រាជធានីភ្នំពេញ ៖ អាជ្ញាធរសង្កាត់ព្រៃស បានរៀបចំធ្វើពិធីប្រណាំងរទេះគោលើកទី៣៩ រំឭកដល់ម្ចាស់ទឹកម្ចាស់ដី ជាពិសេសរក្សាទំនៀមទម្លាប់ប្រពៃណីតមកពីបុរាណ ។ ពិធីនេះបានប្រព្រឹត្តទៅកាលពីវេលាព្រឹកថ្ងៃទី១១ ខែកុម្ភៈ ឆ្នាំ២០១៨ នៅទីលានប្រណាំងរទេះគោ នៅក្នុងភូមិព្រៃសខាងកើត សង្កាត់ព្រៃស ខណ្ឌដង្កោ រាជធានីភ្នំពេញ ។
លោកស្រីតង់ សំអូន ប្រធានក្រុមការងារសង្កាត់ព្រៃស និងលោកខាត់ សុខៃ ចៅសង្កាត់ព្រៃសបានចូលរួមជាកិត្តិយស ក្រោមការចូលរួមពីកីឡាករប្រណាំងទេះគោ និងប្រជាពលរដ្ឋច្រើនកុះករ ។
អាជ្ញាធរសង្កាត់ព្រៃសឲ្យដឹងថា គោដែលចូលរួមប្រណាំងយកចំណាត់ថ្នាក់ និងជ័យលាភីមានចំនួន១១នឹម ពីខេត្តកណ្ដាលចំនួន៧នឹម ខេត្តកំពង់ស្ពឺចំនួន៣នឹម និងរាជធានីភ្នំពេញ១នឹម ។ គណៈកម្មការរៀបចំការប្រណាំងកំណត់យក៣ចំណាត់ថ្នាក់ចាប់ពីលេខ១ដល់លេខ៣ ។
អាជ្ញាធរសង្កាត់ព្រៃសតែងតែប្រារព្ធធ្វើពិធីប្រណាំងគោជារៀងរាល់ឆ្នាំចាប់តាំងពីក្រោយថ្ងៃជ័យជម្នះ៧មករារហូតមក ។ នេះគឺជាលើកទី៣៩ហើយ តាមទំនៀមទម្លាប់ប្រពៃណីដ៏ល្អផូរផង់របស់ប្រជាជាតិខ្មែរយើង ជាពិសេសទៀតនោះក៏ជាការថែរក្សាវប្បធម៌តពីដូនតាបន្សល់ទុកឲ្យផង និងរំឭកគុណម្ចាស់ទឹកដី ព្រមទាំងកុំឲ្យក្មេងៗជំនាន់ក្រោយភ្លេចពីទំនៀមទម្លាប់មួយនេះផង ។
ជ័យលាភីចំណាត់ថ្នាក់លេខ១បានទៅលើរទេះគោពីខេត្តកណ្ដាល។ ចំណាត់ថ្នាក់លេខ២បានទៅរទេះគោនៅភ្នំពេញ ។ ចំណាត់ថ្នាក់លេខ៣គោបានទៅរទេះគោពីខេត្តកំពង់ស្ពឺ ។ រង្វាន់ជ័យលាភី គឺចំណាត់ថ្នាក់លេខ១ទទួលបានប្រាក់ចំនួន៥០ម៉ឺនរៀល។ ចំណាត់ថ្នាក់លេខ២បានចំនួន៤០ម៉ឺនរៀល។ ចំណាត់ថ្នាក់លេខ៣ចំនួន៣០ម៉ឺនរៀល។
ចំពោះរទេះគោដែលមិនបានជាប់ចំណាត់ថ្នាក់ទទួលបានការលើកទឹកចិត្តចំនួន២០ម៉ឺនរៀល។
នៅទីបញ្ចប់ពិធី់លោកខាត់ សុខៃ ចៅសង្កាត់ព្រៃសបានរៀបចំអាហារសាមគ្គីជូនក្រុមកីឡាករនិងក្រុមការងារ ៕
ចែករំលែកព័តមាននេះ