ខេត្តព្រះសីហនុ ៖ មន្ត្រីនគរបាល នៃស្នងការដ្ឋាននគរបាលខេត្តព្រះសីហនុ ដែលចាត់ទុកថាមានស្នាដៃល្អក្នុងការបង្ក្រាបក្រុមចោរលួច ឆក់ កន្លងមក ត្រូវបានទទួលការលើកសរសើរ និងផ្តល់ជារង្វាន់លើកទឹកចិត្តពីសំណាក់ លោក…
ខេត្តព្រះសីហនុ ៖ មន្ត្រីនគរបាល នៃស្នងការដ្ឋាននគរបាលខេត្តព្រះសីហនុ ដែលចាត់ទុកថាមានស្នាដៃល្អក្នុងការបង្ក្រាបក្រុមចោរលួច ឆក់ កន្លងមក ត្រូវបានទទួលការលើកសរសើរ និងផ្តល់ជារង្វាន់លើកទឹកចិត្តពីសំណាក់ លោក យន្ត មីន អភិបាលខេត្តព្រះសីហនុ ក្នុងនាមប្រធានគណបញ្ជាការឯកភាពខេត្ត ។ នៅក្នុងជំនួបសំណេះសំណាលជាមួយមន្ត្រីនគរបាលខាងលើ ដើម្បីផ្តល់ជាការលើកទឹកចិត្តដល់មន្ត្រីនគរបាលដែលមានស្នាដៃល្អក្នុងការបង្ក្រាបបទល្មើស ដែលពិធីសំណេះសំណាលត្រូវបានធ្វើឡើងនៅសាលប្រជុំសាលាខេត្តព្រះសីហនុ កាលពីរសៀលថ្ងៃ២៦ ខែកុម្ភៈ ឆ្នាំ២០១៨ ។
លោកយន្ត មីន បានចាត់ទុកថា បេសកកម្មប្រតិបត្តិការរបស់មន្ត្រីនគរបាលព្រមទាំងសមត្ថកិច្ចពាក់ព័ន្ធក្នុងការបង្ក្រាប ក្រុមជនខិលខូច លួច ឆក់ទ្រព្យសម្បត្តិប្រជាពលរដ្ឋ ឬទ្រព្យសម្បត្តិជនបរទេសនៅក្នុងខេត្តព្រះសីហនុ កន្លងមក រហូតដល់ពេលខ្លះកងកម្លាំងសមត្ថកិច្ចមួយចំនួនទទួលរងរបួសផងនោះ ថាជាសកម្មភាពមួយមានតម្លៃបំផុត ដើម្បីស្ថេរភាព និងសន្តិសុខសង្គម ។ ជាមួយនឹងការលើកសរសើរ និងផ្តល់ជារង្វាន់លើកទឹកចិត្ត ក្នុងនាមគណបញ្ជាការឯកភាពខេត្ត លោកអភិបាលខេត្តព្រះសីហនុ បានសម្តែងនូវជំនឿជឿជាក់ថា ក្រុមជនសង្គមងងឹតនឹងថយចុះ ក្នុងពេលដែលកម្លាំងសមត្ថកិច្ចយើង បង្កើនកិច្ចប្រតិបត្តិការបង្ក្រាប ។
លោកឧត្តមសេនីយ៍ត្រី កុល ផាលី ស្នងការរងទទួលកិច្ចការព្រហ្មទ័ណ្ឌ នៃស្នងការ រដ្ឋាននគរបាលខេត្តព្រះសីហនុបានបញ្ជាក់ឲ្យដឹងថា ជាក់ស្តែងនៅក្នុងប្រតិបត្តិការបង្ក្រាបបក្ខពួកក្រុមជនសង្ស័យធ្វើសកម្មភាពឆក់យកទ្រព្យសម្បត្តិជនជាតិបរទេស និងប្រើប្រាស់អាវុធខ្លី១ដើមខុសច្បាប់ក្នុងស្ថានទម្ងន់ទោស ចំនួន៦នាក់ ដែលត្រូវបានឃាត់ខ្លួនកាលពីថ្ងៃទី២៣ ខែកុម្ភៈ ឆ្នាំ២០១៨ កន្លងមកត្រូវបានកសាងសំណុំរឿងបញ្ជូនទៅសាលាតំបូងខេត្តនាថ្ងៃកន្លងមក ។
លោកឧត្តមសេនីយ៍ត្រីស្នងការរងបានរំឭកឡើងវិញនៅក្នុងប្រតិបត្តិការខាងលើបន្ទាប់ពីសមត្ថកិច្ចនគរបាលការិយាល័យព្រហ្មទណ្ឌកំពុងតែល្បាតតាមដងវិថីលេខ៥០២ ក្នុងចំណុចក្រុមទី១៤ ភូមិ០៤ សង្កាត់លេខ០៤ ក្រុងព្រះសីហនុ ខេត្តព្រះសីហនុ ក៏មានករណីអំពើលួចក្នុងស្ថានទម្ងន់ទោសបង្ករឡើងដោយបក្ខពួកខាងលើ ពេលនោះ សមត្ថកិច្ចនគរបាលដែលកំពុងល្បាតបានដេញតាមឃាត់ខ្លួនបាន ពេលនោះពួកគេបានប្រើប្រាស់អាវុធខ្លីភ្ជង់មកលើសមត្ថកិច្ចតែដោយសារតែការតក់ស្លុត និងភ័យស្លន់ស្លោបាត់បង់ម្ចាស់ការក្នុងការប្រើប្រាស់អាវុធ បណ្តាលឲ្យជនសង្ស័យភ្លេចបញ្ចូលគ្រាប់បាញ់មកលើសមតកថកិច្ចមិនកើតក៏បោះអាវុធចោលរួចរត់គេចខ្លួនតែត្រូវសមត្ថកិច្ចឃាត់ខ្លួនបានភ្លាមៗ និងបន្តទៅបំបែកសម្បុកបក្ខពួកបានបន្ថែមទៀតតាមចំនួនខាងលើ ។
លោក យន្ត មីន អភិបាលខេត្តបានមានប្រសាសន៍ថ្លែងកោតសរសើរ និងបានប្រគល់លិខិតសរសើររួមទាំងថវិកាមួយចំនួនជូនដល់លោកវរសេនីយ៍ទោ លី សុខហ៊ី លោកអនុសេនីយ៍ឯក អ៊ុន ឧត្តម និងលោកអនុសេនីយ៍ត្រី សំ វិសាល និងបានឧបត្ថម្ភជាថវិកាមួយចំនួនបន្ថែមទៀតជូនដល់ស្នងការរដ្ឋាននគរបាលខេត្តព្រះសីហនុ ជាការលើកទឹកចិត្តនៅក្នុងកិច្ចប្រតិបត្តិការនាពេលកន្លងមកនេះ ក្នុងការការពារសន្តិសុខជូនប្រជាពលរដ្ឋ ភ្ញៀវទេសចរជាតិ អន្តរជាតិ និងអ្នកវិនិយោគគិនជាតិអន្តរជាតិផងដែរ ៕
ចែករំលែកព័តមាននេះ