រាជធានីភ្នំពេញ ៖ បុរសម្នាក់គ្រាន់តែដឹងថា ជាយោធាការពារព្រំដែនខឹងបើករថយន្តកៀរគ្នាបានឈប់រថយន្តដកកាំភ្លើងខ្លីបាញ់មេឃចំនួនមួយគ្រាប់ធ្វើឲ្យប្រជាពលរដ្ឋផ្ទុះកំហឹងព្រួតវាយរហូតសន្លប់ស្តូកស្តឹង បង្កការភ្ញាក់ផ្អើលកាលពីវេលាម៉ោង១១និង៤០នាទីយប់ថ្ងៃទី០៣ ខែ កុម្ភះ ឆ្នាំ២០១៨ នៅចំណុចក្បែរវត្តដំបូកខ្ពស់ តាមផ្លូវ២៧១ សង្កាត់បឹងទំពុនទី២ ខណ្ឌមានជ័យ ។
សមត្ថកិច្ចនគរបាលមូលដ្ឋានបានបញ្ជាក់ថា មុនពេលកើតហេតុមានប្រជាពលរដ្ឋបានរាយការណ៍ថា មានរថយន្ត២គ្រឿងមិនចាំម៉ាកបើកកៀរគ្នាតិចតួច ស្រាប់តែអ្នកបើករថយន្តទាំង ពីរគ្រឿងបានឈប់ឈ្លោះប្រកែកគ្នា ហើយភាគីម្ខាងដែលជាយោធាការពារព្រំដែនបានដក កាំភ្លើងខ្លីមកបាញ់ឡើងលើមួយគ្រាប់ ធ្វើឲ្យភាគីម្ខាងទៀត រួមជាមួយប្រជាពលរដ្ឋផ្ទុះកំហឹងដោយសារតែរឿងតិចតួចអាងបាញ់បោះបង្កអសន្តិសុខក្នុងសង្គមក៏បាននាំគ្នាព្រួតវាយរហូតសន្លប់ហើយភាគីរថយន្តម្ខាងទៀតនោះបើកចេញទៅបាត់ ។
ពេលសមត្ថកិច្ចចុះទៅដល់ ឃើញតែបុរសដែលបាញ់បោះនោះសន្លប់ក៏បានហៅរថយន្តសង្គ្រោះឯកជនដឹកយកទៅព្យាបាល ចំណែកកាំភ្លើងខ្លីត្រូវកងរាជអាវុធហត្ថខណ្ឌមានជ័យយកទៅរក្សាទុក ។
កងរាជអាវុធហត្ថខណ្ឌបានបញ្ជាក់ថា ពិតជាបានដកហូតកាំភ្លើងខ្លីម៉ាកឡុកយកទៅរក្សាទុកពិតប្រាកដមែន បន្ទាប់ពីមានការផ្ទុះអាវុធកម្លាំងអាវុធហត្ថបានប្រញាប់ចុះទៅពិនិត្យ កន្លែងកើតហេតុឃើញមានបុរសម្នាក់សន្លប់ស្តូក ហើយមានសន្តិសុខឯកជនដែលយាមនៅហាងខារ៉ាអូខេក្បែរនោះបានយកកាំភ្លើងខ្លីរបស់បុរសដែលសន្លប់នោះមកប្រគល់ឲ្យ ចំណែកអ្នកដែលបាញ់បោះនោះ គ្រាន់តែបានស្គាល់ថា ឈ្មោះ ហៀង សុភា អាយុ៣២ឆ្នាំ ទាហានយោធាការពារព្រំដែន ។ បច្ចុប្បន្នបុរសដែលបាញ់បោះកំពុងតែសម្រាកព្យាបាលនៅគ្លីនិកឯកជន ៕
ចែករំលែកព័តមាននេះ