រាជធានីភ្នំពេញ ៖ រាជរដ្ឋាភិបាលបានកំណត់យកថ្ងៃទី២៧ ខែកុម្ភៈ ជាថ្ងៃប្រារព្ធ «ទិវាជាតិទីក្រុងស្អាត» ជារៀងរាល់ឆ្នាំ ដើម្បីជាប្រទីបបំភ្លឺ និងក្រើនរំឭកដល់ប្រជាពលរដ្ឋ និងគ្រប់ភាគីពាក់ព័ន្ធទាំងអស់ចូលរួមក្នុងចលនាប្រណាំងទីក្រុងស្អាត…
រាជធានីភ្នំពេញ ៖ រាជរដ្ឋាភិបាលបានកំណត់យកថ្ងៃទី២៧ ខែកុម្ភៈ ជាថ្ងៃប្រារព្ធ «ទិវាជាតិទីក្រុងស្អាត» ជារៀងរាល់ឆ្នាំ ដើម្បីជាប្រទីបបំភ្លឺ និងក្រើនរំឭកដល់ប្រជាពលរដ្ឋ និងគ្រប់ភាគីពាក់ព័ន្ធទាំងអស់ចូលរួមក្នុងចលនាប្រណាំងទីក្រុងស្អាត ដែលជាផ្នែកមួយនៃ «ព្រះរាជាណាចក្រអច្ឆរិយ» ក្នុងស្មារតីបណ្តុះឆន្ទៈគ្រប់ភាគីទាំងអស់ឲ្យស្រឡាញ់ភាពស្អាត និងបៃតង ព្រមទាំងចូលរួមជំរុញធ្វើឲ្យទីក្រុងរបស់យើងកាន់តែស្រស់ស្អាតប្រកបដោយភាពទាក់ទាញបន្ថែមទៀត ។
សម្រាប់កម្ពុជា ទីក្រុងស្អាត ឬទីក្រុងបៃតង គឺសំដៅដល់ទីក្រុងដែលមានបរិស្ថាន អនាម័យ សណ្ដាប់ធ្នាប់ល្អ សុវត្ថិភាព គួបផ្សំនឹងហេដ្ឋារចនាសម្ព័ន្ធទ្រទ្រង់គ្រប់គ្រាន់ ដែលផ្ដល់នូវភាពកក់ក្តៅ និងមជ្ឈដ្ឋានរស់នៅល្អប្រសើរសម្រាប់ប្រជាពលរដ្ឋនៅក្នុងទីក្រុង និងការទស្សនាកម្សាន្តរបស់ភ្ញៀវទេសចរ ។
ជាក់ស្តែង នៅឆ្នាំនេះ ជាខួបលើកទី៦ នៃការប្រារព្ធទិវាជាតិទីក្រុងស្អាត ក្រោមប្រធាន បទ «ទីក្រុងស្អាតដើម្បីទាំងអស់គ្នា» (Clean City for All) អមជាមួយពិធីប្រកាសជ័យលាភីទីក្រុងស្អាតលើកទី២ សម្រាប់ឆ្នាំ២០១៨-២០២១ ។
ប្រធានបទនេះ មានអត្ថន័យរំលេចឲ្យឃើញពីអន្តរទំនាក់ទំនងដ៏ជិតស្និទ្ធរវាង «ទីក្រុងស្អាត និងទេសចរណ៍», «ទីក្រុង និងសុខុមាលភាពរបស់ប្រជាពលរដ្ឋ» ពោលគឺការរីកចម្រើននៃទីក្រុង និងផ្ដល់ឥទ្ធិពលជាវិជ្ជមានដល់ការអភិវឌ្ឍនៃវិស័យទេសចរណ៍ ដោយ ហេតុថា ទីក្រុងជាបណ្ដុំដ៏សំខាន់ទាំងការរស់នៅ ការសម្រាកលំហែ សកម្មភាពទេស ចរណ៍នានា ពាណិជ្ជកម្ម សេដ្ឋកិច្ច នយោបាយ និងវប្បធម៌ ជាដើម ។
ជាមួយគ្នានេះ ជោគជ័យនៃវិស័យទេសចរណ៍ ក៏នឹងចូលរួមដល់ការអភិវឌ្ឍទីក្រុងតាមរយៈការនាំមកនូវកាលានុវត្តភាពសេដ្ឋកិច្ច ពាណិជ្ជកម្ម វិនិយោគគំរូថ្មីនៃការអភិវឌ្ឍនគរូបនីយកម្ម ការអភិរក្សបេតិកភណ្ឌទីក្រុង ការគិតគូរពីនិរន្តរភាពបរិស្ថាន ភាពស្អាត និងភាពបៃតង ការកសាងហេដ្ឋារចនាសម្ព័ន្ធទ្រទ្រង់ចាំបាច់នានាបម្រើដល់សេចក្តីត្រូវការរបស់ភ្ញៀវទេសចរ ។ ទាំងនេះនឹងជួយជំរុញឲ្យទីក្រុងកាន់តែមានភាពរស់រវើក កាន់តែមានឧត្តមភាពសម្រាប់ការរស់នៅ ការប្រកបធុរកិច្ច និងការទស្សនាកម្សាន្ត ដែលជាការចូលរួមដ៏សំខាន់មួយក្នុងការសម្រេចបាននូវគោលដៅអភិវឌ្ឍន៍ប្រកបដោយចីរភាពឆ្នាំ២០៣០ របស់អង្គការសហប្រជាជាតិ (UN) ក្នុងនោះគោលដៅទី១១ បានចែងអំពីការខិតខំរួមគ្នាក្នុងការអភិវឌ្ឍទីក្រុងឲ្យមាននិរន្តរភាព ប្រកបដោយសន្តិសុខ សុវត្ថិភាព ស្ថិរភាព និងប្រកបដោយបរិយាបន្ន (Make cities inclusive, safe, resilient and sustainable) ។
នៅក្នុងសារលិខិតរបស់សម្តេចអគ្គមហាសេនាបតីតេជោ ហ៊ុន សែន និងជាប្រធានកិត្តិយសនៃគណៈកម្មាធិការជាតិវាយតម្លៃទីក្រុងស្អាត បានមានប្រសាសន៍ថា ៖«ទីក្រុងទេសចរណ៍ទាំងអស់ត្រូវបន្តរៀបចំហេដ្ឋារចនាសម្ព័ន្ធ សម្បទា ផលិតផល និងសេវាទេសចរណ៍សម្រាប់សម្រួលដល់ការធ្វើដំណើររបស់ភ្ញៀវទេសចរជាជនពិការ ទេសចរណ៍វ័យចំណាស់ ស្ត្រីមានផ្ទៃពោះ និងកុមារជាដើម ស្របតាមនិន្នាការតំបន់អាស៊ានក្នុងការជំរុញ «ទេសចរណ៍សម្រាប់ទាំងអស់គ្នា» (Tourism for All) » ។
សម្តេចបន្តថា គ្រប់ភាគីពាក់ព័ន្ធទាំងអស់នឹងបន្តសហការចូលរួមគាំទ្រ ឧបត្ថម្ភ និងអនុវត្តចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» និងរាល់យុទ្ធនាការនានា ដែលត្រូវបានដាក់ចេញដោយរាជរដ្ឋាភិបាល ដើម្បីគាំទ្រដល់ចលនាប្រណាំងទីក្រុងស្អាត ស្របតាមប្រធានបទ «ទីក្រុងស្អាតដើម្បីទាំងអស់គ្នា»។
សម្តេចតេជោបានអំពាវនាវដល់គ្រប់ភាគីពាក់ព័ន្ធទាំងអស់ ជាពិសេស គ្រប់ក្រសួង-ស្ថាប័ន រាជធានី-ខេត្ត អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ វិស័យឯកជន អង្គការសង្គមស៊ីវិល ដៃគូអភិវឌ្ឍន៍ និងប្រជាពលរដ្ឋទាំងអស់មេត្តាបន្តផ្ដល់ការគាំទ្រ និងចូលរួមអនុវត្តឲ្យបានផុសផុលប្រកបដោយស្មារតីទទួលខុសត្រូវខ្ពស់នូវចលនាប្រណាំងទីក្រុងស្អាត សំដៅធ្វើឲ្យកម្ពុជាក្លាយជាគោលដៅទេសចរណ៍បៃតងប្រកបដោយគុណភាព និរន្តរភាព និងភាពទាក់ទាញសម្រាប់ភ្ញៀវទេសចរជាតិ និងអន្តរជាតិ ស័ក្តិសមនឹងកិត្តិនាម «កម្ពុជា៖ ព្រះរាជាណាចក្រអច្ឆរិយ» ៕
ចែករំលែកព័តមាននេះ