ប្រទេសកូរ៉េខាងត្បូង ៖ បណ្តារដ្ឋអាជ្ញាកាលពីថ្ងៃទី២៧ កុម្ភៈ ទាមទារឱ្យកាត់ទោសដាក់ពន្ធនាគារដល់៣០ឆ្នាំប្រឆាំងអតីតប្រធានាធិបតីកូរ៉េខាងត្បូង លោកស្រី PARK GEUN HYE ក្នុងឱកាសនៃសវនាការមួយនៅឯតុលាការកណ្តាលនៃស្រុកសេអ៊ូលចំពោះរឿងអាស្រូវពុករលួយយ៉ាងធំដែលនាំទៅដល់ការដកហូតតំណែងលោកស្រីកាលពីឆ្នាំទៅមិញ…
ប្រទេសកូរ៉េខាងត្បូង ៖ បណ្តារដ្ឋអាជ្ញាកាលពីថ្ងៃទី២៧ កុម្ភៈ ទាមទារឱ្យកាត់ទោសដាក់ពន្ធនាគារដល់៣០ឆ្នាំប្រឆាំងអតីតប្រធានាធិបតីកូរ៉េខាងត្បូង លោកស្រី PARK GEUN HYE ក្នុងឱកាសនៃសវនាការមួយនៅឯតុលាការកណ្តាលនៃស្រុកសេអ៊ូលចំពោះរឿងអាស្រូវពុករលួយយ៉ាងធំដែលនាំទៅដល់ការដកហូតតំណែងលោកស្រីកាលពីឆ្នាំទៅមិញ ។
លោកស្រី PARK អាយុ៦៦ឆ្នាំ កាលពីខែមេសា ឆ្នាំ២០១៧ ជាប់ការចោទប្រកាន់ដល់ទៅ១៨ករណីចាប់ពីការចោទប្រកាន់ពីរឿងពុករលួយដល់ការរំលោភបំពានអំណាចរួចដល់ការទម្លាយបណ្តាការសម្ងាត់របស់រដ្ឋ ។ លោកស្រីជាប់ចោទថាធ្វើសកម្មភាពដោយរួមដៃគ្នាជាមួយមិត្តចាស់ លោកស្រី CHOI SOON SIL ពីបទប្រមូលយកប្រាក់៥៩,២ពាន់លានវ៉ុន (៥៥,២លានដុល្លារ) ពីបណ្តាក្រុមហ៊ុនធំៗ ក្នុងនោះមានក្រុមហ៊ុន SAMSUNG ក្រុមហ៊ុន LOTTE និងក្រុមហ៊ុន SK ជាថ្នូរនឹងការផ្តល់ផលប្រយោជន៍នានាដល់ក្រុមហ៊ុនទាំងនេះ ។
លោកស្រីអតីតប្រធានាធិបតីរូបនោះក៏ជាប់សង្ស័យដែរថា បណ្តោយឱ្យលោកស្រី CHOI ចូលកកូរកកាយក្នុងកិច្ចការរដ្ឋ ទោះបីជាមិត្តលោកស្រីនេះពុំកាន់តំណែងផ្លូវការណាមួយក្នុងផ្ទៃរដ្ឋាភិបាលក្តី ។ លោកស្រី PARK បានបដិសេធរាល់ការចោទប្រកាន់ទាំងនេះ ។
ប្រធានាធិបតីត្រូវទម្លាក់ចេញពុំមានវត្តមានក្នុងពេលធ្វើសវនាការច្រើនលើកចាប់តាំងពីតុលាការពន្យារពេលការឃុំឃាំងលោកស្រីកាលពីខែតុលា ដែលនាំឱ្យមានពាក្យនិយាយពីភាពលម្អៀងរបស់តុលាការ ។
លោកស្រី PARK ត្រូវដកហូតតំណែងកាលពីខែមីនា ឆ្នាំ២០១៧ ក្រោយការសម្រេចរបស់តុលាការធម្មនុញ្ញ ។ លោកស្រីត្រូវគេចាប់ឃុំឃាំងបណ្តោះអាសន្ននាខែដដែលនេះ ។ ចំណែកលោកស្រី CHOI ត្រូវតុលាការកាត់ទោសដាក់គុក២០ឆ្នាំកាលពី២សប្តាហ៍មុន ហើយលោកស្រីធ្វើការតវ៉ាទៅសាលាឧទ្ធរណ៍ចំពោះការសម្រេចនេះ ៕
ចែករំលែកព័តមាននេះ