រាជធានីភ្នំពេញ ៖ មន្ត្រីក្រសួងសាធារណការ និងដឹកជញ្ជូន បានបញ្ជាក់ជាថ្មីថា នៅមុនបុណ្យចូលឆ្នាំខ្មែរខាងមុខនេះ ស្ថានីយដឹកអ្នកដំណើរតាមផ្លូវទឹកចំនួន៦កន្លែង នឹងដាក់ឱ្យដំណើរការសាកល្បង ខណៈពេលនេះ ក្រុមការងារជំនាញកំពុងមមាញឹក ធ្វើយ៉ាងណាសម្រេចឲ្យបានតាមផែនការគ្រោងទុក ។
លោក វ៉ា ស៊ឹមសុរិយា មន្ត្រីអ្នកនាំពាក្យក្រសួងសាធារណការ និងដឹកជញ្ជូន មានប្រសាសន៍កាលពីថ្ងៃទី៥ មីនា ម្សិលមិញថា គម្រោងដឹកអ្នកដំណើរតាមផ្លូវទឹកពីព្រែកព្នៅ ទៅក្រុងតាខ្មៅ នឹងដាក់ឱ្យដំណើរការសាកល្បងនៅមុនបុណ្យចូលឆ្នាំខ្មែរ តែពុំទាន់កំណត់ច្បាស់លាស់ថា នៅថ្ងៃណានោះទេ ដោយសារពុំមានរបាយការណ៍លម្អិតនៅឡើយ គ្រាន់តែដឹងថាស្ថានីយឬចំណតទូកនីមួយៗ ក្រុមការងារជំនាញកំពុងមមាញឹកធ្វើការសាងសង់ ។
លោក វ៉ា ស៊ឹមសុរិយា មានប្រសាសន៍ថា ៖« ទូកយើងបានកុម្មង់ ឬអាចជួលនៅក្នុងរយៈពេលណាមួយ ហើយពេលនេះ ថ្នាក់ដឹកនាំកំពង់ផែភ្នំពេញកំពុងតែកុម្មង់ ។ អីចឹង យើងអត់ទាន់មានរបាយការណ៍រួមបង្ហាញឱ្យលម្អិត ប៉ុន្តែក្រសួងបានកំណត់ថា នឹងដាក់ដំណើរការដឹកអ្នកដំណើរ ឲ្យបានមុនបុណ្យចូលឆ្នាំខ្មែរខាងមុខ ជាមួយស្ថានីយឬចំណតទូក៦កន្លែង មានដូចជា ចំណតស្ពានព្រែកព្នៅ, ចំណតទូកជិតទីលានប្រជាធិបតេយ្យថ្មី, ផែភ្នំពេញ, ផែអរិយក្សត្រ, ម្តុំស្ពានព្រះមុនីវង្ស និងនៅស្ពានតាខ្មៅ » ។
ទីប្រឹក្សាជាន់ខ្ពស់ផ្នែកសេដ្ឋកិច្ច នៃក្រុមហ៊ុន Emerging Market Consulting លោក ង៉ែត ជូ ធ្លាប់មានប្រសាសន៍ថា ៖« គម្រោងដឹកអ្នកដំណើរតាមផ្លូវទឹកនេះ វានឹងផ្តល់ជាជម្រើសថ្មីសម្រាប់អ្នកដែលចង់ធ្វើដំណើរតាមផ្លូវទឹក ។ប៉ុន្តែបើវាជាដំណោះស្រាយពិត គម្រោងដឹកជញ្ជូនអ្នកដំណើរតាមផ្លូវទឹកនេះជាជម្រើសល្អ។ ក្នុងករណីការធ្វើដំណើរតាមផ្លូវគោកនៅពេលខាងមុខ បើសកម្មភាពធ្វើដំណើរកាន់តែពិបាក ចំណាយពេលច្រើននោះ ប្រជាពលរដ្ឋនឹងផ្លាស់ប្តូរឥរិយាបថនៃការធ្វើដំណើររបស់ខ្លួន ព្រោះអ្នកធ្វើដំណើរតែងតែចង់បានការធ្វើដំណើរមានភាពងាយស្រួលគ្រប់ពេល » ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ធ្លាប់មានប្រសាសន៍ថា ៖«គម្រោងដឹកជញ្ជូនអ្នកដំណើរតាមផ្លូវទឹកនេះ ជាសក្តានុពលនៃការអភិវឌ្ឍវិស័យដឹកជញ្ជូនអ្នកដំណើរតាមផ្លូវទឹក ពិសេសបណ្តាញទន្លេដែលហូរកាត់ក្នុងភូមិសាស្ត្ររាជធានីភ្នំពេញ និងការពង្រីកវិស័យនេះឱ្យបានទូលំទូលាយ ប្រកបដោយចីរភាព ដើម្បីបញ្ចៀសការកកស្ទះចរាចរណ៍ ក៏ដូចជាគ្រោះថ្នាក់ចរាចរណ៍ផងដែរ» ។
គម្រោងដឹកអ្នកដំណើរតាមផ្លូវទឹកនេះ បើតាមក្រសួងសាធារណការ និងដឹកជញ្ជូន រាជរដ្ឋាភិបាលកំពុងរៀបចំកំពង់ផែ ចំណតកាណូតដឹកអ្នកដំណើរចំនួន១៥ទីតាំង ក្នុងនោះរាជធានីភ្នំពេញមាន ៖ ១-គល់ស្ពានព្រែកព្នៅត្រើយខាងកើត (កំពុងពិចារណា), ២-គីឡូម៉ែត្រលេខ៦, ៣-ខាងមុខឃ្លាំងសាំងឫស្សីកែវ ជាប់នឹងទីលានប្រជាធិបតេយ្យថ្មី, ៤-ផែបណ្ដែតមុខផ្សាររាត្រី, ៥-កំពង់ចម្លងកោះពេជ្រ-អារីយក្សត្រ, ៦-ភូមិដើមចាន់ ឬគល់ស្ពានក្បាលថ្នល់ខាងកើត, ៧-ចំណតរថយន្តចាក់អង្រែក្រោម, ៨-បាក់ខែង ត្រង់ផ្លូវបំបែកលី យ៉ុងផាត់, ៩-ទល់មុខផ្សារព្រែកលៀប (កំពង់ចម្លងព្រែកលៀប), ១០-ជាប់សណ្ឋាគារសុខាភ្នំពេញ, ១១-ភូមិកោះនរា, ១២-កំពង់ចម្លងក្តីតាកុយ, ១៣-កំពង់ចម្លងតាព្រហ្មមាត់ក្រសះ ។ ចំណែកនៅខេត្តកណ្តាលមាន ៖ ១-មុខវត្តព្រែកសំរោង ក្រុងតាខ្មៅ (កំពុងពិចារណា) និង២-កំពង់ចម្លងរោងចក្រក្តារបន្ទះផ្លូវត្រី ។
គួររំឭកថា កាលពីដើមខែកុម្ភៈ ឆ្នាំ២០១៧ រដ្ឋបាលរាជធានីភ្នំពេញ បានប្រជុំលើគម្រោងនៃការបង្កើតឱ្យមានកប៉ាល់ដឹកជញ្ជូនអ្នកដំណើរតាមដងទន្លេចេញ-ចូល ភ្នំពេញ-ក្រុងតាខ្មៅ ដើម្បីកាត់បន្ថយការកកស្ទះចរាចរណ៍ ។
បើតាមគម្រោងនេះ នឹងមានកប៉ាល់ល្បឿនលឿនប្រមាណ២០គ្រឿងដាក់ឱ្យដំណើរការតាមផ្លូវទឹកនេះ ។ គម្រោងនោះ នឹងដឹកអ្នកដំណើរតាមចំណតដែលនឹងមាននៅតាមទន្លេសាប ទន្លេចតុមុខ ទន្លេបាសាក់ ចាប់ពីស្ពានព្រែកព្នៅ ខណ្ឌព្រែកព្នៅ រហូតមកដល់រាជធានីភ្នំពេញ និងបន្តដល់ក្រុងតាខ្មៅ ខេត្តកណ្ដាល ។ ការផ្ដល់សេវា បើតាមគម្រោង នឹងចាប់ផ្ដើមពីម៉ោង៦ព្រឹក ដល់ម៉ោង៨យប់ ដែលមានចម្ងាយធ្វើដំណើរជាង២៤គីឡូម៉ែត្រ ។
គម្រោងនេះក៏មានការគាំទ្រពីប្រមុខរាជរដ្ឋាភិបាលផងដែរ ដើម្បីរួមចំណែកកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ ។
សម្តេចតេជោ ហ៊ុន សែន បានលើកឡើងកន្លងមកថា ការផ្តួចផ្តើមឲ្យមានការដឹកជញ្ជូនតាមផ្លូវទឹកពីព្រែកព្នៅ មកភ្នំពេញ ហើយទៅកាន់ក្រុងតាខ្មៅ ដោយមានផែចំណតច្រើន គឺជាគំនិតផ្តួចផ្តើមដោះស្រាយបញ្ហាដឹកជញ្ជូន ។
សម្តេចថ្លែងថា ៖« គ្រាន់តែប៉ុណ្ណឹង យើងឃើញថា ការគិតគូរទៅលើស្មារតីនៃការទទួលខុសត្រូវសម្រាប់ដោះស្រាយការកកស្ទះចរាចរណ៍ វាជាផ្នែកដ៏សំខាន់ ។ បើសិនធ្វើដំណើរតាមរថយន្តពីតាខ្មៅ ឆ្លងកាត់ក្រុងភ្នំពេញ ការធ្វើដំណើរអាចប្រើប្រាស់ពេលវេលាយូរជាងការធ្វើដំណើរតាមផ្លូវទឹក ។ ចាំមើលចុះ អាចនឹងមានប្រជាពលរដ្ឋធ្វើដំណើរកម្សាន្តលេងច្រើន ហើយនេះក៏អាចបង្កើតបានការងារធ្វើនៅតាមបណ្តាកំពង់ផែនានា ដែលធ្វើឱ្យមានការរីកលូតលាស់នៃសេដ្ឋកិច្ចក្រៅប្រព័ន្ធថែមទៀត » ៕
ចែករំលែកព័តមាននេះ