រាជធានីភ្នំពេញ ៖ សេដ្ឋវិទូនានាបានលើកឡើងថា ការសម្រេចបានកំណើនសេដ្ឋកិច្ច៦,៩%កាលពីឆ្នាំ២០១៧ ជារឿងគួរឲ្យអបអរសាទរ ដែលមានភាពសមស្រប និងត្រូវខិតខំបន្តទៀត ។ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត…
រាជធានីភ្នំពេញ ៖ សេដ្ឋវិទូនានាបានលើកឡើងថា ការសម្រេចបានកំណើនសេដ្ឋកិច្ច៦,៩%កាលពីឆ្នាំ២០១៧ ជារឿងគួរឲ្យអបអរសាទរ ដែលមានភាពសមស្រប និងត្រូវខិតខំបន្តទៀត ។
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ បានថ្លែងឲ្យដឹងតាមទូរស័ព្ទនាព្រឹកថ្ងៃទី៨ មករា ថា ការសម្រេចបានកំណើនសេដ្ឋកិច្ចក្នុងរង្វង់៧%បែបនេះ ជារឿងល្អប្រសើរណាស់ ដែលគួរស្រែក «ជយោ ! ជយោ ! » ព្រោះការសម្រេចបាននេះ ដោយសារការខិតខំប្រឹងប្រែងរបស់យើងទាំងអស់គ្នា ធ្វើឲ្យប្រទេសយើងមានភាពរីកចម្រើនបន្តិចម្តងៗ ប៉ុន្តែលោកគិតថា កំណើនសេដ្ឋកិច្ចរបស់កម្ពុជានឹងអាចថមថយនៅ៥ទៅ១០ឆ្នាំខាងមុខ ដោយសារមូលដ្ឋានសេដ្ឋកិច្ចកម្ពុជាកាន់តែរីកធំ ។
លោកបន្តថា ៖« ការថមថយកំណើនសេដ្ឋកិច្ចជារឿងធម្មតា ព្រោះមូលដ្ឋានសេដ្ឋកិច្ចយើងកាន់តែធំ ប៉ុន្តែបើយើងខិតខំហើយសម្រេចបានក្នុងរង្វង់៧%បន្តទៀត ជារឿងល្អមែនទែន»។ លោកបន្តថា ៖« វាប្រៀបដូចជាយើងឡើងកាំជណ្តើរអីចឹង គឺ១ជំហានម្តងៗ និងកាន់តែខ្ពស់ទៅៗ » ។
តើធ្វើយ៉ាងណាដើម្បីឲ្យសេដ្ឋកិច្ចកម្ពុជា សម្រេចបានកំណើនខ្ពស់បន្តទៀត ? លោកបណ្ឌិតបានពន្យល់ថា កម្ពុជាត្រូវតែធ្វើពិពិធកម្មលើវិស័យកសិកម្ម សេវាកម្ម និងឧស្សាហកម្មបន្ថែមទៀត ជាមួយទស្សនវិស័យច្បាស់លាស់ថា យើងកំពុងនៅទីណា និងត្រូវដើរទៅទីណា។
ចំណែកលោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានថ្លែងថា ប្រសិនជាគិតក្នុងក្របខ័ណ្ឌម៉ាក្រូសេដ្ឋកិច្ចកម្ពុជា ការសម្រេចបានកំណើនសេដ្ឋកិច្ចកម្ពុជាក្នុងរង្វង់៦,៩%ជារឿងល្អ ដែលអាចឲ្យកម្ពុជាឈោងយកកំណើនសេដ្ឋកិច្ចបានល្អក្នុងរយៈពេលប៉ុន្មានឆ្នាំខាងមុខទៀត ហើយប្រសិនជាកម្ពុជារក្សាបាននូវសន្តិភាព និងស្ថិរភាពនយោបាយ សេដ្ឋកិច្ចកម្ពុជានឹងរក្សាបានកំណើនក្នុងរង្វង់៧% ឬអាចខ្ពស់ជាងនេះទៀត ដោយសារកំណើននៃការវិនិយោគផ្ទាល់ពីបរទេស ពិសេសពីប្រទេសចិន ប្រទេសសមាជិកអាស៊ាន និងអឺរ៉ុបជាដើម ។
លោកបណ្ឌិតបន្តថា ៖« ខ្ញុំនៅតែមើលឃើញថា អ្នកវិនិយោគចិនកាន់តែច្រើននៅបន្តចូលមកកម្ពុជា ហើយអ្នកវិនិយោគដទៃទៀតក៏បានចូលមក ដោយមិនឃើញសញ្ញាថមថយដែរ ។ នេះសុទ្ធតែជាសញ្ញាល្អ ដែលអាចឲ្យរាជរដ្ឋាភិបាលប្រមូលចំណូលបានកាន់តែច្រើនដើម្បីទ្រទ្រង់កំណើនសេដ្ឋកិច្ចរបស់ខ្លួន » ។
សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីកម្ពុជា បានថ្លែងក្នុងទិវាអបអរជ័យជំនះ៧ មករា លើកទី៣៩ ថា សេដ្ឋកិច្ចកម្ពុជាកាលពីឆ្នាំមុនសម្រេចបានកំណើន៦,៩% និងប្រាក់ចំណូលប្រជាពលរដ្ឋម្នាក់ៗទទួលបាន១.៤៣៥ដុល្លារអាមេរិកក្នុង១ឆ្នាំ ។
សម្តេចថ្លែងថា ៖« ការរក្សាបាននូវសុខសន្តិភាព ស្ថិរភាពនយោបាយ និងសន្តិសុខដ៏រឹងមាំ បានធានាឲ្យកម្ពុជាសម្រេចបានសមិទ្ធផលធំៗជាថ្មីទៀត ក្នុងដំណើរការអភិវឌ្ឍសេដ្ឋកិច្ចសង្គម និងកែលម្អជីវភាពរស់នៅរបស់ប្រជាជន » ។
សម្តេចបានបន្តថា កំណើនសេដ្ឋកិច្ចដ៏រឹងមាំនេះ ត្រូវបានឆ្លុះបញ្ចាំងតាមរយៈការរីកចម្រើននៃវិស័យឧស្សាហកម្មកម្មន្តសាល សំណង់ កសិកម្ម និងសេវាកម្ម ដូចជា ទេសចរណ៍ និងអចលនទ្រព្យជាដើម ។ ជាមួយគ្នានេះ កម្ពុជាបានផ្លាស់ប្តូររចនាសម្ព័ន្ធសេដ្ឋកិច្ច ពីប្រទេសពឹងផ្អែកលើវិស័យកសិកម្ម ទៅជាប្រទេសដែលពឹងផ្អែកលើវិស័យឧស្សាហកម្ម និងសេវាកម្មផងដែរ ៕
ចែករំលែកព័តមាននេះ