រាជធានីភ្នំពេញ ៖ រដ្ឋលេខាធិការក្រសួងសាធារណការនិងដឹកជញ្ជូន លោក តូច ចាន់កុសលមានប្រសាសន៍ថា បន្ទាប់ពីក្រសួងដាក់ឱ្យការមានចុះបញ្ជីតាមប្រព័ន្ធស្វ័យប្រវត្តិកម្មថ្មីកាលពីឆ្នាំ២០១៦ រហូតដល់ឆ្នាំ២០១៧ គឺជាមធ្យមក្នុងមួយខែមានទោចក្រយានយន្ត និងរថយន្តមកចុះបញ្ជីប្រមាណ១,៥ម៉ឺនគ្រឿង ។
ថ្លែងប្រាប់ក្រុមអ្នកសារព័ត៌មាន ក្នុងសន្និសីទសារព័ត៌មានស្តីពីគម្រោងទំនើបកម្មប្រព័ន្ធចុះបញ្ជីនិងត្រួតពិនិត្យបច្ចេកទេសយានយន្ត កាលពីថ្ងៃទី៣០ ខែមករា នៅស្ថានទូតជប៉ុន លោករដ្ឋលេខាធិការបន្តថា គិតមកដល់បច្ចុប្បន្ន ទោចក្រយានយន្តបានចុះបញ្ជីមានប្រមាណ៤លានគ្រឿងនៅទូទាំងប្រទេស តែការចុះបញ្ជីយានយន្តតាមប្រព័ន្ធស្វ័យប្រវត្តិកម្មថ្មី ដែលប្រើប្រាស់បច្ចេកវិទ្យាគិតចាប់ពីឆ្នាំ២០១៦ដល់ឆ្នាំ២០១៧ កន្លងទៅ ជាមធ្យមក្នុងមួយខែមានប្រមាណ១,៥ម៉ឺនគ្រឿង ក្នុងនោះទោចក្រយានយន្តមានប្រមាណ១ម៉ឺនគ្រឿង និងរថយន្តមាន៥ពាន់គ្រឿង ខណៈដែលមជ្ឈមណ្ឌលត្រួតពិនិត្យលក្ខណៈបច្ចេកទេសមានចំនួន១៤ទីតាំងនៅទូទាំងប្រទេស ។
តាមលោករដ្ឋលេខាធិការថា ការចុះបញ្ជីតាមប្រព័ន្ធថ្មីមានការកើនឡើង តែធនធានមនុស្សដែលប្រើប្រាស់បច្ចេកវិទ្យានិងការគ្រប់គ្រងនៅមានកម្រិត ដែលទាមទារឱ្យមានការបណ្តុះបណ្តាលជំនាញបន្ថែមពីដៃគូសហការទៅលើកិច្ចការនេះ ដើម្បីឆើ្លយតបនឹងការងារ ក៏ដូចដើរឱ្យទាន់ការវិវឌ្ឍនៃបច្ចេកវិទ្យា ។
លោកបន្តថា បើទោះបីប្រព័ន្ធចុះបញ្ជីយានយន្តនិងការត្រួតពិនិត្យបច្ចេកទេសយានយន្តនៅកម្ពុជា ត្រូវបានបង្កើតឡើងក៏ពិតមែន តែការគ្រប់គ្រងប្រព័ន្ធនេះនៅមានការលំបាកលើបញ្ហាផ្សេងៗដែលត្រូវការដោះស្រាយ ។ ចំពោះបញ្ហាទាំងនេះ រាជរដ្ឋាភិបាលកម្ពុជាបានស្នើសុំរាជរដ្ឋាភិបាលជប៉ុន ជួយគាំទ្រផ្នែកបច្ចេកទេស សម្រាប់គ្រប់គ្រងប្រព័ន្ធចុះបញ្ជីយានយន្ត និងត្រួតពិនិត្យលក្ខណៈបច្ចេកទេសយានយន្តឱ្យមានប្រសិទ្ធភាព ។
ចាប់តាំងពីខែកក្កដា ឆ្នាំ២០១៦ ក្រសួងបាននិងកំពុងកែលម្អប្រព័ន្ធចុះបញ្ជីយានយន្តនិងត្រួតពិនិត្យលក្ខណៈបច្ចេកទេសយានយន្តដោយមានការសហការជាមួយJICA និងទទួលបានជំនួយបច្ចេកទេសក្រោមគម្រោងទំនើបកម្មប្រព័ន្ធចុះបញ្ជី និងត្រួតពិនិត្យលក្ខណៈបច្ចេកទេសយានយន្ត ។
គួររំឭកថា គម្រោងទំនើបកម្មប្រព័ន្ធចុះបញ្ជីនិងត្រួតពិនិត្យលក្ខណៈបច្ចេកទេសយានយន្ត ជាមួយអង្គការJICAគ្រោងប្រើប្រាស់ថវិកាប្រមាណ៤លានដុល្លារ មានរយៈពេល៣ឆ្នាំ ចាប់ពីឆ្នាំ២០១៦មក ។
គោលបំណងក្នុងសន្និសីទសារព័ត៌មាននេះតាមលោក អូតា ម៉ាសាយ៉ា ប្រធានទីប្រឹក្សាJICA ណែនាំអំពីគម្រោងទំនើបកម្មប្រព័ន្ធចុះបញ្ជី និងត្រួតពិនិត្យលក្ខណៈបច្ចេកទេសយានយន្ត ដែលត្រូវបានបង្កើតឡើងនៅខែកក្កដា ឆ្នាំ២០១៦ ។ គម្រោងនេះ បង្កើតឡើងដើម្បីជួយសម្រួលដល់ការចុះបញ្ជី ត្រួតពិនិត្យលក្ខណៈបច្ចេកទេសយានយន្ត ធានាឱ្យបាននូវគុណតម្លៃចលនទ្រព្យយានយន្ត និងរក្សានូវសុវត្ថិភាពចរាចរណ៍ ៕
ចែករំលែកព័តមាននេះ