រាជធានីភ្នំពេញ ៖ អតីតតារាសម្តែងលោកថៃ នរៈពិទូ បានបង្ហាញមុខជាសាធារណៈជាថ្មី បន្ទាប់ពីរងការចោទប្រកាន់ពាក់ព័ន្ធទៅនឹងគ្រឿងញៀន ត្រូវសមត្ថកិច្ចឃាត់ខ្លួនកាលពីអំឡុងដើមឆ្នាំ២០១៧ នៅខេត្តបាត់ដំបងទីដែលលោកបានបង្កើតមុខរបរបើកក្លឹបកម្សាន្តមួយ។
លោកថៃ នរៈពិទូ មានវត្តមានជាមួយឪពុករបស់លោក ក្នុងទិវាវប្បធម៌ជាតិនៅកោះពេជ្រ កាលពីល្ងាចថ្ងៃទី៦ ខែមិនា ឆ្នាំ២០១៨ ។
ការបង្ហាញមុខជាសាធារណៈ និងលើកដំបូងក្រោយជួបរឿងអាស្រូវរបស់ថៃ នរៈពិទូ នាពេលនេះបានធ្វើឲ្យមានការភ្ញាក់ផ្អើលខ្លាំងពីស្រទាប់មហាជន ក្រោយពេលលោកត្រូវសមត្ថកិច្ចឃាត់ខ្លួនពាក់ព័ន្ធនឹងគ្រឿងញៀន ។
រូបភាពមួយសន្លឹកដែលមានវត្តមានរបស់លោកថៃ នរៈពិទូ ចូលរួមក្នុងពិធីនោះត្រូវឪពុករបស់លោកបង្ហោះតាមហ្វេសប៊ុក ក្នុងពេលដែលមានការចោទសួរថា អតីតហ្វ្រេស៊ីរូបនេះបានរួចផុតពីការចោទប្រកាន់ទោសតាំងពីពេលណាមក ។
តាមការអង្កេតពីមជ្ឈដ្ឋាននានាដែលបានចូលរួមក្នុងពិធីនោះបង្ហើបឲ្យដឹងថា ថៃ នរៈពិទូ ហាក់បង្ហាញភាពស្ងៀមស្ងាត់មិនញញឹមញញែមច្រើនឡើយ សូម្បីតែការចេញទទួលរាក់ទាក់ជាមួយមិត្តភក្កិក្នុងចង្កោមសិល្បៈដូចគ្នាក៏គ្មានដែរ ។
ការបង្ហាញមុខជាថ្មីរបស់ថៃ នរៈពិទូ ត្រួវគេសន្និដ្ឋានបានថា អតីតតារាសម្តែងរូបនេះពិតជាបានរួចផុតពីទោស ហើយទំនងជាអាចនឹងចាប់ផ្តើមអាជីពសិល្បៈជាថ្មីឡើងវិញ។
ជុំវិញបញ្ហានេះទាំងថៃ នរៈពិទូ និងក្រុមគ្រួសាររបស់លោកនៅមិនទាន់ឃើញបញ្ជាក់ព័ត៌មានលម្អិតនៅឡើយទេ ខណៈពេលដែលការសាកសួរពីអ្នកសារព័ត៌មាននាពេលនោះគឺមិនអាចធ្វើឡើងបាន ។
អតីតតារាសម្តែង និងជាអតីតហ្វ្រេស៊ីលេខ១ ថៃ នរៈពិទូ បានបង្កើតឲ្យមានការភ្ញាក់ផ្អើលជាថ្មី ក្រោយតារារូបនេះ និងបក្សពួកមួយចំនួនទៀតត្រូវសមត្ថកិច្ចខេត្តបាត់ដំបងចាប់ខ្លួនព្រោះតែមានការពាក់ព័ន្ធនឹងករណីជួញដូរថ្នាំញៀន ។ ក្រៅពីលោកក៏មានភរិយាគឺអ្នកនាងអោករតនៈប៉ុណ្ណិកា និងបក្សពួកមួយចំនួនទៀតផងដែរដែលត្រូវបានសមត្ថកិច្ចឃាត់ខ្លួន ។ ការចាប់ខ្លួននេះនៅរសៀលថ្ងៃទី១០ ខែមករា ឆ្នាំ២០១៧ នៅហាងខារ៉ាអូខេមួយដោយរកឃើញថាពួកគេបានប្រើប្រាស់ រក្សាទុក និងជួញដូរសារធាតុញៀន ៕
ចែករំលែកព័តមាននេះ