រាជធានីភ្នំពេញ ៖ មន្ត្រីជាន់ខ្ពស់នៃក្រុមប្រឹក្សាភិបាលនៃវិទ្យាស្ថានកម្ពុជាសម្រាប់ការសិក្សាយុទ្ធសាស្ត្រ អះអាងថា កិច្ចសហប្រតិបត្តិការ «Lancang-Mekong» បានផ្តល់សារសំខាន់ណាស់សម្រាប់ប្រទេសដែលស្ថិតមហាអនុតំបន់ទន្លេងមេគង្គ ហើយក៏មានប្រទេស កម្ពុជាផងដែរ ។
លោក ឈាង វណ្ណារិទ្ធ អនុប្រធានក្រុមប្រឹក្សាភិបាលនៃវិទ្យាស្ថានកម្ពុជា បានឲ្យដឹងក្រោយវេទិការសាធារណៈស្តីពី កិច្ចសហប្រតិបត្តិការ «Lancang-Mekong » ការកសាងសន្តិភាព និងភាពរុងរឿងសម្រាប់មហាអនុតំបន់ទន្លេមេគង្គនាព្រឹកថ្ងៃទី៤ ខែមករា ឆ្នាំ២០១៨ ថា កិច្ចសហប្រតិបត្តិការនេះបានផ្តល់លទ្ធភាពដល់ប្រទេសដែលជាប់តំបន់ទន្លេងមេគង្គ ។ ជាពិសេសនោះ ការកសាងហេដ្ឋរចនាសម្ព័ន្ធដើម្បីតភ្ជាប់នៃតំបន់មហាអនុតំបន់ទន្លេមេគង្គ ក្នុងការផ្លាស់ប្តូរទំនិញរវាងគ្នា និងគ្នា ។
លោកបញ្ជាក់ថា ៖« បើកម្ពុជាយើងផ្សារភ្ជាប់នៃតំបន់មហាអនុតំបន់មេគង្គនេះ យើងនឹងអាចនាំចេញនូវផលិតផលទៅកាន់បណ្តាប្រទេសនៃមហាអនុតំបន់បានទូលាយ ។ ដូច្នេះវាជាសារសំខាន់មួយដ៏ធំសម្រាប់កម្ពុជា »។
លោក សុក ស៊ីផាន់ណា ទីប្រឹក្សារាជរដ្ឋាភិបាលកម្ពុជា បានលើកឡើងថា អត្ថប្រយោជន៍ស្នូលសម្រាប់កម្ពុជាពីកិច្ចសហប្រតិបត្តិការ «Lancang-Mekong» គឺកៀងគរវិនិយោគទន់ ពីប្រទេសចិន និងប្រទេសជិតខាងឲ្យដាក់ទុនមកប្រទេសកម្ពុជា ព្រោះថាអ្វីដែលកម្ពុជាទទួលបានគឺបង្កើតការងារជូនកូនខ្មែរដែលមានតម្លៃបន្ថែមខ្ពស់ ។
លោកបញ្ជាក់ថា ៖« ពេលនេះយើងស្ថិតក្នុងសមារហកម្មអាស៊ានហើយ បើគេនាំមកកម្ពុជា ហេតុអ្វីបានជាយើង និងឧកញ៉ា មិនមានគំនិតទៅដាក់ទុនវិនិយោគនៅស្រុកឡាវ, ថៃ…។ ឥឡូវហ្នឹង យើងត្រូវមានគំនិតមួយប្រកួតប្រជែង គេមកយើង យើងក៏ត្រូវហ៊ានទៅគេ ប៉ុន្តែយើងត្រូវការមូលដ្ឋានរឹងមាំ វិនិយោគទន់រឹងមាំ និងគោលនយោបាយរឹងមាំ »។
សម្រាប់កិច្ចសហប្រតិបត្តិការដែលចាប់ផ្ដើមអស់រយៈពេលជាង២ឆ្នាំកន្លងមកនេះ ទោះបីមិនទាន់មានសមិទ្ធផលក្តី បើតាមលោក សុក ស៊ីផាន់ណា បានអះអាងថា កម្ពុជាមានយន្តការ សម្រាប់រៀបចំគម្រោងយន្តការហិរញ្ញវត្ថុ និងមានគោលនយោបាយជាក់លាក់សម្រាប់អនុវត្ត រៀបចំគម្រោងសហប្រតិបត្តិការទាំងអស់ ។
លោក សុក ស៊ីផាន់ណា ក៏បានលើកឡើងថា ប្រទេសចិនក៏បានដើរតួសំខាន់ផងដែរក្នុងកិច្ចសហប្រតិបត្តិការ « Langcang- Mekong » ព្រោះថា ចិនក៏មានគំនិតផ្តួចផ្តើមផងដែរ។ ចិន ក៏ដូចជាប្រទេសទាំង៥ មានកិច្ចសហប្រតិបត្តិការក្នុងការអភិវឌ្ឍរបស់ប្រទេសរៀងខ្លួនៗផងដែរ ។
គួរបញ្ជាក់ថា Lancnag -Mekong Cooperation ( LMC) មានប្រទេសជាមាជិកចំនួន៦ គឺប្រទេសកម្ពុជា, ចិន, ភូមា, ឡាវ,ថៃ និងប្រទេសវៀតណាម ។ Lancnag-Mekong Cooperation ( LMC) ក៏បានស្វែករកនៃការពង្រឹងកិច្ចសហប្រតិបត្តិការនៃប្រទេសទាំង៦ មានវិស័យថាមពល, ហេដ្ឋារចនាសម្ព័ន្ធ, លទ្ធភាពផលិតកម្ម, ការគ្រប់គ្រងធនធានវប្បធម៌, ការកសាងសមត្ថភាព, ការកាត់បន្ថយភាពក្រីក្រ, ការផ្លាស់ប្តូរ, ការសិក្សាទីផ្សា និងទីផ្សារហិរញ្ញវត្ថុ ជាដើម ៕
ចែករំលែកព័តមាននេះ