រាជធានីភ្នំពេញ ៖ អ្នកនាំពាក្យគណបក្សគណបក្សប្រជាជនកម្ពុជា បានហៅទង្វើរបស់ក្រុមអ្នកនយោបាយមួយចំនួន និងពលរដ្ឋដែលមាននិន្នាការគាំទ្រអតីតបក្សសង្គ្រោះជាតិ ជាទង្វើអសីលធម៌ និងអ្នកប្រជាធិបតេយ្យតិរច្ឆាន ។
ការលើកឡើងរបស់មន្ត្រីអ្នកនាំពាក្យគណបក្សកាន់អំណាចនេះ បន្ទាប់ពីក្រុមអ្នកនយោបាយជ្រុលនិយម និងពលរដ្ឋខ្មែរមួយចំនួន បានធ្វើការដុតទីងមោងដែលមានរូប សម្តេចតេជោ ហ៊ុន សែន នៅប្រទេសអូស្ត្រាលីកាលពីពេលថ្មីៗកន្លងមកនេះ ។
លោក សុខ ឥសាន បានឲ្យដឹងនៅថ្ងៃទី២៧ ខែកុម្ភៈ ថា នយោបាយរបស់អ្នកប្រជាធិបតេយ្យជ្រុលនិយម កាលពីពេលថ្មីៗនេះ បងប្អូនខ្មែរមួយចំនួននៅប្រទេសអូស្ត្រាលី បានធ្វើសកម្មភាពអសីលធ៌ម ដោយដុតទីងមោងដែលមានរូប សម្តេចតេជោ ហ៊ុន សែន ។
លោកបន្តថា សកម្មភាពអសីលធ៌មបែបនេះ គឺជានយោបាយជ្រុលនិយម និងលំអៀងទៅរកអតីតៈបក្សប្រឆាំង ដែលមិនអាចទទួលយកបានឡើយ ។ ការធ្វើសកម្មភាពអសីលធម៌ និងជ្រុលនិយមនេះ មិនមែនជាសកម្មភាពប្រជាធិបតេយ្យទេ តែគឺជាប្រជាធិបតេយ្យតិរច្ឆាន ដែលពួកអ្នកប្រជាធិបតេយ្យក្លែងក្លាយ ចូលចិត្តអនុវត្តណាស់តាំងពីដើមរៀងមក ។
លោកបញ្ជាក់ថា «ខ្លួនឯងតែងតែនិយាយជេរប្រមាថគេ ដល់គេមានប្រតិកម្ម ឆ្លើយថា ជាសិទ្ធិបញ្ចេញមតិ តែដល់គេនិយាយឲ្យវិញ ថាគេប្រមាថខ្លួន ហើយឆ្លើយតបបែបសត្វតិរច្ឆានទៅវិញ ។ តើអាកប្បកិរិយានេះឬជាអ្នកប្រជាធិបតេយ្យនោះ0x017d7 មិនមែនជាអ្នកប្រជាធិបតេយ្យពិតប្រាកដទេ តែអាចហៅថា ជាអ្នកប្រជាធិបតេយ្យតិរច្ឆាន ទើបសម» ។
ទាក់ទិននឹងទង្វើអសីលធម៌នេះដែរ មន្ត្រីជាន់ខ្ពស់ក្រសួងក្រសួងការបរទេស និងសហប្រតិបត្តិការអន្តរជាតិ បានថ្កោលទោសយ៉ាងខ្លាំងក្លាចំពោះការដុតរូបទីងមោង ដោយភ្ជាប់ជាមួយរូប សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ហើយបាននឹងកំពុងធ្វើការជាមួយស្ថានទូតអូស្ត្រាលី ដើម្បីបញ្ឈប់សកម្មភាពដ៏អសីលធម៌ទាំងនេះផងដែរ ។
លោក ជុំ សុន្ទរី អ្នកនាំពាក្យក្រសួងការបរទេសកម្ពុជាបានឲ្យដឹងថា ក្រសួងបាននឹងកំពុងធ្វើការ សម្របសម្រួលតាមផ្លូវការទូតជាមួយអូស្ត្រាលី ដើម្បីធានាបាននូវការគោរពចំពោះកិត្តិយស និងភាពថ្លៃថ្នូរបស់ថ្នាក់ដឹកនាំកម្ពុជា ជាពិសេសក្នុងឱកាសដែល សម្ដេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញចូលរួមកិច្ចប្រជុំកំពូលពិសេសអាស៊ាន-អូស្ត្រាលី នៅទីក្រុងស៊ីដនី ក្នុងខែមីនាខាងមុខ តាមការអញ្ជើញផ្លូវការរបស់នាយករដ្ឋមន្ត្រីអូស្ត្រាលី ។
បើតាមលោក ជុំ សុន្ទរី ក្រសួងការបរទេស ក៏នឹងធ្វើដូចគ្នានេះ ជាមួយបណ្តាប្រទេសដទៃទៀត ចំពោះករណីដុតរូបថ្នាក់ដឹកនាំកម្ពុជាផងដែរ ។
សូមជម្រាបថា ការចរចារវាងក្រសួងការបរទេសកម្ពុជា ជាមួយស្ថានទូតអូស្ត្រាលី ដើម្បីឲ្យមានការគោរពភាពថ្លៃថ្នូររបស់មេដឹកនាំខ្មែរនេះ បានធ្វើឡើងបន្ទាប់ពីពលរដ្ឋខ្មែរនៅអូស្ត្រាលី ដែលដឹកនាំដោយ លោក ហុង លីម តំណាងរាស្ត្រអូស្ត្រាលីដើមកំណើតខ្មែរ បាននាំគ្នាដុតរូបទីងមោងដោយមានភ្ជាប់ជាមួយរូបរបស់ សម្តេចតេជោ ហ៊ុន សែន ជាមួយការនិយាយនូវពាក្យអសុរោះជាច្រើនថែមទៀតផង ។
ក្រៅពីពលរដ្ឋខ្មែរនៅអូស្ត្រាលី ពលរដ្ឋខ្មែរនៅកាណាដាដែលគេដឹងថា សុទ្ធតែជាមនុស្សមាននិន្នាការគាំទ្រអតីតបក្សសង្គ្រោះជាតិ ក៏បាននាំគ្នាដុតរូបបែបនេះផងដែរ ។ ការដុតរូបរបស់ពួកគេ បានធ្វើឡើងបន្ទាប់ពី សម្តេចតេជោ ហ៊ុន សែន បានព្រមានតាមវាយពួកគេដល់ផ្ទះ ប្រសិនបើមានការដុតរូប សម្តេច កាលពីពេលថ្មីកន្លងមកនេះ ។
បើតាមមតិសាធារណៈជននាំគ្នាលើកឡើងថា រដ្ឋាភិបាលអូស្ត្រាលីត្រូវតែពិចារណាលើទង្វើដ៏ឆ្គាំឆ្គងរបស់ខ្មែរនៅអូស្ត្រាលី ព្រោះការធ្វើសកម្មភាពនេះជា រឿងប៉ះពាល់ដល់កិត្តិយសរបស់ថ្នាក់ដឹកនាំខ្មែរ និយាយដោយឡែកនិយាយជារួមវិញ ក៏ជាការប៉ះពាល់ដល់កិត្តិយសរបស់មេដឹកនាំអាស៊ានផងដែរ ។ ព្រោះនៅខែក្រោយនេះ អូស្ត្រាលីអញ្ជើញមេដឹកនាំអាស៊ានទាំង១០ ឲ្យទៅប្រជុំនៅក្នុងប្រទេសរបស់ខ្លួន ផ្ទុយទៅវិញបែរជាបណ្ដោយឲ្យមានការប្រមាថដល់ភាពថ្លៃថ្នូរបស់មេដឹកនាំអាស៊ានទៅវិញ ។ អូស្ត្រាលី នឹងធ្វើជាម្ចាស់ផ្ទះកិច្ចប្រជុំកំពូលអាស៊ាន-អូស្ត្រាលី ដែលធ្វើអំឡុងថ្ងៃទី១៧-១៨ ខែមីនា ឆ្នាំ២០១៨ ខាងមុខនេះ ៕
ចែករំលែកព័តមាននេះ