ខេត្តព្រះសីហនុ ៖ ការដ្ឋានសំណង់ចិនដ៏ធំមួយ នៅឆ្នេរសមុទ្រអូរឈើទាលចំណុចអតីតបន្ទាយកងរាជអាវុធហត្ថខេត្ត ស្ថិតក្នុងសង្កាត់លេខ៤ ក្រុងព្រះសីហនុ ត្រូវបានរុះរើនិងដឹកគ្រឿងចក្រចេញទាំងតក់ក្រហល់បំផុត តាមបញ្ជាយ៉ាងម៉ឺងម៉ាត់របស់សម្តេចតេជោនាយករដ្ឋមន្ត្រី ហ៊ុន សែន…
ខេត្តព្រះសីហនុ ៖ ការដ្ឋានសំណង់ចិនដ៏ធំមួយ នៅឆ្នេរសមុទ្រអូរឈើទាលចំណុចអតីតបន្ទាយកងរាជអាវុធហត្ថខេត្ត ស្ថិតក្នុងសង្កាត់លេខ៤ ក្រុងព្រះសីហនុ ត្រូវបានរុះរើនិងដឹកគ្រឿងចក្រចេញទាំងតក់ក្រហល់បំផុត តាមបញ្ជាយ៉ាងម៉ឺងម៉ាត់របស់សម្តេចតេជោនាយករដ្ឋមន្ត្រី ហ៊ុន សែន កាលពីព្រឹកថ្ងៃទី៣ ខែមីនា កន្លងមកនេះ ។ ជាការពិតណាស់ បទបញ្ជារបស់សម្តេចតេជោនាយករដ្ឋមន្ត្រី ទើបអាចធ្វើឱ្យអ្វីៗប្រែប្រួលបាន បើកុំតែមានប្រតិកម្មពីសម្តេចតេជោ ប្រហែលជាគ្មានអាជ្ញាធរណាហ៊ានប៉ះពាល់ឡើយ ។
មន្ត្រីសាលាខេត្តមួយរូបបាននិយាយក្នុងលក្ខខណ្ឌមិនបញ្ចេញឈ្មោះ ប្រាប់អ្នកយកព័ត៌មានថា សម្តេចតេជោ បានអញ្ជើញមកខេត្តព្រះសីហនុដើម្បីជួបសំណេះសំណាលជាមួយកម្មករកម្មការិនីនៅតំបន់សេដ្ឋកិច្ចពិសេស ក្នុងឃុំបិតត្រាំង ស្រុកព្រៃនប់ នៅថ្ងៃទី៣និងទី៤ ខែមីនា ។ ខណៈសម្តេចតេជោ ដើរកម្សាន្តតាមឆ្នេរសមុទ្រអូរឈើទាល បានប្រទះឃើញមានការដ្ឋានសំណង់ដ៏ធំមួយហ៊ុមព័ទ្ធរបងជុំជិតរំលោភលើតំបន់ឆ្នេរ មិនឱ្យប្រជាពលរដ្ឋ ភ្ញៀវទេសចរជាតិ និងអន្តរជាតិធ្វើដំណើរឆ្លងកាត់ទេ ។ ភ្លាមនោះ សម្តេចបានហៅលោកអភិបាលក្រុងព្រះសីហនុមកជួប និងបញ្ជាឱ្យរុះរើរបងហ៊ុមព័ទ្ធការដ្ឋានសំណង់ខាងលើនោះ និងឱ្យដឹកគ្រឿងចក្រចេញឱ្យអស់ជាបន្ទាន់ទាន់សម្តេចនៅចាំមើល ដោយហេតុថាដីឆ្នេរសមុទ្រជាសម្បត្តិសាធារណៈរបស់រដ្ឋ ទុកឱ្យពលរដ្ឋខ្មែរក៏ដូចជាភ្ញៀវទេសចរជាតិ-អន្តរជាតិមកលេងកម្សាន្ត ។
កន្លងមក អាជ្ញាធរក្រុងក៏ធ្លាប់បានចេញសេចក្តីជូនដំណឹងដល់ក្រុមហ៊ុន លី ឡាយ ដែលជាក្រុមហ៊ុនកំពុងដំណើរការសាងសង់ក្នុងការដ្ឋានខាងលើឱ្យផ្អាកការសាងសង់និងរុះរើរបងហ៊ុមព័ទ្ធការដ្ឋានចេញវិញដែរ ប៉ុន្តែក្រុមហ៊ុននេះហាក់នៅមានការស្ទាក់ស្ទើរ ទើបពេលនេះអាជ្ញាធរក្រុងដឹកនាំកម្លាំងចម្រុះចុះរុះរើរបងហ៊ុមព័ទ្ធការដ្ឋានសំណង់នោះអស់នៅព្រឹកថ្ងៃទី៣ ខែមីនា គឺរុះរើចេញម៉ដ្ឋដូចអាចម៍ទីទុយ…ស្អីអ្នកឯងខ្លាំង ?!
ពាក់ព័ន្ធនឹងករណីខាងលើនេះ លោក អុី សុខឡេង អភិបាលក្រុងព្រះសីហនុ បានបញ្ជាក់នៅក្នុងសេចក្តីជូនដំណឹងថា នេះជាសំណង់ដែលមិនមានច្បាប់ទម្លាប់គឺបានសេចក្តីថាអត់ច្បាប់ ។ប្រជាពលរដ្ឋនិងមន្ត្រីរាជការនៅខេត្តព្រះសីហនុ ក៏ដូចជាភ្ញៀវទេសចរជាតិ-អន្តរជាតិដែលបានឃើញសកម្មភាពរបស់អាជ្ញាធរក្រុងព្រះសីហនុ ចុះរុះរើរបងការដ្ឋានខាងលើ បន្ទាប់ពីទទួលបានបទបញ្ជារបស់សម្តេចតេជោ បានសម្តែងនូវការគាំទ្រចំណាត់ការកណ្តាប់ដែករបស់សម្តេចពេញទំហឹង ព្រមទាំងដៀមដាមថា ចៅហ្វាយក្រុងអន់សមត្ថភាព ។ បើមិនដូច្នេះទេតំបន់ឆ្នេរសមុទ្រនៅខេត្តព្រះសីហនុ នឹងត្រូវបាត់បង់ជាបណ្តើរៗដោយសារតែអ្នកមានប្រាក់ អាងអំណាច រំលោភយកទៅធ្វើជាកម្មសិទ្ធិឯកជន ព្រមទាំងសង់អត់ច្បាប់ទៀត អ្នកណាហ៊ានធើអីអញ ?
ប្រជាពលរដ្ឋនៅខេត្តព្រះសីហនុ សំណូមពរដល់សម្តេចតេជោ បន្តចំណាត់ការខាងលើបន្ថែមទៀតដោយហេតុថា នៅមានឆ្នេរឯករាជ្យនិងឆ្នេរជ័យជំនះ ខាងមុខអង្គភាពកាំសាបក្បែរសាលាខេត្ត ស្ថិតក្នុងសង្កាត់លេខ៣ ក្រុងព្រះសីហនុ ដែលពីមុនមកមានអ្នកមានអំណាចនិងមានប្រាក់ បានសាងសង់ជាសំណង់សណ្ឋាគារនិងបានហ៊ុមព័ទ្ធរបងស័ង្កសីទុកចោលរាប់ឆ្នាំមកហើយដែរ ។ កន្លងមក អាជ្ញាធរខេត្តបានឲ្យផ្អាកការសាងសង់សំណង់និងរុះរើរបងចេញម្តងហើយដើម្បីឱ្យប្រជាពលរដ្ឋ ក៏ដូចភ្ញៀវទេសចរបានចូលលេងកម្សាន្ត ស្រាប់តែថ្មីៗនេះមានការហ៊ុមព័ទ្ធរបងបេតុងសាជាថ្មី និងបន្តសាងសង់សំណង់ដែលទុកចោលពីមុនឡើងវិញដដែល ។
សកម្មភាពនេះ ធ្វើឱ្យឆ្នេរទាំងពីរកន្លែងខាងលើ ដែលភ្ញៀវទេសចរចូលចិត្តទៅកម្សាន្តមានការថ្នាំងថ្នាក់ក្នុងចិត្ត ដោយសារតែការបាត់បង់តំបន់ឆ្នេរសមុទ្រដែលអន្តរជាតិបានដាក់បញ្ចូលជាសមាជិកក្លិបឆ្នេរសមុទ្រដ៏ស្រស់ស្អាតជាងគេនៅលើសកលលោក និងប្រសិទ្ធនាមថាជាតារារះនាទិសនិរតី ប៉ុន្តែពេលនេះដូចជាជិតអស់ថាមពលសម្រស់ហើយ ព្រោះតែកំពុងត្រូវបានគេនាំគ្នាបំពាន ។ បណ្តាសំណង់ទាំងនោះ អ្នកក្រុងព្រះសីហនុនិយាយថា ទាល់តែបទបញ្ជានាយករដ្ឋមន្ត្រីទៀតហើយ ទើបអាចកម្ចាយបាន ៕
ចែករំលែកព័តមាននេះ