ខេត្តបាត់ដំបង ៖ យុវជនម្នាក់បានស្លាប់ភ្លាមៗនៅកន្លែងកើតហេតុបន្ទាប់ពីជិះម៉ូតូទៅបុកគូទរថយន្ត ពីក្រោយ ដែលឈប់ស្ងៀមស្របទិសគ្នានៅលើផ្លូវកាលពីវេលាម៉ោង៨និង៤០នាទីយប់ ថ្ងៃទី២០ ខែកុម្ភៈ ស្ថិតនៅចំណុចភូមិបឹងព្រីង ឃុំព្រៃតូច ស្រុកមោងឬស្សី…
ខេត្តបាត់ដំបង ៖ យុវជនម្នាក់បានស្លាប់ភ្លាមៗនៅកន្លែងកើតហេតុបន្ទាប់ពីជិះម៉ូតូទៅបុកគូទរថយន្ត ពីក្រោយ ដែលឈប់ស្ងៀមស្របទិសគ្នានៅលើផ្លូវកាលពីវេលាម៉ោង៨និង៤០នាទីយប់ ថ្ងៃទី២០ ខែកុម្ភៈ ស្ថិតនៅចំណុចភូមិបឹងព្រីង ឃុំព្រៃតូច ស្រុកមោងឬស្សី ។
មន្ត្រីមូលដ្ឋានបានឲ្យដឹងថាជនរងគ្រោះឈ្មោះ មាន យឿនសីហា អាយុ១៩ឆ្នាំ រស់នៅភូមិតានួត ឃុំព្រះផុស ស្រុកគាស់ក្រឡ និងជិះម៉ូតូ ពណ៌ខ្មៅ ពាក់ផ្លាកលេខ ភ្នំពេញ១R-៨១៤៨ ដែលធ្វើដំណើរពីកើតទៅខាងលិច ។ រីឯរថយន្តពណ៌ខៀវ ពាក់ផ្លាកលេខ កំពង់ស្ពឺ ២A-០៨២១ បើកបរដោយឈ្មោះ ចឹម ពល័ក្ខ អាយុ៣៥ឆ្នាំ រស់នៅស្រុកគាស់ក្រឡ ។ មន្ត្រីដដែលបានបញ្ជាក់ថា ជនរងគ្រោះបានជិះម៉ូតូទៅបុកគូទរថយន្តពីក្រោយ ខណៈដែលរថយន្តនេះ កំពុងឈប់លើចិញ្ចើមថ្នល់ បណ្តាលឱ្យអ្នកម៉ូតូស្លាប់នៅកន្លែងកើតហេតុតែម្តង ។
បើតាមសាក្សីបាននិយាយថា គេឃើញរថយន្តនោះខូច ហើយឈប់លើចិញ្ចើមថ្នល់ផ្នែកខាងស្ដាំដៃ តាំងពីថ្ងៃ តែគេមិនដឹងច្បាស់ថា រថយន្តនោះខូចអ្វីទេ ។ សាក្សីបានបញ្ជាក់ថា នៅពេលកើតហេតុគេមិនដឹងថា ជនរងគ្រោះមកពីណាទេ តែជិះមកពីទិសខាងកើតឆ្ពោះទៅលិច លុះមកដល់ចំណុចខាងលើ ស្រាប់តែបុកគូទរថយន្តនេះទាំងកំរោលតែម្ដង ។ ប្រភពដដែលបានបញ្ចាក់ថា គេសង្ស័យជនរងគ្រោះអាចចាំងភ្លើងរថយន្តមកពីខាងមុខ ទើបជិះម៉ូតូបុកគូទរថយន្តបែបនេះ ។
ទោះជាយ៉ាងណាមន្ត្រីចរាចរណ៍បានចុះទៅពិនិត្យកន្លែងកើតហេតុភ្លាមៗដែរ ក្រោយពីទទួលបានព័ត៌មាននេះ ។
សមត្ថកិច្ចបានប្រាប់ថា ក្រោយពីពិនិត្យ និងធ្វើការវាស់វែងមន្ត្រីជំនាញបាននាំយកមធ្យោបាយបង្កហេតុទាំង២ភាគីទៅរក្សាទុកនៅអធិការនគរបាលស្រុកមោងឬស្សី ដើម្បីដោះស្រាយតាមនីតិវិធីច្បាប់ ៕
ចែករំលែកព័តមាននេះ