រាជធានីភ្នំពេញ ៖ តារាភាពយន្ត និងបង្ហាញម៉ូដកញ្ញាទឹម រដ្ឋា បានបញ្ចេញរូបភាព ថ្មីៗជាបន្តបន្ទាប់ ដោយសម្ញែងស្ទីលថតយ៉ាងសិចស៊ីតាមហ្វេសប៊ុក និងអ៊ីនស្តេក្រាម ដោយមិនខ្វល់ពីមហាជនយល់យ៉ាងណានោះឡើយ ។
ក្នុងនាមជាតារាលេចធ្លោក្នុងការបង្ហាញភាពសិចស៊ីម្នាក់ដែរនោះ ទឹម រដ្ឋា ហាក់មិនបានញញើតក្នុងការបញ្ចេញរូបភាពសិចស៊ីជាសាធារណៈឡើយ បើទោះបីជាមានតារាមួយចំនួនធ្លាប់រងការរិះគន់ខ្លាំងពីមហាជនក៏ដោយ ។
ជាទូទៅការបញ្ចេញរូបភាពជាមួយនឹងស្តាយថតយ៉ាងសិចស៊ីរបស់ទឹម រដ្ឋា ភាគច្រើនជាការងារសិល្បៈផង និងការនិយមលេងខ្លួនរបស់តារារូបនេះផង ក្នុងពេលដែលនាងគឺជាតារាម៉ូដែលមួយរូប ។ ជាងនេះទៅទៀត ទឹម រដ្ឋា ត្រូវគេដឹងថាអាជីពសិល្បៈរបស់នាងសព្វថ្ងៃកាន់តែក្តាប់បានឱកាសច្រើនជាបន្តបន្ទាប់ តាមរយៈការសម្តែង និងដើរម៉ូដផង ហើយតារារូបនេះក៏និយមចូលចិត្តបង្ហាញភាពហ៊ឺហា ការប្រើប្រាស់សម្ភារមាន ថ្លៃៗ ស៊េរី ទំនើបៗ មិនឲ្យចាញ់តារាប្រុស-ស្រីឯទៀតឡើយ ។
ដោយឡែកបើចាប់អារម្មណ៍ចំពោះការស្លៀកពាក់ និងតុបតែងខ្លួនវិញ ទឹម រដ្ឋាក៏ កាន់តែមានការវិវឌ្ឍខ្លួនខុសប្លែកច្រើនជាងមុន ខណៈដែលកន្លងមកនាងពុំសូវលេងខ្លួនខ្លាំងដោយការស្លៀកពាក់សិចស៊ី ស្រើបស្រាលនោះឡើយ ប៉ុន្តែផ្ទុយពីនោះបច្ចុប្បន្ននាងបែរជាទម្លាយរូបភាពសិចស៊ីខ្លាំងពញ្ញាក់អារម្មណ៍មហាជនជាបន្តបន្ទាប់ ។
បើទោះបីជាទឹម រដ្ឋា ហាក់ជោគជ័យនៅក្នុងការងារសិល្បៈក៏ដោយ ប៉ុន្តែបើនិយាយពីជីវិតស្នេហាវិញនោះ នាងហាក់មិនទាន់ជោគជ័យគួរឲ្យកត់សម្គាល់ឡើយ ។ នាងបានពើបប្រទះស្នេហាមិនសមប្រកបជាបន្តបន្ទាប់ មុនពេលដែលនាងទើបតែចាប់ផ្តើមស្នេហាយ៉ាងស្អិតរមួតជាមួយបុរសបរទេសជាអ្នកជំនួញមួយរូបនាពេលបច្ចុប្បន្ន ។
ស្នេហារវាងនាង និងបុរសបរទេសនោះក៏នៅមិនទាន់មានពន្លឺចូលរោងការ នៅឡើយទេបើទោះបីជាពេលនេះអ្នកទាំងពីរបានបង្ហាញខ្លួនរួមយ៉ាងស្និទ្ធស្នាលស្ទើរមិនដាច់រយៈដូចប្តីប្រពន្ធក្តី ។
ទឹម រដ្ឋា ធ្លាប់បានអះអាងថា ចំណងស្នេហ៍ជាមួយបុរសជនជាតិអាមេរិកនាពេលនេះ នាងក៏មិនទាន់ជឿជាក់ប៉ុន្មានឡើយ ព្រោះធ្លាប់មានប្រវត្តិស្នេហាបែកបាក់ជាមួយជនជាតិបរទេសមុនម្តងរួចមកហើយ តែទោះបីជាយ៉ាងណានាងថាត្រូវតែសាកល្បងម្តងទៀត ៕
ចែករំលែកព័តមាននេះ