រាជធានីភ្នំពេញ ៖ ក្រោយពីចំណាយពេលអស់ជាច្រើនឆ្នាំដើម្បីជជែកពិភាក្សាទៅលើការកំណត់ម៉ាកសញ្ញាអង្ករកន្លងមក ពេលនេះកម្ពុជាបានកំណត់យក«ម្លិះអង្គរ»“ MALYS ANGKOR” ជាម៉ាកវិញ្ញាតកម្មជាតិសម្រាប់អង្ករក្រអូបប្រណីត ដែលសហព័ន្ធស្រូវអង្ករ បានចាត់ទុក ជាការបោះជំហានឆ្ពោះទៅមុខប្រកបដោយសុទិដ្ឋនិយមក្នុងការរួមចំណែក…
រាជធានីភ្នំពេញ ៖ ក្រោយពីចំណាយពេលអស់ជាច្រើនឆ្នាំដើម្បីជជែកពិភាក្សាទៅលើការកំណត់ម៉ាកសញ្ញាអង្ករកន្លងមក ពេលនេះកម្ពុជាបានកំណត់យក«ម្លិះអង្គរ»“ MALYS ANGKOR” ជាម៉ាកវិញ្ញាតកម្មជាតិសម្រាប់អង្ករក្រអូបប្រណីត ដែលសហព័ន្ធស្រូវអង្ករ បានចាត់ទុក ជាការបោះជំហានឆ្ពោះទៅមុខប្រកបដោយសុទិដ្ឋនិយមក្នុងការរួមចំណែក លើកស្ទួយវិស័យអង្ករកម្ពុជា ជាមួយរាជរដ្ឋាភិបាល ក្រសួងកសិកម្ម រុក្ខាប្រមាញ់ និងនេសាទ ក្រសួងពាណិជ្ជកម្ម និងស្ថាប័នពាក់ព័ន្ធ ព្រមទាំងដៃគូអភិវឌ្ឍន៍ជាច្រើនទៀត ។
ការសម្រេចបាននូវម៉ាកវិញ្ញាតកម្មអង្ករ នាពេលនេះ គឺមានរយៈពេល៨ឆ្នាំហើយ បន្ទាប់ពីរាជរដ្ឋាភិបាលបានសម្រេចដាក់ចេញនូវគោលនយោបាយជំរុញផលិតកម្មស្រូវ និងការនាំចេញអង្ករក្នុងឆ្នាំ២០១០ និងការជួយជ្រោមជ្រែងយ៉ាងខ្លាំងពីសំណាក់ដៃគូអភិវឌ្ឍន៍ជាច្រើនក្នុងការរៀបចំម៉ាកវិញ្ញាតកម្ម ដែលអាចផ្តល់នូវទំនុកចិត្តដល់អ្នកប្រើប្រាស់អង្ករកម្ពុជា ។
«ម្លិះអង្គរ» «MALYS ANGKOR» ជាម៉ាកអង្ករក្រអូបប្រណីតរបស់កម្ពុជា ដែលនឹងផ្តល់ការបញ្ជាក់ទៅលើប្រភេទអង្ករក្រអូបប្រណីតនានាដែលកម្ពុជាផលិតបាន រួចកិនកែច្នៃសម្រាប់នាំចេញ ឬចែកចាយក្នុងទីផ្សារក្នុងស្រុក ។ រាល់ការប្រើប្រាស់ម៉ាក«ម្លិះអង្គរ» «MALYS ANGKOR» គឺជាការធានាចំពោះមុខច្បាប់ថា អង្ករនោះជាផលិតផលកម្ពុជា យ៉ាងពិតប្រាកដ ។
លោកឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា បានមានប្រសាសន៍កាលពីថ្ងៃទី២១ មករា កន្លងមកថា កន្លងមក កម្ពុជាបានលក់អង្ករប្រណីតក្នុងតម្លៃដូចអង្ករក្រអូបធម្មតា ដោយសារពុំទាន់បានកំណត់អត្តសញ្ញាណម៉ាកអង្ករច្បាស់លាស់ ។ ដូច្នេះ នៅពេលកំណត់ និងទទួលស្គាល់ជាផ្លូវការទាំងក្នុងប្រទេស និងអន្តរជាតិហើយ ពេលនោះតម្លៃនឹងឡើងខ្ពស់ ដែលធ្វើឲ្យអ្នកផលិតនឹងទទួលបានអត្ថប្រយោជន៍ពីផលចំណេញ ហើយធ្វើឱ្យគាត់ខិតខំប្រឹងប្រែងផលិតបន្ថែមទៀត ។
លោកឧកញ៉ាបន្ដថា ៖« នៅពេលកម្ពុជាមានម៉ាកសញ្ញាអង្ករ «ម្លិះអង្គរ» ប្រកាសជាផ្លូវការហើយ វានឹងចូលរួមចំណែកជួយរក្សាស្ថិរភាព និងគុណតម្លៃនៃប្រភេទស្រូវអង្ករ ហើយការបង្កើតម៉ាកសញ្ញានេះ គឺសំដៅទៅដល់ការកំណត់អត្តសញ្ញាណឱ្យបាននូវប្រភេទពូជស្រូវ អង្ករប្រណីតរបស់កម្ពុជា » ។
តាមអនុប្រធានសហព័ន្ធស្រូវអង្ករកម្ពុជា អង្ករស្ថិតនៅក្រោមម៉ាកសញ្ញា «ម្លិះអង្គរ» គឺពពួកស្រូវប្រណីតសុទ្ធល្អជាងគេ ។ លោកឧកញ៉ាបន្តថា ៖« ក្រោមម៉ាកសញ្ញាអង្ករ «ម្លិះអង្គរ» យើងហៅថា ជាពពួកស្រូវប្រណីត ។ វាមានឈ្មោះហៅខុសៗគ្នា តែនៅក្នុងចង្កោមម្លិះដែលមានពូជសុទ្ធល្អ ។ អីចឹង យើងអាចសន្មតថា ស្ថិតនៅក្នុងចង្កោមពូជម្លិះ ដែលដាក់ប្រកួតឈ្នះកាលពីប៉ុន្មានឆ្នាំមុន » ។ លោកថា ៖« ម្លិះអង្គរ ជាអង្ករប្រណីតរបស់កម្ពុជា ហើយមិនសំដៅតែមួយមុខទេ បានន័យថា ឱ្យតែអង្ករប្រណីតខ្ពស់បំផុតជាងគេ ហ្នឹងហើយជា «ម្លិះអង្គរ» ។
លោកឧកញ៉ា វង្ស ប៊ុនហេង នាយកក្រុមហ៊ុនវង្សប៊ុនហេង រាយស៍ មានប្រសាសន៍ថា នេះជារឿងល្អណាស់ ព្រោះខាងសហព័ន្ធស្រូវអង្ករកម្ពុជាខិតខំរាប់ឆ្នាំដើម្បីបានម៉ាកសញ្ញាអង្ករមួយជារបស់ជាតិ សម្រាប់ផ្សព្វផ្សាយឱ្យអន្តរជាតិបានដឹង និងទទួលស្គាល់ម៉ាកសញ្ញាមួយនេះថា ពិតជាអង្ករមានគុណភាពល្អ និងមានស្តង់ដា ។
លោកឧកញ៉ាបន្តថា ៖« យើងគិតថា នៅពេលម៉ាកសញ្ញាអង្ករនេះចេញជាផ្លូវការ គឺយើងអាចលក់អង្ករបានល្អជាងមុន បានន័យថា អ្នកប្រើប្រាស់ ឬអ្នកទិញពីយើង គេដឹងច្បាស់ថាពិតជាអង្ករ «ម្លិះអង្គរ» មែន វាមិនដូចលើកមុនទេ » ។
លោកឧកញ៉ាលើកឡើងថា ៖« តាមពិត ម៉ាកសញ្ញានេះយើងធ្វើយូរហើយ តែអត់មានការឯកភាពគ្នារវាងវិស័យឯកជន សហព័ន្ធ ក្រសួងពាណិជ្ជកម្ម និងក្រសួងកសិកម្ម ប៉ុន្តែនៅក្នុងរយៈពេល២ឆ្នាំចុងក្រោយនេះ យើងឃើញមានការរួមចិត្តគំនិតគ្នាសម្រេចថា យកម៉ាកសញ្ញាអង្ករកម្ពុជា គឺម្លិះអង្គរ » ។
កម្ពុជាបានចាប់យកឱកាសនាំចេញអង្ករទៅកាន់ទីផ្សារអន្តរជាតិជាផ្លូវការចាប់តាំងពីឆ្នាំ២០០៨មក ។ ដោយមើលឃើញនូវសក្តានុពលក្នុងនាំអង្ករចេញ រាជរដ្ឋាភិបាលបានសម្រេចដាក់ចេញនូវគោលនយោបាយស្រូវអង្ករជាផ្លូវការក្នុងឆ្នាំ២០១០ ដែលកាលនោះ បរិមាណនាំអង្ករចេញទៅកាន់ទីផ្សារអន្តរជាតិជិត ៤ម៉ឺនតោន ហើយបរិមាណនាំចេញបានកើន៥ដង រហូតដល់២០ម៉ឺនតោននៅឆ្នាំបន្ទាប់ ។ បរិមាណនាំចេញបានកើនឡើងរហូតដល់៤០ម៉ឺនតោននៅឆ្នាំ២០១៣ ដោយកើនឡើងជិត១០ដងធៀបនឹងឆ្នាំ២០១០ ។ នៅដំណាច់ឆ្នាំ២០១៧ កម្ពុជាសម្រេចការនាំចេញអង្ករទៅកាន់ទីផ្សារអន្តរជាតិជាង៦៣៥.០០០តោនទៅកាន់ប្រទេស៦៣ក្នុងសកលលោក ។
ទិន្នន័យចុងក្រោយក្នុងឆ្នាំ២០១៧ បង្ហាញថា ទីផ្សារនៃប្រទេសជាសមាជិកសហភាពអឺរ៉ុបបានស្រូបយកអង្ករកម្ពុជា៤៣% នៃបរិមាណនាំចេញសរុប ស្របពេលទីផ្សារចិនកំពុងប្រជែងក្នុងល្បឿនយ៉ាងរហ័សក្នុងការស្រូបយកអង្ករពីកម្ពុជា ដោយមានចំណែក៣៤%នៃការនាំចេញសរុប។
នៅឆ្នាំ២០១៨ សាធារណៈរដ្ឋប្រជាមានិតចិនបានចុះអនុស្សារណៈទិញអង្ករកម្ពុជា៣០ម៉ឺនតោនក្នុងមួយឆ្នាំ ។ កត្តានេះបានធ្វើឲ្យឱកាសពង្រីកទីផ្សារកាន់តែធំទូលំទូលាយសម្រាប់អង្ករកម្ពុជា ៕
ចែករំលែកព័តមាននេះ