី២៤ ខែកុម្ភៈ ឆ្នាំ២០១៥ អាជ្ញាធរខេត្តបានបិទស្ពានចាស់នេះជាបណ្ដោះអាសន្ន ព្រោះខ្លាចអ្នកធ្វើដំណើរឆ្លងកាត់មានគ្រោះថ្នាក់ ។ ក្រោយមក នៅក្នុងពិធីសំណេះសំណាលជាមួយមន្ត្រីរាជការ និងកងកម្លាំងប្រដាប់អាវុធគ្រប់លំដាប់ថ្នាក់នៅខេត្តកំពត កាលពីថ្ងៃទី២ ខែសីហា ឆ្នាំ២០១៦ ប្រមុខរាជរដ្ឋាភិបាលបានបញ្ជាឲ្យជួសជុលជាថ្មី ។
រហូតមកដល់បច្ចុប្បន្ន ស្ពាននេះក៏មានការជួសជុលបានមួយចំនួន ដោយមានក្រាលដែកបន្ទះ និងបាំងរនាំងដែកនៅសងខាងស្ពាន ដើម្បីការពារអ្នកធ្វើដំណើរឆ្លងកាត់ពីគ្រោះថ្នាក់ផ្សេងៗ ។
បើតាមប្រធានមន្ទីរទេសចរណ៍ខេត្តកំពត បានឲ្យដឹងដែរថា បន្ទាប់ពីជួសជុលកែលម្អរួច ស្ពាននេះនឹងផ្ដល់ផលប្រយោជន៍ច្រើនដល់ប្រជាពលរដ្ឋក្នុងខេត្ត និងរួមចំណែកទាក់ទាញភ្ញៀវទេសចរមកទស្សនាកម្សាន្ដនៅទឹកដីខេត្តកំពតមានកំណើនថែមមួយកម្រិតទៀត ។
ថ្លែងតាមទូរស័ព្ទនាព្រឹកថ្ងៃទី១២ មីនា ម្សិលមិញ លោក សយ ស៊ីណុល បានលើកឡើងថា ការជួសជុលស្ពានចាស់មួយនេះឡើងវិញ វាជារឿងមួយល្អ ព្រោះសព្វថ្ងៃ ស្ពានប្រវត្តិសាស្ត្រមួយនេះកំពុងស្ថិតនៅក្នុងស្ថានភាពទ្រុឌទ្រោម ដែលអាជ្ញាធរអនុញ្ញាតឲ្យតែម៉ូតូ កង់ និងអ្នកថ្មើរជើងធ្វើដំណើរប៉ុណ្ណោះ ។
លោកថ្លែងថា ៖« បើស្ពាននេះជួសជុលឡើងវិញ គឺបានជួយសម្រួលចរាចរណ៍ក្នុងការធ្វើដំណើរកាន់តែប្រសើរឡើង ហើយស្ពានមួយខ្សែនេះ មិនត្រឹមអាចជួយសម្រួលការធ្វើដំណើរនោះទេ វាជាស្ពានប្រវត្តិសាស្ត្រប្រចាំខេត្ត ដែលបានទាក់ទាញភ្ញៀវទេសចរមកកម្សាន្តនៅទឹកដីខេត្តកំពត ពិសេសនៅតាមដងព្រែកកំពង់បាយនេះមានកំណើនថែមមួយកម្រិតទៀត។ ម្យ៉ាងទៀត បើសិនជាការជួសជុលនោះ គេរក្សានូវទម្រង់ដើមនៃស្ពានបានល្អប្រសើរមែន អីចឹង វាអាចនឹងរក្សាអាយុកាលបានយូរឆ្នាំទៅមុខទៀត ហើយកាន់តែបន្ថែមសោភ័ណភាពដល់ស្ពានប្រវត្តិសាស្ត្រមួយនេះនៅលើទឹកដីខេត្តកំពត» ។
លោកបញ្ជាក់ថា ៖« សព្វថ្ងៃនេះ ស្ពានឥន្ទធនូ បានជួយសម្រួលដល់ស្ពានថ្មីបានខ្លះដែរ នៅពេលមានបុណ្យទានម្ដងៗ ព្រោះភ្ញៀវភាគច្រើនឆ្លងកាត់តាមស្ពានទាំងពីរនេះដើម្បីទៅកម្សាន្តនៅតាមតំបន់ឆ្នេរ » ។
យ៉ាងណាក៏ដោយ បន្ទាប់ពីស្ពាននេះជួសជុលកែលម្អរួច លោកមិនបានប្រាប់ថា តើគេអាចឲ្យរថយន្ដ ឬរុឺម៉កដឹកទំនិញឆ្លងកាត់កម្រិតណានោះទេ តែយ៉ាងហោចណាស់ ក៏អាចរក្សាតម្លៃស្ពានមួយនេះដែរ ព្រោះវាជាស្ពានប្រវត្តិសាស្ត្រ ៕
ចែករំលែកព័តមាននេះ