រាជធានីភ្នំពេញ ៖ ក្នុងរយៈពេលប៉ុន្មានឆ្នាំកន្លងមកនេះ គេសង្កេតឃើញថា វិស័យសំណង់របស់កម្ពុជាបានរីកចម្រើនយ៉ាងឆាប់រហ័ស ដោយអគារទាប និងខ្ពស់ផុសឡើងច្រូងច្រាងនៅរាជធានីភ្នំពេញ ប៉ុន្តែពុំដឹងថា តើមានបញ្ហាប្រឈមអ្វីខ្លះដែលបានកើតឡើងនៅក្នុងវិស័យសំណង់នេះ ?
លោក ឆាន់ សូរ្យផល អគ្គនាយកនៃអគ្គនាយកដ្ឋានសំណង់ នៃក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ក្នុងសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅបន្ត កាលពីពេលថ្មីៗនេះថា មានបញ្ហាប្រឈមចំនួន៩ចំណុចក្នុងវិស័យសំណង់ ដូចជា ៖
១-ការសាងសង់មុនលិខិតអនុញ្ញាត ឬខុសពីលិខិតអនុញ្ញាត
២-ការស្រង់ទិន្នន័យសំណង់នៅពុំទាន់បានលម្អិតស៊ីជម្រៅ
៣-ការចេញលិខិតអនុញ្ញាតបើក និងបិទការដ្ឋាន មិនទាន់ឆ្លើយតបនឹងចំនួនលិខិតអនុញ្ញាតសាងសង់
៤-សណ្តាប់ធ្នាប់នៅការដ្ឋាននៅមានកម្រិត
៥-ការអនុវត្តប្រកាសអន្តរក្រសួង ១២២៩ រវាងក្រសួងមហាផ្ទៃ និងក្រសួងរៀបចំដែនដីនគរូបនីយកម្ម និងសំណង់ នៅពុំទាន់បានពេញលេញ ដោយខ្វះរបាយការណ៍លម្អិតអំពីការដ្ឋានសំណង់ដែលសាងសង់ ខុសពីលិខិតអនុញ្ញាតសាងសង់ ឬសាងសង់មុនលិខិតអនុញ្ញាត
៦-សំណង់លំនៅឋានជាលក្ខណៈបុរីមួយចំនួនបានធ្វើការបំបែកប្លង់ដីជាឡូតិ៍
៧-ការដោះស្រាយវិវាទពាក់ព័ន្ធនឹងការសាងសង់នៅមានកម្រិត
៨-ពុំទាន់មានបទដ្ឋានបច្ចេកទេស ឬស្តង់ដាបច្ចេកទេសសំណង់គ្រប់គ្រាន់ ដែលទទួលស្គាល់ជាផ្លូវការពីស្ថាប័នជំនាញ
៩-ការផ្សព្វផ្សាយលិខិតបទដ្ឋានគតិយុត្តពាក់ព័ន្ធនឹងការគ្រប់គ្រងវិស័យសំណង់ ពុំទាន់ទូលំទូលាយស្របតាមការវិវត្តនៃវិស័យសំណង់។
ដើម្បីដោះស្រាយ និងឆ្លើយតបនឹងបញ្ហាប្រឈមនាពេលបច្ចុប្បន្ន ក៏ដូចជាអនាគតសម្រាប់វិស័យសំណង់ លោក ឆាន់ សូរ្យផល គូសបញ្ជាក់ថា ការអភិវឌ្ឍស្ថាប័ន ជាពិសេស ការគ្រប់គ្រងសំណង់, ការពង្រឹងអាជីវកម្មសំណង់, ការជំរុញវិនិយោគក្នុងវិស័យសំណង់, ការកសាងច្បាប់បទប្បញ្ញត្តិពាក់ព័ន្ធ, ការកំណត់ស្តង់ដាសំណង់ និងការពន្លឿនរយៈពេលចេញលិខិតអនុញ្ញាតសាងសង់, លិខិតអនុញ្ញាតបើក-បិទការដ្ឋានសាងសង់ ព្រមទាំងការផ្តល់វិញ្ញាបនបត្រប្រកបអាជីវកម្មសំណង់ជូនប្រជាពលរដ្ឋ និងវិនិយោគិន គឺជាកត្តាសំខាន់ចាំបាច់ និងបន្ទាន់ ។
លោកលើកឡើងថា មកដល់បច្ចុប្បន្ននេះ អាជ្ញាធរគ្រប់ជាន់ថ្នាក់បាននិងកំពុងអនុវត្តតាមលិខិតបទដ្ឋានគតិយុត្តជាធរមាន ដែលជាមូលដ្ឋានសម្រាប់គ្រប់គ្រងការសាងសង់ទាំងក្នុងអំឡុងពេលសាងសង់ និងក្រោយពេលសាងសង់ រួមមាន ច្បាប់ស្តីពីការរៀបចំដែនដី នគរូបនីយកម្ម និងសំណង់ ឆ្នាំ១៩៩៤, អនុក្រឹត្យស្តីពីលិខិតអនុញ្ញាតសាងសង់ឆ្នាំ១៩៩៧, ប្រកាសអន្តរក្រសួងរៀបចំដែនដី នគរូបនីយកម្ម និងសំណង់ និងក្រសួងពាក់ព័ន្ធមួយចំនួន, ប្រកាស និងសេចក្តីណែនាំរបស់ក្រសួងរៀបចំដែនដី នគរូបនីយកម្ម និងសំណង់ រួមទាំងលិខិតណែនាំរបស់ថ្នាក់ជាតិ និងរដ្ឋបាលថ្នាក់ក្រោមជាតិជាច្រើនទៀត ។
លោកបន្តថា ច្បាប់លិខិតបទដ្ឋានគតិយុត្តនេះ នៅពុំទាន់ឆ្លើយតបបាននឹងតម្រូវការជាក់ស្តែងចំពោះសភាពការណ៍រីកចម្រើននៃវិស័យសំណង់នៅឡើយទេ ។
អគ្គនាយកដ្ឋានសំណង់កំពុងចូលរួមរៀបចំកែសម្រួលច្បាប់លិខិតបទដ្ឋានដែលមានស្រាប់ ដើម្បីឆ្លើយតបនឹងការវិវត្តនៃវិស័យសំណង់បច្ចុប្បន្ន ។
យោងតាមរបាយការណ៍ប្រចាំឆ្នាំ២០១៧របស់ក្រសួងរៀបចំដែនដី នគរូបនីយកម្ម និងសំណង់បង្ហាញថា ក្រសួងបានចេញវិញ្ញាបនបត្រប្រកបអាជីវកម្ម សិក្សាគម្រោងប្លង់ និងសាងសង់សរុបចំនួន២៧៥ក្រុមហ៊ុន បើធៀបនឹងរយៈពេលដូចគ្នាឆ្នាំ២០១៦ មានចំនួន៣៣៤ក្រុមហ៊ុន គឺថយចុះប្រមាណ៥៩ក្រុមហ៊ុនស្មើ១៧,៦% ។
របាយការណ៍ដដែលបង្ហាញថា អគ្គនាយកដ្ឋានសំណង់បានទទួលពាក្យបណ្តឹងវិវាទពាក់ព័ន្ធនឹងការងារសាងសង់សរុបជាង៦០ករណី ក្នុងនោះបានដោះស្រាយបញ្ចប់ជាស្ថាពរ១៤ករណី, កំពុងដោះស្រាយ៣៧ករណី, បញ្ជូនទៅមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានីភ្នំពេញ ៦ករណី, បញ្ជូនទៅស្ថាប័នតុលាការ៣ករណី និងបានផ្អាកការដ្ឋាន៤ករណី ៕
ចែករំលែកព័តមាននេះ