ខេត្តសៀមរាប ៖ លោកពិន ប្រាកដ អភិបាលរងខេត្តសៀមរាបបានដឹកនាំកម្លាំងចម្រុះចុះត្រួតពិនិត្យ និងបង្ក្រាបបទល្មើសជលផលក្នុងភូមិសាស្ដ្រ ស្រុកសូទ្រនិគម និងស្រុកជីក្រែងក្នុងខេត្តសៀមរាបមាន នាយខណ្ឌរដ្ឋបាលជលផលសៀមរាប កងរាជអាវុធហត្ថស្រុក កម្លាំងអធិការនគរបាលស្រុក មន្ត្រីសាលាស្រុក មន្ត្រីសាលាខេត្ត និងមន្ត្រីជលផលចំនួន៣៣នាក់ ក្នុងប្រតិបត្តិការចុះបង្ក្រាបករណីបទល្មើសជលផល នោះបានធ្វើឡើងនាថ្ងៃ ទី១៩ ខែមករា ឆ្នាំ២០១៨ នៅក្នុងភូមិសាស្ត្របឹងទន្លេសាទទាំង២ស្រុក គឺស្រុកសូទ្រនិគម និងស្រុកជីក្រែង ខេត្តសៀមរាប។
មន្ត្រីជំនាញស្រុកសូទ្រនិគមបានប្រាប់ថា ក្នុងយុទ្ធនាការត្រួតពិនិត្យ និងបង្ក្រាបបទល្មើសជលផលដែល ត្រូវបានអនុវត្តចាប់ពីចំណុចរលកទល់ភូមិសាស្ដ្រ ឃុំកំពង់ឃ្លាំង ស្រុកសូទ្រនិគមន រហូតដល់ចំណុចពិចជីក្រី ក្នុងឃុំអន្លង់សំណរ ស្រុកជីក្រែង ព្រំទល់ខេត្តសៀមរាបជាប់ និងប្រទល់ខេត្តកំពង់ធំ ហើយប្រតិបត្តិការនេះត្រូវប្រើប្រាស់មធ្យោបាយកាណូតចំនួន០៤គ្រឿង ។
សូមបញ្ជាក់ថា បន្ទាប់ពីចុះប្រតិបត្តិការក្រុមការងារចម្រុះទទួលបានលទ្ធផលដកហូតបានដូចជា ឧបករណ៍នេសាទ០៥គ្រឿង របាំងសាច់អួនចំនួន១០០០ម៉ែត្រ ចំរឹងចំនួន៣០០ដើម ព្រមទាំងព្រលែងកូនត្រីចំនួន២០គីឡូក្រាមចូលទៅបឹងធម្មជាតិវិញផងដែរ ៕
ចែករំលែកព័តមាននេះ