ខេត្តប៉ៃលិន ៖ សុខសន្តិភាព សុវត្ថិភាព បានកើតមានឡើងល្បីរន្ទឺដល់ឆាកអន្តរជាតិ គឺដោ យសារតែការដឹកនាំដ៏ឈ្លាសវៃរបស់រាជរដ្ឋាភិបាលកម្ពុជា ដោយប្រែក្លាយពីប្រទេសខ្វះខាតអង្ករ ទៅជាប្រទេសនាំចេញនូវអង្កររាល់ឆ្នាំ ជាប្រទេសដែលមានភ្ញៀវទេសចរណ៍អន្តរជាតិ ចូលមកលេងកម្សាន្តជាង៥០.០០០នាក់ក្នុង១ឆ្នាំៗ និងជាប្រទេសមានសឹកសង្គ្រាមក្លាយទៅជា បញ្ជូនទ័ពទៅជួយច្បាំងនៅប្រទេសក្រៅទៅវិញ។ នេះជាការលើកឡើងរបស់លោក ផាន់ ផល្លា អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាតំណាងដ៏ខ្ពង់ខ្ពស់របស់លោក បណ្ឌិតសភាចារ្យ អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីរសៀលថ្ងៃទី១៦ ខែមករា ឆ្នាំ២០១៨ នៅក្នុងសាលប្រជុំ សាលាខេត្តប៉ៃលិន នាឱកាសតែងតាំងប្រធានមន្ទីរសេដ្ឋកិច្ច និងហិរញ្ញវត្ថុខេត្តថ្មី ដោយមានការចូលរួមពីអភិបាលរងខេត្ត មន្ត្រីរាជការជុំវិញមន្ទីរផងដែរ។
លោក ផាន់ ផល្លា បានមានប្រសាសន៍បន្តទៀតថា លោកពិតជាសំដែងនូវការកោតសរសើរចំពោះថ្នាក់ដឹកនាំខេត្តប៉ៃលិន ដែលបានយកអស់កម្លាំងកាយចិត្ត ក្នុងការបំពេញតួនាទីភារកិច្ចរបស់ខ្លួនលើគ្រប់វិស័យឱ្យមានការ រីកចម្រើន ដោយទទួលបានលទ្ធផលល្អគួរជាទីមោទនៈ។ លោកក៏បានផ្តាំផ្ញើ ដល់ប្រធានមន្ទីរថ្មី ត្រូវយកចិត្តទុកដាក់គ្រប់ ពេលវេលាបំពេញភារកិច្ច ត្រូវអនុវត្តស្មារតីសាមគ្គីភាព ក្រោមដំបូលរដ្ឋធម្មនុញ្ញ នៃព្រះរាជាណាចក្រកម្ពុជា ដើម្បីសន្តិភាព និងការអភិវឌ្ឍន៍ ដោយមិនត្រូវប្រកាន់គ្នានោះឡើយ ហើយត្រូវផ្តល់រង្វាន់លើកទឹកចិត្តដល់មន្ត្រីដែលសកម្មក្នុងការយកចិត្តទុកដាក់នឹងការងារ។ លើសពីនេះ ត្រូវខិតខំស្វែងយល់ និងអនុវត្តឲ្យបានល្អនូវកម្មវិធីនយោបាយយុទ្ធសាស្ត្រអភិវឌ្ឍជាតិ របស់រាជរដ្ឋាភិបាលកម្ពុជានីតិកាលទី៥ នៃរដ្ឋសភា។ លោក នុត សោភិរក្ស ប្រធានមន្ទីរថ្មី ដែលទើបនឹងតែងតាំង បានប្តេជ្ញាចិត្ត ខិតខំពង្រឹង សាមគ្គីភាព ឯកភាពផ្ទៃក្នុង ឲ្យបានល្អ បង្កើនសមត្ថភាពដឹកនាំ និងអនុវត្តការងារតាមយុទ្ធសាស្ត្រ និងបទដ្ឋាននានារបស់រាជរដ្ឋាភិបាលកម្ពុជា ។
លោក អៀង វុធ អភិបាលរងខេត្ត បានមានប្រសាសន៍ថា ៖ រាជរដ្ឋាភិបាលកម្ពុជាបានអនុវត្ត គោលនយោបាយកំណែទម្រង់រដ្ឋបាលសាធារណៈ និងមុខងារសាធារណៈនៅតែជាអាទិភាពក្នុង ដំណើការ ពីដំណាក់កាលមួយទៅដំណាក់កាលមួយទៀត ដោយរលូនល្អ និងរីកចម្រើនជាលំដាប់ មានច្បាប់ស្តីពីសហលក្ខន្តិកៈមន្ត្រីរាជការស៊ីវិល និងច្បាប់គោលមួយចំនួនទៀត។ ដូច្នេះ ប្រធានដែលបានតែងតាំងថ្មីនេះ ត្រូវប្រកាន់ភ្ជាប់នូវតួនាទីភារកិច្ចស្នូលរបស់ខ្លួន ត្រូវមានការទទួលខុសត្រូវខ្ពស់ មានតម្លាភាព និងត្រូវបន្តសិក្សាស្រាវជ្រាវស្វែងរកនូវប្រភពឯកសារ លិខិតបទដ្ឋាននានា យកមកធ្វើការបណ្តុះបណ្តាលបង្កើនសមត្ថភាពក្នុងវិជ្ជាជីវៈ សំដៅកែទម្រង់សេវាសាធារណៈឲ្យមានប្រសិទ្ធភាព។ សូមបញ្ជាក់ថា សេចក្តីប្រកាសរបស់ក្រសួងសេដ្ធកិច្ច និងហិរញ្ញវត្ថុលេខ១៤៤៨ ស.ហ.វ. ប្រ.ក.ប ត្រូវបានប្រកាសតែងតាំង លោក នុត សោភិរក្ស អត្ថលេខ ១៦១១២០០១១៦ បច្នុប្បន្នជាអនុប្រធានមន្ទីរសេដ្ឋកិច្ច និងហិរញ្ញវត្ថុ ទៅជាប្រធានមន្ទីសេដ្ឋកិច្ច និងហិរញ្ញវត្ថុខេត្តប៉ៃលិន ជំនួសលោក រាម សុមាន ដែលត្រូវចូលនិវត្ត៕
https://youtu.be/RLbbjwB6_HQ
ចែករំលែកព័តមាននេះ