រាជធានីភ្នំពេញ ៖ មន្ត្រីជាន់ខ្ពស់ក្រសួងសាធារណការ និងដឹកជញ្ជូន បានបញ្ជាក់ថា នៅឆ្នាំ២០១៧ កំពង់ផែស្វយ័តភ្នំពេញរកចំណូលពីការផ្តល់សេវាបានប្រមាណ៧៥ពាន់លានរៀលឬស្មើប្រមាណ១៨លានដុល្លារ កើនឡើង១៤% ខណៈកំពង់ផែស្វយ័តក្រុងព្រះសីហនុ រកចំណូលកើនឡើងដល់១៦,៨០%…
រាជធានីភ្នំពេញ ៖ មន្ត្រីជាន់ខ្ពស់ក្រសួងសាធារណការ និងដឹកជញ្ជូន បានបញ្ជាក់ថា នៅឆ្នាំ២០១៧ កំពង់ផែស្វយ័តភ្នំពេញរកចំណូលពីការផ្តល់សេវាបានប្រមាណ៧៥ពាន់លានរៀលឬស្មើប្រមាណ១៨លានដុល្លារ កើនឡើង១៤% ខណៈកំពង់ផែស្វយ័តក្រុងព្រះសីហនុ រកចំណូលកើនឡើងដល់១៦,៨០% បើប្រៀបធៀបនឹងឆ្នាំ២០១៦ ។
ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០១៧ និងទិសដៅការងារឆ្នាំ២០១៨ កាលពីថ្ងៃទី១៦ មករា នៅសាលសន្និសីទចតុមុខ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា ក្នុងឆ្នាំ២០១៧កន្លងទៅ កំពង់ផែស្វយ័តភ្នំពេញ មានទំនិញឆ្លងកាត់ជាង២,៧លានតោន កើនឡើង១៤%,នាវាឆ្លងកាត់១.៦៧៦គ្រឿង ថយចុះ០,១៨%, អ្នកដំណើរបរទេសនិងទេសចរឆ្លងកាត់ មានជាង២,៦ម៉ឺននាក់ កើនឡើង៦%, កុងតឺន័រឆ្លងកាត់ មានជាង១៨,៤ម៉ឺន TEUs កើនឡើង២២% ហើយចំណូលសរុបដែលទទួលបានប្រមាណ៧៥ពាន់លានរៀល ឬប្រមាណ១៨លានដុល្លារ កើនឡើង១៤% ធៀបនឹង២០១៦ ។
ក្នុងឆ្នាំកន្លងទៅដែរ កំពង់ផែស្វយ័តក្រុងព្រះសីហនុ មានទំនិញឆ្លងកាត់សរុបជាង៤,៣លានតោន កើនឡើង៦,៥៥%, នាវាឆ្លងកាត់១.៣០០គ្រឿង ថយចុះ១,៦៦%, កុងតឺន័រ ឆ្លងកាត់ជាង៤៥ម៉ឺន TEUs កើនឡើង១៤% បើធៀបនឹង២០១៦ ហើយរកចំណូលបានជាង៥២លានដុល្លារ កើនឡើង១៦,៨០% ធៀបនឹងឆ្នាំ២០១៦ ។
សម្រាប់ឆ្នាំ២០១៨ លោកទេសរដ្ឋមន្ត្រី ស៊ុន ចាន់ថុល មានប្រសាសន៍ថា កំពង់ផែភ្នំពេញនឹងបន្តពង្រីកការផ្តល់សេវាដល់អ្នកប្រើប្រាស់កំពង់ផែ តាមរយៈការសាងសង់ហេដ្ឋារចនាសម្ព័ន្ធចំណតផែរណប បង្កើតសេវាកម្មលើកដាក់នៅតាមដងទន្លេ ដើម្បីជំរុញឱ្យមានការប្រើប្រាស់ការដឹកជញ្ជូនផ្លូវទឹកកាន់តែមានភាពមមាញឹក។ បញ្ចប់គម្រោងអភិវឌ្ឍន៍ចំណតផែកុងតឺន័រ LM 17 ជំហានទី២ ដើម្បីពង្រីកសមត្ថភាពផែបន្ថែម។
លោកទេសរដ្ឋមន្ត្រីបន្តថា ចំពោះកំពង់ផែស្វយ័តក្រុងព្រះសីហនុ ធ្វើយ៉ាងណា បង្កើនទំនិញឆ្លងកាត់ឱ្យកើនឡើងជាងឆ្នាំ២០១៧, ជំរុញឱ្យមានការវិនិយោគកាន់តែច្រើនថែមទៀតនៅតំបន់សេដ្ឋកិច្ចពិសេស, ស្វែងរកប្រភពថវិកាសម្រាប់គម្រោងអភិវឌ្ឍន៍ចំណតផែកុងតឺន័រថ្មី, បន្តសាងសង់ចំណតកំពង់ផែកុងតឺន័រ ប្រវែង ៣៥០ម៉ែត្រ ជម្រៅទឹក១៤,៥ម៉ែត្រ ទីលានកុងតឺន័រ ការងារបូមស្តារអាងនាវា ឃ្លាំងនាវាជម្រៅ១៤,៥ម៉ែត្រ និងបំពាក់គ្រឿងចក្រលើកដាក់កុងតឺន័រ ។
ទីប្រឹក្សាជាន់ខ្ពស់ផ្នែកសេដ្ឋកិច្ចនៃក្រុមហ៊ុន Emerging Marketing Consulting លោកង៉ែត ជូ មើលឃើញថា កំពង់ផែកម្ពុជាដើរតួនាទីសំខាន់ ពិសេសទាក់ទងនឹងការនាំចូលវត្ថុធាតុដើមសម្រាប់ការផលិតក្នុងស្រុក និងនាំចេញទៅវិញ តាមរយៈកំពង់ផែក្រុងព្រះសីហនុ ដូចជាពាណិជ្ជកម្មធំៗ ។
លោកថ្លែងថា ៖« ការធ្វើពាណិជ្ជកម្មអន្តរជាតិធំៗ ចាំបាច់ត្រូវឆ្លងកាត់កំពង់ផែក្រុងព្រះសីហនុ លើកលែងតែការធ្វើពាណិជ្ជកម្មទ្វេភាគី ដឹកតាមផ្លូវគោកក្នុងរូបភាពក្រៅផ្លូវការ ដែលមិនឆ្លងកាត់កំពង់ផែ ។ អីចឹងហើយយើងមើលដូចជាសម្ភារកាត់ដេរ ឬអ្វីដែលផលិតនៅតំបន់សេដ្ឋកិច្ចពិសេសភ្នំពេញ ត្រូវឆ្លងកាត់កំពង់ផែក្រុងព្រះសីហនុទាំងអស់។ ចំណែកកំពង់ផែស្វយ័តភ្នំពេញ វាជាជម្រើសមួយផ្សេងទៀតទាក់ទងនឹងការដឹកជញ្ជូនតាមផ្លូវទឹកឆ្លងកាត់ប្រទេសវៀតណាម » ។
ដើម្បីឱ្យការផ្តល់សេវា ក៏ដូចជាកំណើននៃប្រាក់ចំណូលនៅតែទទួលបានកាន់តែប្រសើរទៀតនោះ ទីប្រឹក្សាសេដ្ឋកិច្ចរូបនេះថា គ្មានអ្វីក្រៅពីការពង្រឹងអភិបាលកិច្ចគ្រប់គ្រងហិរញ្ញវត្ថុ និងតម្លាភាពនៃការគ្រប់គ្រងចំណូល ចំណាយ ។
លោកថ្លែងថា ៖« វាជាមោទនភាពរបស់អ្នកគ្រប់គ្រងស្ថាប័ន នៅពេលការគ្រប់គ្រងមានប្រសិទ្ធភាព មានការទទួលខុសត្រូវ មានតម្លាភាពហិរញ្ញវត្ថុ ហើយមានកំណើនចំណូលថវិកាបានមកពីផលចំណេញ » ៕
ចែករំលែកព័តមាននេះ