ខេត្តកំពត ៖ ស្ត្រីដែលនាំកូនប្រុស២មកដេកនៅផ្ទះសំណាក់ ក្នុងស្រុកអង្គរជ័យដែលថា មានទំនាស់ជាមួយប្តី ហើយបានប៉ុនប៉ងបញ្ចប់ជីវិតទាំងបីនាក់ម្តាយ និងកូននៅក្នុងផ្ទះសំណាក់តែមិនបានសម្រេច ស្លាប់តែកូនប្រុសពីរនាក់ ។ ស្ត្រីជាម្តាយក្មេងឈ្មោះ…
ខេត្តកំពត ៖ ស្ត្រីដែលនាំកូនប្រុស២មកដេកនៅផ្ទះសំណាក់ ក្នុងស្រុកអង្គរជ័យដែលថា មានទំនាស់ជាមួយប្តី ហើយបានប៉ុនប៉ងបញ្ចប់ជីវិតទាំងបីនាក់ម្តាយ និងកូននៅក្នុងផ្ទះសំណាក់តែមិនបានសម្រេច ស្លាប់តែកូនប្រុសពីរនាក់ ។
ស្ត្រីជាម្តាយក្មេងឈ្មោះ ផុន សុខហេ ង អាយុ២៧ឆ្នាំ រស់នៅភូមិក្តី ឃុំសឹង្ហ ស្រុកសំរោង ខេត្តតាកែវ បច្ចុប្បន្នរស់នៅភូមិក្តី ឃុំសឹង្ហ ស្រុកសំរោង ខេត្តតាកែវ មុខរបរលក់ថ្នាំបុក(ថ្នាំបុរាណ) ។
ជុំវិញករណីឃាតកម្មសម្លាប់កូនប្រុស២នាក់ ស្លាប់នៅក្នុងផ្ទះសំណាក់ ដោយដាក់ថ្នាំបំពុលនៅក្នុងបាយតាមការចោទជាបឋមនោះ ។ នៅពេលនេះសមត្ថកិច្ចជំនាញធ្វើការសាកសួរស្ត្រីនោះបានសារភាពប្រាប់ថា ខ្លួន និងប្តីបានលែងលះគ្នានៅសាលាឃុំព្រៃស្លឹក ស្រុកទ្រាំង ខេត្តតាកែវ មូលហេតុនៃការលែងលះគ្នានេះ គឺបណ្តាលមកពីប្តីខ្លួនស្រឡាញ់ស្រីថ្មីម្នាក់ទៀត ហើយរស់នៅជាមួយគ្នា ខ្លួនជាប្រពន្ធការពេញច្បាប់និយាយអ្វីក៏មិនស្តាប់ខ្លួនទាល់តែសោះ ។ ស្ត្រីរូបនេះបានឲ្យដឹងទៀតថា «ប្តីខ្ញុំបាននិយាយមកកាន់ខ្ញុំថា គេសុខចិត្តបោះបង់រូបខ្ញុំ និងកូនប្រុសទាំង២នាក់ ដោយទៅយកប្រពន្ធថ្មីវិញ » ។ ស្ត្រីបន្តថា ខ្ញុំចង់ជួបនាងនោះផ្ទាល់មាត់ តែមិនបានជួបទេបានជួបតែតាមទូរស័ព្ទ ហើយមូលហេតុដែលខ្លួនចង់ជួបនេះដោយចង់និយាយប្រាប់ស្រីម្នាក់នោះឲ្យដឹងថា ខ្លួនមានកូនដល់ទៅ២នាក់ ជាមួយប្តីរបស់ខ្លួនទៅហើយ តើបងគិតយ៉ាងម៉េចជាមួយប្តីខ្ញុំ ។
ដោយនាងជាស្រីថ្មី ប្តីខ្លួនបានប្រាប់ខ្លួនតាមទូរស័ព្ទថា ទាល់តែជួបគ្នាផ្ទាល់មាត់ទាំង៣នាក់ ទើបនិយាយគ្នាបាន ។ ស្ត្រីរូបនេះបានបន្តទៀតថា ជាចុងក្រោយប្តីខ្លួនបាននិយាយថា គេសម្រេចចិត្តជ្រើសរើសយកអ្នកថ្មីហើយ ចំណែកខ្ញុំទៅណាក៏ទៅចុះពេលនោះ ខ្ញុំសុំពេលប្តីរយៈពេល១០ថ្ងៃ ដើម្បីធ្វើការដោះស្រាយគ្នា តែប្តីខ្ញុំនៅតែមិនព្រម ខ្ញុំក៏សម្រេចចិត្តនាំកូនប្រុស ២នាក់ចាកចេញពីផ្ទះ នៅថ្ងៃអាទិត្យទី២៨ ខែមករានេះ ដោយមធ្យោបាយម៉ូតូម៉ាកសេ១២៥ ស៊េរី២០០៤មួយគ្រឿង ដឹកកូនប្រុស២នាក់ កូនទី១- ឈ្មោះ សុវណ្ណ មិ អាយុ៨ឆ្នាំ ទី២- ឈ្មោះ សុវណ្ណ វិមាន អាយុ៣ឆ្នាំ២ខែ មកជួលផ្ទះសំណាក់ឈ្មោះ សុខមនោ ឃុំភ្នំកុង ខេត្តកំពត ដេកចំនួន២យប់ ។
លុះនៅវេលាម៉ោងប្រហែលជា៨យប់ថ្ងៃទី២៩ ខែមករានេះខ្លួនក៏បានទៅទិញថ្នាំងងុយដេកចំនួន៤ បន្ទះ ក្នុងនោះថ្នាំល្អ៣បន្ទះ មិនល្អ១បន្ទះ ។ នៅក្នុងយប់នោះខ្លួនដេកមិនលក់ទេនៅម៉ោងជិត៩យប់ កូនខ្លួនទាំង២នាក់បានលេបថ្នាំងងុយដេកអស់២បន្ទះ ខ្លួនមិនបានប្រាប់ឲ្យវាលេបទេ លុះដល់ម៉ោង១២យប់ ខ្លួនក៏លេបថ្នាំងងុយដេកអស់២បន្ទះ និងថ្នាំស្លពណ៌ខ្មៅ(ថ្នាំខ្មែរ) អស់ចំនួន៦០គ្រាប់ ដើម្បីបញ្ចប់ជីវិតតែមិនស្លាប់គ្រាន់តែមានអាការវិល អាចនៅនិយាយបាន តែកូនទាំង២ ប្រហែលជាស្លាប់ទៅហើយ ។ លុះព្រឹកឡើងម៉ោង៦ជាង ថ្ងៃទី៣០ខែមករានេះ ខ្លួនបានទូរស័ព្ទប្រាប់ប្តីថា កូនយើងទាំង ២នាក់បានស្លាប់ទៅហើយ ។ ចំណែកខ្លួនម៉ោងប្រហែលជា១០ព្រឹកថ្ងៃដដែល ត្រូវបានបងប្អូនខ្លួនដឹកទៅសង្គ្រោះនៅមន្ទីរពេទ្យខេត្តតាកែវ លុះអាការពុលរាងធូរស្រាលបន្តិច នៅល្ងាចថ្ងៃដដែលនេះក៏ត្រូវបានក្រុមគ្រូពេទ្យបញ្ជូនមកមន្ទីរពេទ្យខេត្តកំពត តាមការស្នើរបស់សមត្ថកិច្ចជំនាញការិយាល័យនៃស្នងការដ្ឋាននគរខេត្ត ដើម្បីសាកសួរជុំវិញករណីបំពុលថ្នាំសម្លាប់កូនប្រុស២នាក់ នៅក្នុងផ្ទះសំណាក់កាលពីយប់ថ្ងៃទី២៩ ខែមករានេះ ។
លោកវរសេនីយ៍ទោ ឈិន ឈាង នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត បានប្រាប់នៅមន្ទីរពេទ្យបង្អែកខេត្តកំពតកាលពីល្ងាចថ្ងៃទី៣០ ខែមករានេះថា ស្ត្រីដែលប៉ុនប៉ងធ្វើអត្តឃាតដោយចេតនាមិនបានសម្រេច ហើយស្លាប់តែកូនប្រុស២នាក់ខាងលើ អាចជាប់ពាក់ព័ន្ធពីករណីប៉ុនប៉ងធ្វើឃាតដោយចេតនា ហើយប្រឈមមុខត្រូវកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីនូវពេលជំងឺបានសះស្បើយ ៕
ចែករំលែកព័តមាននេះ