រាជធានីភ្នំពេញ ៖ សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន មានទីតាំងស្ថិតនៅផ្លូវលេខ១០៦ សង្កាត់វត្តភ្នំ ខណ្ឌដូនពេញ រាជធានីភ្នំពេញ ដែលជាគំនិតផ្ដួចផ្ដើមរបស់ប្រមុខរាជរដ្ឋាភិបាលសម្ដេចតេជោ ហ៊ុន សែន ដើម្បីឲ្យធនាគារជាតិនៃកម្ពុជា(NBC)ស្ថាបនាឡើង ពេលនេះបើតាមការលើកឡើងពីមន្ត្រីជាន់ខ្ពស់ធនាគារជាតិនៃកម្ពុជា បានអះអាងថា គ្រោងនឹងបើកសម្ពោធជាផ្លូវការនៅដើមឆ្នាំ២០១៨នេះ ។
ការបង្កើតសារមន្ទីរនេះឡើង ក្នុងគោលបំណងបង្ហាញពីប្រវត្តិនៃការរីកចម្រើននៃប្រព័ន្ធ ធនាគារនិងហិរញ្ញវត្ថុ និងការរួមចំណែកអភិវឌ្ឍន៍សេដ្ឋកិច្ចកម្ពុជាចាប់តាំងពីសម័យហ្វូណន រហូតមកដល់បច្ចុប្បន្ន និងឲ្យយុវជនជំនាន់ក្រោយបានឈ្វេងយល់ពីវដ្ដនៃសេដ្ឋកិច្ច ដើម្បីរួមចំណែកអភិវឌ្ឍន៍សេដ្ឋកិច្ចជាតិ ក៏ដូចជាការទាក់ទាញភ្ញៀវទេសចរផងដែរ ។
លោក ជា ចាន់តូ ទេសាភិបាលធនគារជាតិ នៃកម្ពុជា បានមានប្រសាសន៍ក្នុងឱកាសបើកសន្និបាតបូកសរុបលទ្ធផលការងារប្រចាំឆ្នាំ២០១៧ និងទិសដៅការងារឆ្នាំ២០១៨ កាលពីថ្ងៃទី៤ មករា ម្សិលមិញថា សារមន្ទីរសេដ្ឋកិច្ចនិងរូបិយវត្ថុ របស់ធនាគារជាតិនៃកម្ពុជា នឹងត្រូវសម្ពោធបើកដំណើរការជាផ្លូវការនាដើមឆ្នាំ២០១៨នេះ ។
លោកបញ្ជាក់ថា ៖« សារមន្ទីរនេះត្រូវបានបង្កើតឡើងក្នុងគោលបំណងបង្ហាញពីប្រវត្តិនៃការរីកចម្រើនប្រព័ន្ធធនាគារនិងហិរញ្ញវត្ថុ ព្រមទាំងតួនាទីធនាគារកណ្តាល និងរូបិយវត្ថុ ក្នុងការរួមចំណែកអភិវឌ្ឍន៍សេដ្ឋកិច្ច និងសង្គម នៅកម្ពុជា ចាប់តាំងពីសម័យហ្វូណនរហូតដល់បច្ចុប្បន្ន »។
លោក ជា ចាន់តូ លើកឡើងថា សារមន្ទីរនេះហៅកាត់ថា(ស.ស.រ)ដែលមានឈ្មោះពេញថា សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន ត្រូវបានសាងសង់តាមការណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី៨ ខែតុលា ឆ្នាំ២០០៩ ក្នុងឱកាសប្រារព្ធខួបអនុស្សាវរីយ៍លើកទី៣០នៃការបង្កើតធនាគារជាតិនៃកម្ពុជាឡើងវិញ ។
អគ្គនាយកបច្ចេកទេសនៃធនាគារជាតិនៃ កម្ពុជាលោកជំទាវ ជា សិរី ធ្លាប់មានប្រសាសន៍ថា ៖« សារមន្ទីរនេះមានទីតាំងនៅទល់មុខផ្សារចាស់ ស្ថាបនាឡើងក្នុងគំនិតឲ្យសាធារណជន ពិសេសយុវជនជំនាន់ក្រោយបានយល់ និងបានដឹងពីសារសំខាន់នៃរូបិយវត្ថុ ឱ្យគាត់យល់ពីវដ្តសេដ្ឋកិច្ច ដើម្បីគាត់ងាយចូលរួមចំណែកអភិវឌ្ឍន៍ប្រទេសជាតិ »។
លោកជំទាវបន្តថា ៖« សារមន្ទីរនេះចូលរួមចំណែកជួយពង្រឹងចំណេះដឹងដល់ក្មេងជំនាន់ក្រោយ អ្នកទេសចរ ក៏ដូចជាអ្នកផ្សេងឱ្យយល់កាន់តែច្បាស់ ពីព្រោះអ្នកមកទស្សនាកម្ពុជាយើងភាគច្រើន គាត់មើលឃើញតែប្រាសាទអង្គរវត្ត ប៉ុន្តែគាត់មិនទាន់យល់ពីវិវត្តន៍នៃសេដ្ឋកិច្ច និងការវិវត្តនៃប្រវត្តិសាស្ត្រខ្មែរយើងទេ ។ តួយ៉ាង កន្លងមកមានការពន្យល់ថា រូបនេះសង់នៅសតវត្សរ៍នេះ ដោយស្តេចអង្គនេះ ឬអង្គនោះជាដើម ប៉ុន្តែអ្វីដែលធនាគារជាតិធ្វើ គឺយើងរៀបរាប់ដំណើរដើមទងទាំងអស់ ពីការគ្រប់គ្រងពីសម័យកាលមួយទៅសម័យកាលមួយ នោះវា វិវត្តន៍យ៉ាងដូចម្តេច ហើយយើងនិយាយតាមរយៈទិដ្ឋភាពរូបិយវត្ថុ ទិដ្ឋភាពសេដ្ឋកិច្ច »។
បើតាមលោកជំទាវ សារមន្ទីរនេះមានការចាប់អារម្មណ៍ខ្លាំងយ៉ាងខ្លាំង ពិសេសគឺមានហ្គេមផ្ដល់ចំណេះដឹងសម្រាប់ឱ្យក្មេងលេង បានយល់អំពីរូបិយវត្ថុ ឱ្យក្មេងយល់វដ្ឋសេដ្ឋកិច្ចរបស់កម្ពុជា ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានមានប្រសាសន៍កាលពីម្សិលមិញដែរថា ការបង្កើតសារមន្ទីរនេះ វាបានចែករំលែកចំណេះដឹងទៅដល់សិស្សនិស្សិត ដែលគាត់រៀនសូត្រនៅលើវិស័យហិរញ្ញវត្ថុ និងធនាគារ និងអាចជួយទាក់ទាញភ្ញៀវទេសចរបរទេសចូលមកទស្សនារូបិយវត្ថុរបស់ខ្មែរ និងមានបង្កើតឱ្យមានកន្លែងលក់ជាកាក់បុរាណ ឬក្រដាសប្រាក់ដែលបានបោះពុម្ពនៅទសវត្សរ៍មុនៗ ដែលយើងមិនបានចាយវាយនោះលក់ បានជាចំណូលរួមក្នុងកំណើនសេដ្ឋកិច្ចមួយចំណែកដែរជាជាងយកទៅដុតចោល ។
លោកបណ្ឌិតបន្តថា ៖« ខ្ញុំរំពឹងថា នៅពេលសារមន្ទីរនេះដាក់ឱ្យដំណើរការថ្មីៗ ប្រាកដថានឹងមានអ្នកចូលទស្សនាច្រើន ប៉ុន្តែនៅក្នុងរយៈយូរបន្តិចទៅ នឹងមានការថមថយចំនួនភ្ញៀវចូលទស្សនា ព្រោះសិស្សនិស្សិតខ្មែរមួយចំនួនមិនចង់សិក្សាស្វែងយល់ បានទៅតែម្តងហើយ គាត់លែងចង់ទៅទស្សនាម្តងទៀតហើយ »។
លោកបណ្ឌិតបន្តថា ៖« ការបង្កើតសារមន្ទីរនេះ ខ្ញុំយល់ស្របថាវាមានសារប្រយោជន៍ច្រើនសម្រាប់សង្គមជាតិ តែត្រូវរកវិធីជំរុញឱ្យសិស្សនិស្សិតប្តូរឥរិយាបទ បែរងាកទៅរកការរៀនសូត្រ ធ្វើការសិក្សាស្រាវជ្រាវទៅលើរូបិយវត្ថុរបស់ខ្មែរ ដោយសារមន្ទីរអាចបង្កើតប្រវត្តិសេដ្ឋកិច្ចរបស់កម្ពុជា សរសេរឬផលិត ជាខ្សែភាពយន្តពីប្រវត្តិនៃការចាយវាយរូបិយវត្ថុ។ មានន័យថា នៅក្នុងសារមន្ទីរ មានប្លុកអាចឈរមើលពីការរៀបរាប់ថា សម័យហ្វូណន មានកាក់អ្វីខ្លះ និងមានការជួញដូរជាមួយអ្នកណាខ្លះ តាមរយៈគំនូរជីវចល ។ នេះជាការទាក់ទាញមួយល្អ នឹងអាចរកចំណូលបានពីការចូលទស្សនា »។
បន្ថែមលើសពីនេះ លោកបណ្ឌិតថា គួរមានការរសរសេរអំពីផលិតកម្មកម្ពុជា មានផលិតកម្មអី្វខ្លះរាប់តាំងពីសម័យហ្វូនណន ,ចេនឡា, សម័យមុន ឬក្រោយអង្គរ ថាតើរបត់ផលិតកម្មកម្ពុជា ប្តូរពីផលិតកម្មលក្ខណៈគ្រួសារ ឬប្រភេទសិប្បកម្មរហូតមកដល់បច្ចុប្បន្ន ដើម្បីបង្ហាញពីការលូតលាស់ពីវិស័យឧស្សាហកម្ម និងផលិតកម្ម ។
ជាមួយគ្នានេះ លោកបណ្ឌិតក៏ស្នើឱ្យធនាគារជាតិនៃកម្ពុជា ក៏ដូចជារាជរដ្ឋាភិបាលយកចិត្តទុកដាក់ជំរុញបង្កើតឱ្យមានសារមន្ទីរ ដើម្បីបង្ហាញពីប្រវត្តិសាស្ត្រការធ្វើពាណិជ្ជកម្មនៃសេដ្ឋកិច្ចរបស់កម្ពុជាផងដែរ ៕
ចែករំលែកព័តមាននេះ