រាជធានីភ្នំពេញ ៖ តារាចម្រៀងពេជ្រ សោភា បាននាំក្រុមរាំជាច្រើននាក់សម្តែងក្នុងកម្មវិធី«តន្ត្រីខារ៉ាបាវ»នៅក្លឹបកម្សាន្តស្ប៉ាកតាវ៉ាន់ឌេន ដែលជាកម្មវិធីប្រគំតន្ត្រីថ្មីរបស់ទូរទស្សន៍ប៉ុស្តិ៍លេខ៥ កាលពីពេល ថ្មីៗកន្លងមក ។
ចំពោះពេជ្រ សោភា នាឱកាសនោះលេងឈុតលំដាប់យុវវ័យដោយពាក់ស្បែកជើង ប្លែករំលេចឌិនភ្លឺផ្លេកយ៉ាងពិសេស ។ ស្បែកជើងនេះមិនមានលក់នៅស្រុកខ្មែរទេ គឺនាងជ្រើសរើសពីបរទេស ហើយឃើញតារាស្រីហូលីវូដម្នាក់ និងតារាសម្តែងស្រីល្បីឈ្មោះនៅស្រុកថៃពាក់ដែរ ។
ពេជ្រ សោភា ដែលគ្រងស្បែកជើងស្អាតមានតម្លៃ និងរំលេចគល់ភ្លៅឱ្យដឹងថា ស្បែកជើងនេះនាងបញ្ជាទិញពីក្រៅប្រទេសដែលម៉ូដែលនេះមានតារាបរទេសពាក់ដែរ ទាំងតារាថៃផងដែរ ។ ស្បែកជើងនេះនាងទិញ៥គូដែលនឹងយកទៅសម្តែងតាមឆាកតន្ត្រីក្នុងន័យឱ្យប្លែក ។ មិនថ្លៃពេកទេ ១គូជាង១ពាន់ដុល្លារ បើទោះជាថ្លៃសម្រាប់នាងតែដើម្បីចំណីអារម្មណ៍នាងនឹងធ្វើ ។ ពេជ្រ សោភា ស្នើដល់មហាជនកុំគិតថានាងមានភាពអួតអាង ព្រោះនេះជាការចោទសួររបស់អ្នកសារព័ត៌មានដែលជួបនាងផ្ទាល់ពេលកំពុងសម្តែង ។
អ្នកនាងពេជ្រ សោភា ឱ្យដឹងថា ស្បែកជើងភាគច្រើនដែលនាងពាក់ គឺជាម៉ូដស្បែកជើងដែលតារាចម្រៀងពិភព ល្បីៗប្រើ ដោយស្បែកជើងទាំងនោះសុទ្ធតែមានតម្លៃជាង១ពាន់ដុល្លារ ។ ស្បែកជើងរបស់នាងមិនមែនមានតែមួយគូ ឬ២គូទេ គឺមានរហូតដល់៤ទូ ដែលសរុបច្រើនគួរសមដែរ ។ ស្បែកជើងដែលនាងបានប្រើហើយមិនឈប់ពាក់នោះទេ ដោយនាងត្រូវប្រើឆ្លាស់គ្នា លើកលែងតែម៉ូដចាស់ខ្លាំងទើបនាងដាក់តាំង ឬឲ្យទៅគេតែម្ដង ។
ពេជ្រ សោភា ឆ្លៀតនិយាយដែរពីតារាដែលយល់ថា ច្រៀងក្នុងពិធីមង្គលការស្រួលយកលុយ ។ នោះជាចំណូលចិត្តរបស់គេ ប៉ុន្តែសម្រាប់នាងអត់ចូលចិត្តទេ លើកលែងតែមង្គលការហ៊ានចំណាយឱ្យត្រូវនឹងតម្លៃដូចដែលនាងចេញច្រៀងតាមខេត្តក្រុង ។ មានពិធីមង្គលការរាប់មិនអស់រួចមកហើយ ដែលនាងច្រានចោល មិនថាម្ចាស់ពិធីទាក់ទងមកដោយផ្ទាល់ ឬតាមរយៈអ្នករៀបចំកម្មវិធី ។ ទោះជាយ៉ាងណាក្តីនាងនៅប្រកាន់ជំហរជួយច្រៀងក្នុងកម្មវិធីសប្បុរសធម៌ដោយមិនគិតកម្រៃ ដើម្បីចែករំលែកក្ដីស្រឡាញ់ដល់អ្នកគាំទ្រ និងសង្គម ៕
ចែករំលែកព័តមាននេះ