រាជធានីភ្នំពេញ ៖ ការកម្សាន្តមើលថ្ងៃរៀបលិច និងលំហែអារម្មណ៍ស្រូបខ្យល់អាកាសបរិសុទ្ធនៅតាមដងទន្លេមេគង្គ និងទន្លេចតុមុខ នៅរាជធានីភ្នំពេញ កំពុងពេញនិយមយ៉ាងខ្លាំងពីសំណាក់ភ្ញៀវទេសចរជាតិនិងអន្តរជាតិ ដែលនៅថ្ងៃចុងសប្តាហ៍គឺចំនួនភ្ញៀវជិះកាណូតកំសាន្តបានឡើងដល់៣០០នាក់ឬលើសពីនេះ ។ គេសង្កតឃើញថាការជិះទូកកាណូតកំសាន្តតាមដងទន្លេនាពេលបច្ចុប្បន្ននេះមិនថាពេលព្រឹក…
រាជធានីភ្នំពេញ ៖ ការកម្សាន្តមើលថ្ងៃរៀបលិច និងលំហែអារម្មណ៍ស្រូបខ្យល់អាកាសបរិសុទ្ធនៅតាមដងទន្លេមេគង្គ និងទន្លេចតុមុខ នៅរាជធានីភ្នំពេញ កំពុងពេញនិយមយ៉ាងខ្លាំងពីសំណាក់ភ្ញៀវទេសចរជាតិនិងអន្តរជាតិ ដែលនៅថ្ងៃចុងសប្តាហ៍គឺចំនួនភ្ញៀវជិះកាណូតកំសាន្តបានឡើងដល់៣០០នាក់ឬលើសពីនេះ ។
គេសង្កតឃើញថាការជិះទូកកាណូតកំសាន្តតាមដងទន្លេនាពេលបច្ចុប្បន្ននេះមិនថាពេលព្រឹក ឬពេលល្ងាចនោះទេ គឺមានភ្ញៀវជាតិនិងអន្តរជាតិនាំគ្នាជិះកំសាន្ត តាមដងទន្លេមេគង្គដើម្បីលំហែកាយ ក៏ដូចជាទស្សនាមើលព្រះបរមរាជវាំង និងដងទន្លេសាប ដងទន្លេបាសាក់ ។ ក៏មានភ្ញៀវខ្លះទៀតជួលកាណូតរៀបចំធ្វើកម្មវិធីនៅលើកាណូតតែម្តងមានខួបកំណើតជាដើម គឺមានចំនួនច្រើនលើសលុប ។
យ៉ាងណាមិញ ម្ចាស់កាណូតកំសាន្តបានស្នើដល់អាជ្ញាធរពាក់ព័ន្ធជួយឱ្យមានការរៀបចំតារាងនៃការចេញទូកកំសាន្ត ឱ្យបានត្រឹមត្រូវ ចៀសវាងការចេញទូកកំសាន្តជាន់ម៉ោងគ្នា ឬដណ្តើមម៉ូយគ្នា ។
លោក រិត ណារ៉ាត់ អ្នកគ្រប់គ្រងកាណូតដឹកភ្ញៀវទេសចរជាតិនិងអន្តរជាតិនៅកំពង់ផែស្វយ័តភ្នំពេញ បានរៀបរាប់ឱ្យដឹងថាកាណូតសម្រាប់ដឹកភ្ញៀវទេសចរជាតិ និងអន្តរជាតិនៅកំពង់ផែស្វយ័តភ្នំពេញ មានធុនធំ៥គ្រឿង និងខ្នាតតូចមួយគ្រឿង ។ លោក រិត ណារ៉ាត់ បានបន្តថារូបលោកប្រកបមុខរបរដឹកភ្ញៀវតាមកាណូតនេះអស់រយៈជាង១០ឆ្នាំមកហើយ មួយរយៈមកនេះភ្ញៀវបរទេសនិយមជិះកាណូតកំសាន្ត តាមដងទន្លេសាប និងទន្លេមេគង្គ គយគន់មើលព្រះបរមរាជវាំង ហើយតម្លៃនៃការជិះកាណូតកំសាន្តតាមផ្ទៃទន្លេក្នុងម្នាក់ៗ ចំពោះជនបរទេសគឺមានតម្លៃ៥ដុល្លារ ជនជាតិខ្មែរ៥ពាន់រៀល និងព្រះសង្ឃ៤ពាន់រៀល ។ កាណូតចេញដំណើរកំណត់មួយជុំ៤៥នាទីវិលចូលចំណតវិញ ។ កាណូតមួយៗមានការរៀបចំលំអរយ៉ាងស្អាតខាងក្នុងក៏ដូចលើដំបូលនិងខាងក្រៅមើលឃើញគួរឱ្យចង់ជិះកំសាន្ត ។
ម្ចាស់ទូកកំសាន្តរូបនេះបន្តទៀតថា ក្នុងមួយថ្ងៃមានភ្ញៀវបរទេសដូចជា ជាជនជាតិចិន វៀតណាម និងអឺរ៉ុបប្រហែលជា៧០នាក់ ទៅ១០០នាក់មកជិះកាណូតនៅកំពង់ផែស្វយ័តភ្នំពេញ ហើយសម្រាប់ថ្ងៃចុងសប្តាហ៍វិញសៅរ៍និងថ្ងៃអាទិត្យគឺភ្ញៀវជាតិនិងអន្តរជាតិមកជិះកាណូតមានចំនួនកើនឡើងគុណនឹង២ទៅ៣ឯណោះធៀបនឹងថ្ងៃធម្មតា ។ បើតាមការសង្កេតឃើញពិតជាមានកើនឡើងចំពោះភ្ញៀវបរទេសនិយមជិះកាណូតកំសាន្តតាមដងទន្លេនៅពេលបច្ចុប្បន្ន ខណៈប្រទេសកម្ពុជាមានសុខសន្តិភាពល្អ ។
លោក រិត ណារ៉ាត់ មានប្រសាសន៍បន្តថា «ចំនួនភ្ញៀវទេសចរណ៍ជិះទូកកំសាន្តតាមដងទន្លេ ក៏ដូចជាស្រូបយកអាកាសធាតុបរិសុទ្ធ គឺមានចំនួនកើនឡើងច្រើន បើធៀបនឹងបណ្តាឆ្នាំមុនៗ ។ ក្នុងនោះផងដែរ ភ្ញៀវក្នុងស្រុកក៏មានការកើនឡើង ជាពិសេសពួកគាត់និយមជួលកាណូតកំសាន្តដើម្បីជប់លៀងមិត្តរួមអាជីព ឬក៏ជាលក្ខណៈគ្រួសារផងដែរ» ។ លោកបន្តថា ចំពោះបាតុភាពមិនប្រក្រតីណាមួយគឺមិនមានកើតឡើងម្តងណាឡើយរវាងម្ចាស់កាណូតក៏ដូចជាអ្នកគ្រប់គ្រងកំពង់ផែស្វយ័តភ្នំពេញ យើងតែងតែយកចិត្តទុកដាក់ទៅលើសុវត្ថិភាព សណ្តាប់ធ្នាប់ចំពោះភ្ញៀវជាតិនិងអន្តរជាតិពេលជិះកាណូត ។
លោក រិន ណារ៉ាត់ បានបញ្ជាក់ថា កាណូតទេសចរណ៍ដែលចតនៅមុខក្រុមប្រឹក្សាអភិវឌ្ឍន៍កម្ពុជា (CDC) កាណូតទាំងនោះគឺមានសមាគមទូកទេសចរណ៍ ។ ដោយឡែកកាណូតនៅកំពង់ផែស្វយ័តភ្នំពេញ មានកាណូតធំ៥គ្រឿងនិងកាណូតតូចមួយគ្រឿងជាកម្មសិទ្ធរបស់លោក ដោយកាណូតលោកមានឯកសារត្រឹមត្រូវចេញពីមន្ទីរជំនាញទើបលោកជួលទីតាំងពីកំពង់ផែស្វយ័តភ្នំពេញធ្វើអាជីវកម្មដឹកភ្ញៀវជាតិ អន្តរជាតិហើយបង់ប្រាក់ប្រចាំខែឱ្យទៅកំពង់ផែស្វយ័តផងដែរ ។
ចំណែកអ្នកស្រី ស្រីម៉ៅ អាយុ៣២ឆ្នាំ មានស្រុកកំណើតនៅភូមិមហាសៀក ឃុំមហាខ្ញូង ស្រុកកោះសូទិន ខេត្តកំពង់ចាមដែលជាម្ចាស់កាណូតឈ្មោះ រ៉ាវី បាននិយាយឱ្យដឹងថា សព្វថ្ងៃនេះអ្នកស្រីមានកាណូត៣គ្រឿងយីហោ រ៉ា វី សម្រាប់ដឹកភ្ញៀវជាតិ និងអន្តរជាតិក៏ដូចជាជួលជិះកំសាន្តមើលទេសភាពតាមដងទន្លេមេង្គដងទន្លេសាបនិងជួលរៀបចំកម្មវិធីលើកាណូតផងដែរ ហើយអ្នកស្រីបានប្រកបមុខរបរនេះអស់រយៈពេល១២ឆ្នាំមកហើយ ។
បច្ចុប្បន្ននេះការណូតរបស់អ្នកស្រីដឹកភ្ញៀវជាតិនិងអន្តរជាតិ ដែលភាគច្រើនជាជនជាតិចិននិងវៀតណាម ក្នុងមួយថ្ងៃរកបានប្រាក់ចំណេញទាបបំផុតក៏៥០ដុល្លារ ហើយថ្ងៃដែលសំបូរភ្ញៀវគឺថ្ងៃសៅរ៍ និងថ្ងៃអាទិត្យនិងរដូវបុណ្យទាន ។
អ្នកស្រីបន្តថា ការរកសុីមុខរបរដឹកភ្ញៀវតាមកាណូតនេះ កាលពីដើមជួបផលវិបាកច្រើនដោយសារតែមានសមត្ថកិច្ចជំនាញមួយចំនួនតូចមករករឿងទាមទារលិខិតស្នាមនិងបង្ខំឱ្យបង់លុយតាមតែគេនិយាយ ក៏ប៉ុន្តែឥឡូវនេះមានសភាពធូរស្រាលច្រើនសមត្ថកិច្ចជំនាញគាត់យល់យោគច្រើនណាស់ ។
អ្វីដែលជួបការលំបាកនោះគឺបច្ចុប្បន្ននេះកាណូតមានរហូតទៅដល់ជាង៧០គ្រឿង ហើយការមកសំចតនៅមុខក្រុមប្រឹក្សារអភិវឌ្ឍន៍កម្ពុជា (CDC) តាមបណ្តោយវិថីព្រះសុីសុត្ថិ ស្ថិតក្នុងសង្កាត់ស្រះចក ក្នុងទឹកដីខណ្ឌដូនពេញមិនសូវមានអំណោយផល ម្យ៉ាងវិញទៀតសមាគមកាណូតទេសចរណ៍ដែលបោះឆ្នោតជ្រើសរើសបានកន្លងមកគឺ មិនមានសកម្មភាពនោះទេ ។ ដូច្នេះអ្នកស្រីសុំឱ្យមន្ទីរទេសចរណ៍រាជធានីភ្នំពេញ រៀបចំឱ្យមានសមាគមកាណូតទេសចរណ៍ ដើម្បីដំណើរការនិងសម្រាប់ពេលម្ចាស់កាណូតជួបផលវិបាកណាមួយ រត់ទៅពឹងពាក់ជួយដោះស្រាយ បើសិនដូចជាសកម្មភាពសព្វថ្ងៃ គឺបងប្អូនម្ចាស់កាណូតពិតជាពិបាកណាស់ ហើយម្យ៉ាងវិញទៀតបច្ចុប្បន្ននេះដែរលេចឮថា ចំណតកាណូតសព្វថ្ងៃនេះគឺបំរុងនិងរុះរើទៅទីតាំងថ្មីតែមិនដឹងទៅកន្លែងណាឱ្យច្បាស់លាស់នៅឡើយទេ ។
អ្នកស្រី ស្រីម៉ៅ បានបន្ថែមថាសព្វថ្ងៃនេះអ្នកស្រីក៏ដូចជាក្រុមគ្រួសារជាអ្នកចាំចាប់ភ្ញៀវដាក់កាណូត ហើយភាគច្រើនរកភ្ញៀវដែលជួលកាណូតផ្តាច់តែម្តង គឺក្នុងមួយម៉ោងតម្លៃ២៥ដុល្លារ សរុបមកវិញអ្នកស្រីអាចរកចំណូលបានក្នុងមួយ១ខែច្រើនបំផុត៥០០ដុល្លារ តិចបំផុតក៏បាន៣០០ដុល្លារដែរ ។ តែទោះជាយ៉ាងណាអ្នកស្រីនៅតែចង់ឱ្យមានសមាគមកាណូតទេសចរណ៍នេះឡើងវិញ ដើម្បីឱ្យសមាគមគាត់រៀបចំកាណូតចេញបានវេនច្បាស់លាស់ ព្រោះបច្ចុប្បន្ននេះនៅខេត្តសៀមរាបមានការរៀបចំយ៉ាងល្អ គ្មានភាពអនាធិបតេយ្យរត់ចាប់គ្មានសណ្តាប់ធ្នាប់នោះទេ ។
លោក អ៊ិត សំណាង មគ្គុទេសក៍ទេសចរណ៍មួយរូបបានលើកឡើងថា បច្ចុប្បន្ននេះភ្ញៀវអន្តរជាតិមិនថា អាសុី ឬអឺរ៉ុបនោះទេមានការកើនឡើងពីមួយថ្ងៃទៅមួយថ្ងៃ ហើយពួកគេនិយមជិះកាណូតជាលក្ខណៈតាមទួរ (Tour) ហើយក៏មានអ្នកខ្លះទៀតគេជិះតាមក្រុមគ្រួសារនិងមានអ្នកខ្លះទៀតរៀបចំកម្មវិធីជួបជុំគ្នានៅលើកាណូតតែម្តង ។
មគ្គុទេសក៍ទេសចរណ៍រូបនេះបញ្ជាក់ថា «ភ្ញៀវបរទេសគេជិះកាណូតដោយសារចង់គយគន់មើលទេសភាពនៅពេលល្ងាចថ្ងៃរៀបលិច មើលដងទន្លេសាប និងដងទន្លេមេគង្គហើយក៏មានភ្ញៀវអាស៊ីនិងអឺរ៉ុបបានសរសើរដល់ការដឹកជញ្ជូនភ្ញៀវតាមកាណូតមានលក្ខណៈល្អប្រសើរទាំងផ្នែកសន្តិសុខនិងសណ្តាប់ធ្នាប់ល្អដោយកាណូតរៀបចំទូលាយដាក់មនុស្សមិនមានការប្រជ្រៀតគ្នាឡើយ ហើយពួកគេក៏បានកោតសរសើរការអភិវឌ្ឍន៍នៅរាជធានីភ្នំពេញ មានការរីកចម្រើនយ៉ាងខ្លាំងលើគ្រប់វិស័យដែលម្នាក់ៗនឹកស្មានមិនដល់សោះ ។ ជាពិសេសពួកគាត់មានអារម្មណ៍ជ្រះថ្លាបាត់អស់ស្ត្រេសពេលបានកំសាន្តតាមកាណូតកំសាន្តលើផ្ទៃជលសារនេះ» ។
អ្នកស្រី នង ចន្ថា ប្រជាពលរដ្ឋរស់នៅរាជធានីភ្នំពេញបាននិយាយថា ជារៀងរាល់
សប្តាហ៍អ្នកស្រីតែងតែចំណាយលុយអស់៥ពាន់រៀលដើម្បីនាំកូនជិះកាណូតទេសចរណ៍នៅកំពង់ផែស្វយ័តភ្នំពេញដើម្បីគយគន់មើលទេសភាពតាមដងទន្លេសាប ទន្លេមេគង្គ កោះពេជ្រនិងមុខព្រះបរមរាជវាំង ហើយជាការបន្ធូរអារម្មណ៍ផងដែរក្រោយពីបញ្ចប់ការងារ ។ ដោយឡែកកាណូតទេសចរណ៍នៅមុខក្រុមប្រឹក្សាអភិវឌ្ឍន៍កម្ពុជា(CDC) គេមិនដឹកភ្ញៀវដូចអ្នកស្រីនោះទេ គឺគេរង់ចាំដឹកភ្ញៀវបរទេស បើដឹកភ្ញៀវខ្មែរលុះត្រាតែភ្ញៀវនោះប៉ាវកាណូតតែម្តងគឺក្នុងមួយម៉ោងតម្លៃ២៥ដុល្លារសម្រាប់មនុស្ស២០នាក់ជិះមួយជុំ ។
លោក ជិត ណារិទ្ធ ប្រធានការិយាល័យទេសចរណ៍ខណ្ឌដូនពេញបានឱ្យដឹងថា បច្ចុប្បន្ននេះកាណូតទេសចរណ៍ដែលសំចតនៅមុខក្រុមប្រឹក្សាអភិវឌ្ឍន៍កម្ពុជា(CDC)តាមបណ្តោយវិថីព្រះសុីសុវត្ថិ ស្ថិតក្នុងសង្កាត់ស្រះចក ខណ្ឌដូនពេញ មានច្បាប់អនុញ្ញាតឱ្យធ្វើអាជីវកម្មចំនួន៥៨កាណូត តែមានការបែងចែកជាពីរ មួយគ្រប់គ្រងដោយកំពង់ផែស្វយ័តភ្នំពេញ មួយទៀតគ្រប់គ្រងដោយមន្ទីរទេសចរណនិងមន្ទីរសាធារណៈការរាជធានីភ្នំពេញ ។
មន្ទីរសាធារណៈការជាអ្នកចេញលិខិតអនុញ្ញាតឱ្យធ្វើអាជីវកម្មនិងត្រួតពិនិត្យបច្ចេកទេស មន្ទីរទេសចរណ៍ជាអ្នកចេញលិខិតអនុញ្ញាតសេវាកម្មល្អនិងម្ហូបអាហារនៅលើកាណូតនេះនិយាយតែកាណូតដែលសំចតនៅមុខក្រុមប្រឹក្សាអភិវឌ្ឍន៍កម្ពុជា(CDC)តែប៉ុណ្ណោះ ។
លោក ជិត ណារិទ្ធ បញ្ជាក់ថាកន្លងមកការិយាល័យទេសចរណ៍ខណ្ឌដូនពេញបានធ្វើការណែនាំនិងសូមឱ្យបងប្អូនម្ចាស់កាណូតទេសចរណ៍ប្រតិបត្តិករកាណូតទេសចរណ៍ ចូលរួមគោរពច្បាប់និងជួយសម្អាតបរិវេណជុំវិញផែ ដែលបងប្អូនកំពុងធ្វើអាជីវកម្មឱ្យស្អាតនិងបៃតងដូចពាក្យស្លោកថា«ខ្ញុំស្រឡាញ់ក្រុងស្អាត សុខសុវត្ថិភាពល្អ ទេសចរណ៍មានកំណើន» ៕
ចែករំលែកព័តមាននេះ