រាជធានីភ្នំពេញ ៖ យុវជន២នាក់ផឹកស្រាអស់២កំប៉ុងខ្ចីម៉ូតូមេការជិះដើរលេងអត់ពាក់មួក ពេលសមត្ថកិច្ចហៅមិនព្រមឈប់ បែរជាជិះរត់គេចក៏ជ្រុលទៅបុកទ្វារផ្ទះពលរដ្ឋរបងរប៉ើករលំសង្កត់លើរយះក្បាលហូរឈាម ហេតុការណ៍នេះកើតឡើងកាលពីម៉ោង១និង៣០នាទីរំលងអធ្រាត្រឈានចូលថ្ងៃទី០៤ ខែមីនា ឆ្នាំ២០១៨ ស្ថិតនៅចំណុចផ្លូវបេតុង ក្នុងភូមិភ្នាត សង្កាត់ស្ទឹងមានជ័យ២ ខណ្ឌមានជ័យ ។
យុវជនខាងលើឃាត់ខ្លួនមានឈ្មោះ យឿត វេតគុណ ហៅមុន្នី អាយុ២០ឆ្នាំ មុខរបរកម្មករ ស្នាក់នៅឃ្លាំងក្នុងសង្កាត់ស្ទឹងមានជ័យ២ ខណ្ឌមានជ័យ និងម្នាក់ទៀតឈ្មោះ ណា ភេទប្រុស អាយុ២០ឆ្នាំ ជាកម្មករ ទាំង២នាក់ជិះម៉ូតូម៉ាកស្មាស់វី ពណ៌ខ្មៅ ជាម៉ូតូរបស់មេការ ។
សមត្ថកិច្ចបានប្រាប់ថា ខណៈកម្លាំងល្បាតពួនស្ទាក់ក្នុងមូលដ្ឋានដើម្បីបង្ការបទល្មើសមកដល់ផ្លូវព្រះមុនីរ៉េត ក៏ឃើញយុវជន២នាក់ជិះម៉ូតូមិនពាក់មួកសុវត្ថិភាពទាំង២ ដោយសង្ស័យកម្លាំងបានហៅឱ្យឈប់ម៉ូតូសុំឆែកឆេរ តែយុវជននោះមិនព្រមឈប់ និងបើកម៉ូតូគេចតែម្តង តែត្រូវសមត្ថកិច្ចដេញតាមរហូតមកដល់ចំណុចផ្លូវបេតុងភូមិភ្នាត ដោយយុវជន២នាក់នោះជិះលឿនពេកមកដល់ផ្លូវកោងចាប់ហ្វ្រាំងមិនទាន់ជ្រុលទៅបុកទ្វារផ្ទះប្រជាពលរដ្ឋ បណ្តាលឲ្យរលំសង្កត់ជាប់ និងធ្វើឲ្យអ្នកបើករបួសបែកថ្ងាសពីមុខហូរឈាមដូចទឹក ចំណែកអ្នកអង្គុយខាងក្រោយរត់គេចខ្លួនបាត់។
សមត្ថកិច្ចបានបន្តឲ្យដឹងទៀតថា យុវជនឈ្មោះ យឿត វេតគុណ ប្រាប់ថា ខ្លួនជាមួយមិត្តភក្តិឈ្មោះ ណា បានផឹកស្រាបៀរនៅឃ្លាំងអស់ម្នាក់២កំប៉ុង ហើយក៏ខ្ចីម៉ូតូមេការជិះដើរលេង លុះដល់ចំណុចខាងលើសមត្ថកិច្ចហៅឱ្យឈប់ តែខ្លួនបើករត់គេចព្រោះខ្លាចចាប់ម៉ូតូអត់ពាក់មួក ទើបព្យាយាមរត់រហូតដល់ផ្លូវកោង ដោយលឿនពេកក៏បុកទ្វារផ្ទះរបងរប៉ើករលំសង្កត់ បណ្ដាលឱ្យមុតទ្វារដែករយះហូរឈាម ចំណែកមិត្តភក្តិភ័យពេករត់គេចខ្លួនបាត់ ។
ជាមួយគ្នានោះដែរ យុវជនខាងលើក៏បានសុំទោសដល់សមត្ថកិច្ច មេត្តាកុំដាក់ទោសទណ្ឌអ្វីមកលើខ្លួន រួចក៏បានសួរនាំចប់ ហើយឆែកឆេរមិនឃើញមានបទល្មើសអ្វីក៏ឲ្យត្រឡប់ទៅផ្ទះវិញ គ្រាន់តែរក្សាទុកម៉ូតូនៅប៉ុស្តិ៍រង់ចាំយកឯកសារម៉ូតូមកផ្ទៀងផ្ទាត់ និងប្រគល់ម៉ូតូយកទៅវិញ ៕
ចែករំលែកព័តមាននេះ