Instagram កំពុងតែធ្វើការសាកល្បងបច្ចេកវិទ្យាពិសេសដែលអាចប្រាប់ដល់អ្នកប្រើប្រាស់ ប្រសិនមាននរណាម្នាក់លួច Screenshot ឬថត Story ដែលពួកគេបានបង្ហោះ ។ ចំណុចពិសេសនេះ នឹងអនុញ្ញាតឲ្យអ្នកប្រើប្រាស់ដឹងថា មាននរណាតាមដាន ឬលួចរូបភាព និងវីដេអូរបស់ខ្លួនឬទេ ។
អ្នកដែលបានលួច Screenshot ឬថត Story របស់អ្នកដទៃ គឺកំពុងតែត្រូវបានព្រមានថា ម្ចាស់គណនីនឹងដឹង នៅពេលណាដែលពួកគេចង់ធ្វើដូច្នេះម្តងទៀត ។ ពួកគេនឹងមើលឃើញសារលោតចេញមកថា ៖« នៅពេលក្រោយដែលអ្នក Screenshot ឬថតព័ត៌មាន ម្ចាស់គណនីនេះនឹងមើលឃើញ » ។
គួរបញ្ជាក់ថា Story ដែលបានបង្ហោះនៅលើ Instagram តែងតែបាត់ទៅវិញដោយខ្លួនឯងក្នុងរយៈពេល២៤ម៉ោង ប៉ុន្តែអ្នកប្រើប្រាស់ដទៃអាចលួចរូបភាព ឬវីដេអូទាំងនោះបានយ៉ាងងាយ ។
អ្នកនាំពាក្យរបស់ Instagram ម្នាក់ថា ៖«ពួកយើងតែងតែសាកល្បងវិធីផ្សេងៗដើម្បីធ្វើឲ្យបទពិសោធន៍ប្រើប្រាស់ Instagram ប្រសើរឡើង ហើយអ្នកប្រើប្រាស់ងាយស្រួលក្នុងការចែករំលែកពេលវេលាណាមួយជាមួយមនុស្សសំខាន់ » ។
កម្មវិធី Snapchat ជាដៃគូប្រកួតប្រជែងនោះ មានបច្ចេកវិទ្យានេះជាយូរមកហើយ ដែលបង្ហាញដល់អ្នកប្រើប្រាស់ឲ្យដឹងពេលដែលមាននរណាម្នាក់លួចចម្លងរូបភាព ។
ការ Update មកដល់ iOS 11 ក៏អនុញ្ញាតឲ្យអ្នកប្រើប្រាស់មួយចំនួនអាចថតវីដេអូលើស្គ្រីនរបស់ពួកគេ និងធ្វើឲ្យអ្នកដែលលួចថតជៀសផុតពីការព្រមាននេះផងដែរ ។
លើសពីនេះ វិធីជាច្រើនអាចប្រើប្រាស់ដើម្បីថតរូបភាព និងវីដេអូរបស់អ្នកដទៃ ។ វិធីមួយទៀត គឺការប្រើប្រាស់ Airplane Mode មុនពេលថត ព្រោះការព្រមាននឹងមិនត្រូវបានផ្ញើឡើយ ៕
ចែករំលែកព័តមាននេះ