រាជធានីភ្នំពេញ ៖ ហាងកាហ្វេថ្មីមួយនាំចូលពីបរទេស មានរសជាតិស្តង់ដានិងអាហារដ្ឋានមានភាពទាន់សម័យ មានអនាម័យត្រឹមត្រូវ គ្មានជាតិគីមីប្រកបដោយផាសុខភាព ចាប់ផ្តើមបើកបម្រើសេវាជូនអតិថិជនចាប់ពីពេលនេះតទៅ ដែលមានទីតាំងស្ថិតនៅតាមបណ្តោយផ្លូវលេខ៣៧១ នៅជាប់ខ្លោងទ្វារបុរីប៉េងហួត ឬទល់មុខផ្សារប៉េសេ ក្នុងសង្កាត់បឹងទំពន់ ខណ្ឌមានជ័យ រាជធានីភ្នំពេញ ។
ពិធីកាត់ខ្សែបូរសម្ពោធបើកឲ្យដំណើរការជាផ្លូវការបានធ្វើឡើងនៅព្រឹកថ្ងៃអាទិត្យ ទី២៨ មករា ២០១៨ ក្រោមអធិបតីភាពលោកឧកញ៉ា ថុង អ៊ុយប៉ាង ស្ថាបនិកកាសែតកោះសន្តិភាព និងមានការចូលរួមពីអតិថិជនយ៉ាងច្រើនកុះករ ។
លោក ប៊ុន ពេជ្ររិទ្ធីយ៉ា និងលោកស្រី ធឿន សុធារត្ន័ ម្ចាស់ហាងកាហ្វេនិងភោជនីយដ្ឋាន ប៉ូស្តាល់ (POSTAL) បានឲ្យកោះសន្តិភាពដឹងថាដោយសារមានតម្រូវការចាំបាច់របស់បងប្អូនប្រជាពលរដ្ឋយើងដែលកំពុងពេញនិយមពិសាកាហ្វេ ក៏ដូចជាអាហារដ្ឋានមួយដែលមានកំរិតស្តង់ដាត្រឹមត្រូវ លោកនិងលោកស្រី បានធ្វើការទំនាក់ទំនងទៅក្រៅប្រទេសដើម្បីនាំចូលកាហ្វេដែលមានការត្រួតពិនិត្យគុណភាពត្រឹមត្រូវ មិនធ្វើឲ្យប៉ះពាល់ដល់សុខភាព មានរសជាតិឈ្ងុយឆ្ងាញ់ មានច្រើនរសជាតិប្លែកពីគេ មានម៉ាស៊ីនឆុងទំនើប អ្នកឆុងប្រកបដោយឯកទេស និងមានសេវារហ័សទាន់ចិត្តជូនអតិថិជនផងដែរ ។
លោកបន្តថា សម្រាប់កម្មវិធីបើកដំបូងនេះ អាហារដ្ឋាននិងហាងកាហ្វេរបស់លោកមានការបញ្ចុះតម្លៃពិសេស១៥% ជូនអតិថិជនរយៈពេល៣សប្តាហ៍ និងមានបំណងបើកនៅទីតាំងថ្មីជាបន្តបន្ទាប់ទៀត ប្រសិនបើមានការគាំទ្រច្រើនពីសំណាក់អតិថិជន ។
ហាងកាហ្វេ «POSTAL» ជាហាងទំនើប មានឧបករណ៍ឆុងទំនើបតាមស្តង់ដាអន្តរជាតិ មានអ្នកឆុងកាហ្វេប្រកបដោយបទពិសោធន៍ មានអាហារឆ្ងាញ់ៗ ធានាគ្មានជាតិគីមី ជាហាងប្រកបដោយផាសុកភាព ។ អ្វីដែលធ្វើឱ្យអតិថិជនកាន់តែមានទំនុកចិត្តនោះ គឺPOSTAL មានចំណតយានយន្តចំពីមុខទូលាយ មានអ្នករង់ចាំបំរើមិនឱ្យខុសបំណងឡើយ៕
ចែករំលែកព័តមាននេះ