ខេត្តមណ្ឌលគិរី ៖ សេចក្តីរាយការណ៍នៅព្រឹកថ្ងៃទី២ ខែមីនា បានឱ្យដឹងថា យ៉ាងហោចណាស់មានការផ្ទុះអាវុធជាង១០គ្រាប់ កាលពីថ្ងៃទី២៧ ខែកុម្ភៈកន្លងមក ដែលបង្កឱ្យមានការភ្ញាក់ផ្អើលដល់អ្នកភូមិនិងមន្ត្រីអាជ្ញាធរស្រុកកោះញែក ដោយនឹកស្មានថាជាករណីឃាតកម្ម…
ខេត្តមណ្ឌលគិរី ៖ សេចក្តីរាយការណ៍នៅព្រឹកថ្ងៃទី២ ខែមីនា បានឱ្យដឹងថា យ៉ាងហោចណាស់មានការផ្ទុះអាវុធជាង១០គ្រាប់ កាលពីថ្ងៃទី២៧ ខែកុម្ភៈកន្លងមក ដែលបង្កឱ្យមានការភ្ញាក់ផ្អើលដល់អ្នកភូមិនិងមន្ត្រីអាជ្ញាធរស្រុកកោះញែក ដោយនឹកស្មានថាជាករណីឃាតកម្ម ឬអំពើប្លន់ណាមួយ តែតាមពិតមានប្រភពព័ត៌មានរាយការណ៍ថា មានមន្ត្រីប៉េអឹមបាញ់គំរាមយកលុយពីប្រជាពលរដ្ឋដឹកគ្រឿងផ្ទសោះ ។
សមត្ថកិច្ចស្រុកកោះញែកបានឱ្យដឹងថា ករណីផ្ទុះអាវុធវែង-ខ្លីជាច្រើនគ្រាប់នោះ ជាអំពើជំរិតទារប្រាក់ពីប្រជាពលរដ្ឋ ដែលបានកើតឡើងកាលពីវេលាម៉ោងប្រមាណ៥ល្ងាចថ្ងៃទី២៧ ខែកុម្ភៈ នៅចំណុចត្រពាំងអូរអង្គ្រង ឃុំស្រែហ៊ុយ ស្រុកកោះញែក ។ប្រភពព័ត៌មានបានរាយការណ៍ថា នៅចំណុចត្រពាំងអង្គ្រងនោះ មានមន្ត្រីប៉េអឹមម្នាក់ឈ្មោះ ពុធ ដារ៉ា បានឃាត់រថយន្ត១គ្រឿងដឹកឈើគ្រឿងផ្ទះ ដែលមានសសរ៥ដើម ក្តារសុក្រំ១០សន្លឹក កម្រាស់៥ហ៊ុន គ្រែចំនួន១ និងសម្ភារផ្លាស់ប្តូរទីលំនៅមួយចំនួនទៀត ជារបស់ឈ្មោះ អ៊ុំ សាម៉េត ។
ពេលនោះ មន្ត្រីប៉េអឹមរូបនេះបានយកកាំភ្លើងអាកា៤៧មួយដើម និងកា៥៩មួយដើម បាញ់គំរាមឱ្យរថយន្តឈប់ គឺបាញ់អស់ប្រហែល១០គ្រាប់ ។ ក្រោយពីបាញ់អស់គ្រាប់ហើយនោះ រថយន្តក៏បានឈប់ ហើយឈ្មោះ ពុធ ដារ៉ា បានដើរមកទារលុយ១.៥០០ដុល្លារ តែម្ចាស់អង្វរថាគ្មានលុយទេនិងបានប្រគល់ប្រាក់៥០០ដុល្លារ ហើយមន្ត្រីប៉េអឹមរូបនោះក៏ព្រមយក រួចបើករថយន្តចេញទៅ ។
ពាក់ព័ន្ធនឹងរបាយការណ៍ខាងលើ លោក អ៊ុំ សាម៉េត ជាយោធិនចូលនិវត្តន៍ បានឱ្យដឹងនៅព្រឹកថ្ងៃទី២ ខែមីនាថា ពិតជាមានករណីនេះកើតឡើងមែន ។ លោកបន្តថា មុនកើតហេតុលោកបានជួលគោយន្តច្នៃ១គ្រឿងតម្លៃ៣០ម៉ឺនរៀល ដឹកសសរ ក្តារ និងសម្ភារផ្ទះចេញពីរោងគោ លោក ឃិន ម៉េងស្រេង អតីតមេបញ្ជាការយោធាខេត្តមណ្ឌលគិរី ដើម្បីទៅសាងសង់ផ្ទះថ្មី។ ពេលទៅដល់ក្បែរត្រពាំងអូរអង្គ្រង ស្រាប់តែលេចមុខលោក ពុធ ដារ៉ា ជាមន្ត្រីប៉េអឹមជិះរថយន្តឆ្លាម និងអត់ទាំងពាក់អាវផង ដេញគោយន្តដឹកឈើគ្រឿងរបស់លោក ថែមទាំងស្រែកឱ្យឈប់បណ្តើរបាញ់កាំភ្លើងទាំង២ដើមបណ្តើរស្រោចគ្រាប់សំដៅទៅគោយន្ត ។
ពេលនោះ អ្នកបើកគោយន្តក៏ឈប់ ហើយមន្ត្រីប៉េអឹមរូបនោះបានទារលុយចំនួន១.៥០០ដុល្លារជាថ្នូរនឹងការដោះលែង ។ ប៉ុន្តែដោយសារតែលោកគ្មានលុយគ្រប់ចំនួន ក៏បានតថ្លៃឱ្យត្រឹម៥០០ដុល្លារដើម្បីបានទម្លាក់អីវ៉ាន់ចូលផ្ទះ ។លោកបញ្ជាក់ថា លោកជាអ្នកក្រីក្រ តែបើលោកពុធ ដារ៉ា មិនយកលុយប៉ុណ្ណឹងចាប់គោយន្តនេះក៏ចាប់ទៅ ។នៅព្រឹកថ្ងៃដដែលនោះដែរ លោក ពុធ ដារ៉ា មិនបានបញ្ជាក់ករណីនេះទេតាមរយៈទូរស័ព្ទដោយលោកប្រាប់ថាកំពុងរវល់ជួបមេ ។
លោក រស់ បញ្ញា មេបញ្ជាការមូលដ្ឋានកងរាជអាវុធហត្ថស្រុកកោះញែកថ្លែងថា ឈ្មោះពុធ ដារ៉ា មិនមែនជាមេបញ្ជាការរងប៉េអឹមស្រុកកោះញែកទេ ។ ឈ្មោះ ពុធ ដារ៉ា ជាមន្ត្រីអាវុធហត្ថខេត្តមណ្ឌលគិរី ដែលត្រូវថ្នាក់លើចាត់បញ្ជូនមកធ្វើការផ្ទៃក្នុងលើភូមិសាស្ត្រស្រុកកោះញែក ហើយករណីខាងលើនេះ ឈ្មោះ ពុធ ដារ៉ា កំពុងស្ថិតក្នុងការសួរនាំពីសំណាក់ថ្នាក់លើហើយ ។នៅព្រឹកថ្ងៃទី២ ខែមីនា មេបញ្ជាការកងរាជអាវុធហត្ថខេត្ត លោក ហែម បូណារ៉ែល បានឱ្យដឹងថា លោកបានដកឈ្មោះ ពុធ ដារ៉ា មកកាន់ទីបញ្ជាការទាំងយប់ដើម្បីសួរនាំ ។ លោកថា ករណីបាញ់បោះខាងលើកើតឡើងដោយសារតែឃាត់រថយន្តដឹកឈើពុំព្រមឈប់ ហើយរថយន្តដឹកឈើនោះបានកៀររថយន្តសមត្ថកិច្ចធ្លាក់ចូលព្រៃខូចខាតមួយផ្នែក ។
លោកបញ្ជាក់ថា ដោយសារតែការពារសុវត្ថិភាព ព្រោះនៅកណ្តាលព្រៃស្ងាត់ ទើបលោកពុធ ដារ៉ា បាញ់ការពារខ្លួន តែមិនដល់ថ្នាក់ច្រើនគ្រាប់បែបនេះទេ ។ ចំពោះការទារប្រាក់នោះ គឺជាប្រាក់ដែលឈ្មោះ អ៊ុំ សាម៉េត ចេញថ្លៃសងការខូចខាតរថយន្ត ក្រោយពីមានការសម្របសម្រួលពីអាជ្ញាធរភូមិ ឃុំនៅទីនោះគឺចំនួន៥០០ដុល្លារ ។ លោកមេបញ្ជាការថ្លែងថា បានសងប្រាក់ទាំងនោះទៅជនរងគ្រោះវិញហើយ ហើយលោកថានឹងចេញថ្លៃជួសជុលរថយន្តដោយចេញប្រាក់លោកផ្ទាល់វិញ ៕
ចែករំលែកព័តមាននេះ