រាជធានីភ្នំពេញ ៖ ជនសង្ស័យជានិស្សិតផ្នែក IT ឆ្នាំទី២ម្នាក់ ត្រូវបានកម្លាំងនគរបាលប៉ុស្តិ៍ផ្សារដើមថ្កូវចាប់ឃាត់ខ្លួន ក្រោយពីរូបគេបានជិះម៉ូតូមួយគ្រឿង ទៅធ្វើសកម្មភាពចូលទៅរកទិញថ្នាំដុសធ្មេញ ហើយបន្លំលួចយកកាបូបលុយ ករណីនេះដែរបានកើតឡើងកាលពីវេលាម៉ោង៩ និង៣០នាទីព្រឹកថ្ងៃទី២៧ ខែកុម្ភៈ ឆ្នាំ២០១៨ នៅចំណុចកន្លែងលក់ដូរឥវ៉ាន់មួយកន្លែង ផ្ទះលេខ៥ ផ្លូវលេខ៤៣០ ក្រុម១០ ភូមិ២ ក្នុងសង្កាត់ ផ្សារដើមថ្កូវ ខណ្ឌចំការមន ។
នគរបាលបានប្រាប់ឱ្យដឹងថា បុរសជាជនសង្ស័យម្នាក់ដែលបានឃាត់ខ្លួនឈ្មោះ លីម គីមហេង អាយុ២១ឆ្នាំ ជានិស្សិតឆ្នាំទី២ រៀនផ្នែកIT នៅសកលវិទ្យាល័យស៊ីតិច មានទីលំនៅផ្ទះលេខ១១ ផ្លូវលេខ៣៥៦ ភូមិព្រះពន្លា ក្នុងសង្កាត់ព្រែកប្រា ខណ្ឌច្បារអំពៅ ។ ចំណែកនារីរងគ្រោះឈ្មោះ លីម ស្រីស្រស់ អាយុ២៤ឆ្នាំ មុខរបរជាអាជីករ និងជាមេតុងទីន ស្នាក់នៅផ្ទះកើតហេតុខាងលើ ។
មុនពេលកើតហេតុ ខណៈពេលដែលនារីរងគ្រោះកំពុងតែនៅផ្ទះលក់ដូរជាមួយ នឹងក្មួយប្រុសតូចម្នាក់នោះ ក៏ស្រាប់តែមានបុរសម្នាក់ជិះម៉ូតូ ពណ៌ស ពាក់ស្លាកលេខភ្នំពេញ១CV-៩៩៨៧ មួយគ្រឿង តែម្នាក់ឯងចូលមករកទិញអីវ៉ាន់ ។ ប្រភពដដែលបន្តទៀតថា ពេលដែលរូបគេសួរនាំចុះឡើងៗ រកទិញអីវ៉ាន់មួយសន្ទុះនោះ រូបគេក៏បានឲ្យនារីរងគ្រោះទៅយកថ្នាំដុសធ្មេញឲ្យរូបគេ ពេលនោះនាងក៏បានដើរទៅយក ហើយរូបគេក៏ឆ្លៀតពេលចូលទៅយកកាបូបលុយរបស់នាង ដែលទុកនៅលើតុខាងក្នុងផ្ទះបាន ហើយជិះម៉ូតួចេញបាត់ ។ ពេលនោះនារីរងគ្រោះក៏បានចេញមកវិញ រកមើលកាបូបលុយរបស់ខ្លួន ដែលមានលុយទាំងលុយខ្មែរ និង លុយដុល្លារសរុបមានចំនួនរហូតទៅដល់ជាង១ពាន់ដុល្លារបាត់ ចំណែកឯបុរសជាអ្នកទិញក៏បាត់ទៀតបាត់ស្រមោលភ្លាមនោះ នាងក៏បបួលក្មួយស្រីម្នាក់ទៀត ជិះម៉ូតូតាមស្វែងរកផងដែរ ។
ស្របពេលដែលនារីរងគ្រោះកំពុងតែជិះម៉ូតូដើររកជនសង្ស័យ តាមផ្លូវនោះក៏ស្រាប់តែបានប្រទះឃើញ បុរសជាជនសង្ស័យជិះម៉ូតូកាត់មុខដោយចៃដន្យ ហើយពួកនាងក៏បាននាំគ្នាជិះម៉ូតូដេញតាម ។ ដោយសារតែបុរសជាជនសង្ស័យជិះម៉ូតូមិនមានពាក់មួកសុវត្ថិភាពនោះ លុះទៅដល់ចំណុចច្រមុះជ្រូកក្បាលថ្នល់ក៏ត្រូវប៉ូលិសគោលដៅចរាចរណ៍នៅទីនោះឃាត់ហៅឲ្យឈប់ ខណៈពេលនោះពួកនាងក៏ជិះតាមទាន់ និងប្តឹងកម្លាំងមានសមត្ថកិច្ចចាប់ឃាត់ខ្លួនតែម្តង ។
តាមប្រភពដដែលបានបញ្ជាក់ទៀតថា ទាំងលុយខ្មែរ និងលុយដុល្លារទាំង១ពាន់ដុល្លារ ដែលនៅក្នុងកាបូប ដែលត្រូវជនសង្ស័យម្នាក់ខាងលើបន្លំលួចយកបាននេះ គឺសុទ្ធតែជាលុយដែលនាងទើបប្រមូលបានពីកូនតុងទីន និងលក់ដូរបាន ដែលត្រូវបានគេមកបន្លំ និងលួចយកទៅនេះ ។ ក្រោយពេលកើតហេតុ កាបូបលុយ និងលុយជាង១ពាន់ដុល្លារនោះ ត្រូវបានធ្វើការប្រគល់ជូនទៅឲ្យនារីរងគ្រោះ ជាម្ចាស់វិញ ។
ចំណែកឯបុរសជាជនសង្ស័យត្រូវបាននាំមកកាន់នគរបាលប៉ុស្តិ៍ផ្សារដើមថ្កូវ និងធ្វើកំណត់ហេតុ ដើម្បីបញ្ជូនទៅកាន់អធិការដ្ឋាននគរបាលខណ្ឌចំការមនចាត់ការទៅតាមផ្លូវច្បាប់ជាបន្តទៅទៀត ៕
ចែករំលែកព័តមាននេះ