ខេត្តបន្ទាយមានជ័យ ៖ ក្រុមជនសង្ស័យជាចោរឆក់កាបូបយ៉ាងសកម្មនៅក្នុងក្រុងសិរីសោភ័ណ ចំនួន៣នាក់ ត្រូវបានកម្លាំងនគរបាលការិយាល័យព្រហ្មទណ្ឌ បើកការស៊ើបអង្កេតស្រាវជ្រាវយ៉ាងយកចិត្តទុកដាក់ និងឈានដល់ការបង្ក្រាបចាប់ឃាត់ខ្លួន បញ្ជូនទៅសាលាដំបូងនៅថ្ងៃទី៣០ ខែមករា ឆ្នាំ២០១៨…
ខេត្តបន្ទាយមានជ័យ ៖ ក្រុមជនសង្ស័យជាចោរឆក់កាបូបយ៉ាងសកម្មនៅក្នុងក្រុងសិរីសោភ័ណ ចំនួន៣នាក់ ត្រូវបានកម្លាំងនគរបាលការិយាល័យព្រហ្មទណ្ឌ បើកការស៊ើបអង្កេតស្រាវជ្រាវយ៉ាងយកចិត្តទុកដាក់ និងឈានដល់ការបង្ក្រាបចាប់ឃាត់ខ្លួន បញ្ជូនទៅសាលាដំបូងនៅថ្ងៃទី៣០ ខែមករា ឆ្នាំ២០១៨ នេះ ។
លោកវរសេនីយ៍ទោ ខែម សុភ័ណ នាយការិយាល័យនគរបាលព្រហ្មទណ្ឌកម្រិតស្រាល បានឲ្យដឹងថា បន្ទាប់ពីមានបណ្តឹងពីជនរងគ្រោះ លោកឧត្តមសេនីយ៍ទោ អាត់ ខែម ស្នងការនគរបាលខេត្តបានដាក់ចេញនូវបទបញ្ជា ដែលដឹកនាំដោយលោកឧត្តមសេនីយ៍ត្រី សិទ្ធ ឡោះ ស្នងការរង ទទួលផែននគរបាលព្រហ្មទណ្ឌ និងមានការសម្របសម្រួលពី លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ កម្លាំងនគរបាលជំនាញការិយាល័យព្រហ្មទណ្ឌកម្រិតស្រាល បានធ្វើការស៊ើបអង្កេតស្រាវជ្រាវតាមវិធានការជំនាញ និងឈានដល់ការបង្ក្រាបចាប់ឃាត់មុខសញ្ញាជនសង្ស័យចំនួន៣នាក់មានឈ្មោះ ១.ប៊ុន ដាវីត ហៅ ចិន ភេទប្រុស អាយុ១៧ឆ្នាំ នៅភូមិសែសិន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ, ២.ឈ្មោះ សុវណ្ណ សេងអ៊ី ភេទប្រុស អាយុ១៧ឆ្នាំ, ៣.សាង ហុងហៀង ភេទប្រុស អាយុ១៨ឆ្នាំ នៅភូមិកំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។ ទន្ទឹមនឹងការបង្ក្រាបនេះ កម្លាំងសមត្ថកិច្ចក៏បានដកហូតវត្ថុតាងទូរស័ព្ទដៃចំនួន៣គ្រឿង ដែលឆក់បានពីជនរងគ្រោះផងដែរ ។
លោកនាយការិយាល័យបានបញ្ជាក់ថា មុខសញ្ញាចោរឆក់កាបូបយ៉ាងសកម្មនេះ គឺមានឈ្មោះ សាង ហុងហៀង ជាមេខ្លោង បានធ្វើសកម្មភាពជិះម៉ូតូឆក់កាបូបតាមផ្លូវសាធារណៈនៅក្រុងសិរីសោភ័ណ ក្រុងប៉ោយប៉ែត និងខេត្តបាត់ដំបង សរុបចំនួន៨លើក នេះបើតាមការសារភាពរបស់ឈ្មោះ សាង ហុងហៀង និងមានបក្ខពួកគេ៣នាក់ (រត់គេចខ្លួនម្នាក់) ចាប់ឃាត់ខ្លួនចំនួន២នាក់ មានឈ្មោះ ប៊ុន ដាវីតហៅចិន គេបានចូលរួមធ្វើសកម្មភាពឆក់១លើក និងឈ្មោះ សុវណ្ណ សេងអ៊ី នេះគេបានចូលរួមធ្វើសកម្មភាពឆក់ចំនួន២លើក ។
លោកឧត្តមសេនីយ៍ត្រី សិទ្ធ ឡោះ ស្នងការរង ទទួលផែននគរបាលព្រហ្មទណ្ឌ បានបញ្ជាក់ថា ផ្អែកតាមបណ្តឹងរបស់ជនរងគ្រោះ និងមានចម្លើយសារភាពរបស់មុខសញ្ញាជនសង្ស័យ នគរបាលជំនាញព្រហ្មទណ្ឌកម្រិតស្រាល បានរៀបចំសំណុំរឿងបញ្ជូនខ្លួនទៅសាលាដំបូងខេត្ត ចាត់ការតាមនីតិវិធី ។ ចំណែកវត្ថុតាងទូរស័ព្ឌដៃចំនួន៣គ្រឿង បានធ្វើការប្រគល់ជូនជនរងគ្រោះវិញផងដែរ ៕
ចែករំលែកព័តមាននេះ