រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខឥសានបានអះអាងថា ក្រោយកិច្ចព្រមព្រៀងទីក្រុងប៉ារីសថ្ងៃទី២៣ ខែតុលា ឆ្នាំ១៩៩១ រាជរដ្ឋាភិបាលកម្ពុជា ដែលកើតចេញពីការបោះឆ្នោតចាប់ពីឆ្នាំ១៩៩៣មក តែងតែខិតខំអនុវត្តការដឹកនាំ តាមគោលការណ៍លទ្ធិប្រជាធិបតេយ្យ និងនីតិរដ្ឋ ។
លោកសុខឥសានបានឲ្យដឹងនៅថ្ងៃទី០៥ ខែមីនា ឆ្នាំ២០១៨ តាមប្រព័ន្ធតេឡេក្រាមថា អ្នកដែលបានប្រព្រឹត្តល្មើសច្បាប់ ត្រូវទទួលខុសត្រូវចំពោះមុខច្បាប់ ដោយមិនថា ជាអ្នកនយោបាយ ឬមិនមែនជាអ្នកនយោបាយឡើយ ។ ក៏ប៉ុន្តែគេកត់សម្គាល់ឃើញថា បើមានពាក់ព័ន្ធនឹងអ្នកនយោបាយ ជាពិសេសអ្នកនយោបាយប្រឆាំងជនបរទេស និងរដ្ឋាភិបាលបរទេស តែងតែលូកដៃចូលមកជ្រៀតជ្រែក ដោយយកពាក្យសិទ្ធិមនុស្ស និងលទ្ធិប្រជាធិបតេយ្យ មកបិទបាំងពីមុខជានិច្ច ។
លោកបញ្ជាក់ថា «ដើម្បីការពារ និងចង់ដោះបន្ទុកពួកអាយ៉ងរបស់គេប្រទេសមួយចំនួនបានដាក់សម្ពាធ និងកាត់ជំនួយមួយចំនួនមកឲ្យប្រទេសកម្ពុជា និងប្រើប្រាស់បណ្តាញ របស់គេឲ្យឃោសនាបំប៉ោងបំផ្លើស សភាពការណ៍ដាក់កំហុស និងបំផ្លើសការពិតបំភាន់សាធារណៈ មតិជាតិ និងអន្តរជាតិឲ្យយល់ច្រឡំ យ៉ាងអយុត្តិធម៌ មកលើរាជរដ្ឋាភិបាលកម្ពុជា » ។
អ្នកនាំពាក្យកាន់អំណាចលើកឡើងទៀតថា ត្រង់ពួកប្រឆាំងប្រព្រឹត្តល្មើសច្បាប់ និងបំពានច្បាប់ ពួកគេមិនលើកមកនិយាយផងទេ ដូចជា ៖ លោក កឹម សុខា បានឃុបឃិតជាមួយបរទេស យកផែនការបរទេសមកអនុវត្តផ្តួលរំលំរាជរដ្ឋាភិបាលកម្ពជា គេគ្រាន់តែថា ជាការបញ្ចេញមតិអហិង្សាហេតុម៉េចចាប់គេ ។
លោក យាង សុជាមេត្តា និងអួន ឈឹន ភ្នាក់ងារវិទ្យុអាស៊ីសេរី លួចផ្តល់ព័ត៌មានខុសច្បាប់ បញ្ជូនចេញពីកម្ពុជាទៅឲ្យរដ្ឋបរទេស និងធ្វើសកម្មភាពថតវីដេអូអាសអាភាស ដើរតួខ្លួនឯង គេនៅតែបំពាននិយាយថា ជាសិទ្ធិយកព័ត៌មាន ចាប់ពួកគេដោយបំពាន ។ វិទ្យុក្នុងស្រុកមួយចំនួនមិនគោរព និងអនុវត្តតាមកិច្ចសន្យា ជាមួយក្រសួងព័ត៌មាន ត្រូវព្យួរការផ្សាយគេចោទថា រិតត្បិតសេរីភាពព័ត៌មាន និងអង្គការមិនមែនរដ្ឋាភិបាលមួយចំនួន មិនអនុវត្តតាមលក្ខន្តិកៈ ត្រូវទទួលការរំលឹក ដាស់តឿនពីស្ថាប័នមានសមត្ថកិច្ច គេថា គំរាមកំហែងយារយីគេ ។
លោកសុខឥសានបានគូសបញ្ជាក់ថា ការចោទប្រកាន់ខាងលើនេះឆ្លុះបញ្ចាំង ឲ្យឃើញថា ក្រុមមជ្ឈដ្ឋានប្រឆាំង ពិតជាមិនទទួលស្គាល់ការពិតនៃទង្វើខុសច្បាប់របស់ខ្លូន និងបក្សពួកខ្លួននោះឡើយ ហើយបែរជាមកបំភាន់មតិ សាធារណៈមួលបង្កាច់មកលើរាជរដ្ឋាភិបាលកម្ពុជាទៅវិញ ។ នេះហើយជាចរិតលូកដៃចូលកិច្ចការផ្ទៃក្នុងកម្ពុជា ដែលជារដ្ឋឯករាជ្យ និងមានអធិបតេយ្យមួយ ។
ការលើកឡើងរបស់អ្នកនាំពាក្យគណបក្សកាន់អំណាចនេះ ស្របពេលស្ថានការណ៍កំពុងកើតមានឡើងនៅកម្ពុជា ដូចជាអាមេរិក សហគមន៍អឺរ៉ុប បានព្រមានដាក់ទណ្ឌសេដ្ឋកិច្ចនៅកម្ពុជាតាមការស្នើសុំពីក្រុមអតីតបក្សសង្គ្រោះជាតិ ដែលកំពុងរស់នៅក្រៅប្រទេស ៕
ចែករំលែកព័តមាននេះ