រាជធានីភ្នំពេញ ៖ ក្នុងរយៈពេល១១ខែ ឆ្នាំ២០១៧កន្លងទៅនេះ ទុនវិនិយោគវិស័យទេសចរណ៍មានរហូតដល់៣,១ពាន់លានដុល្លារ ដែលត្រូវបានអ្នកជំនាញ និងអ្នកស្រាវជ្រាវសេដ្ឋកិច្ចកម្ពុជាមើលឃើញថា វាកាន់តែបង្ហាញពីភាពរឹងមាំបន្ថែមទៀតសម្រាប់វិស័យទេសចរណ៍កម្ពុជានាពេលបច្ចុប្បន្ន ក៏ដូចជាអនាគត ។…
រាជធានីភ្នំពេញ ៖ ក្នុងរយៈពេល១១ខែ ឆ្នាំ២០១៧កន្លងទៅនេះ ទុនវិនិយោគវិស័យទេសចរណ៍មានរហូតដល់៣,១ពាន់លានដុល្លារ ដែលត្រូវបានអ្នកជំនាញ និងអ្នកស្រាវជ្រាវសេដ្ឋកិច្ចកម្ពុជាមើលឃើញថា វាកាន់តែបង្ហាញពីភាពរឹងមាំបន្ថែមទៀតសម្រាប់វិស័យទេសចរណ៍កម្ពុជានាពេលបច្ចុប្បន្ន ក៏ដូចជាអនាគត ។
អគ្គលេខាធិការនៃសម្ព័ន្ធទេសចរណ៍ជាតិកម្ពុជា បានឱ្យដឹងថា ទុនវិនិយោគក្នុងរយៈពេល១១ខែឆ្នាំកន្លងទៅនេះ ភាគច្រើនវិនិយោគទៅលើអគារសម្រាប់ស្នាក់នៅ សណ្ឋាគារ តំបន់កម្សាន្ត រួមនឹងព្រលានយន្ត ដែលបម្រើដល់វិស័យទេសចរណ៍ ។ ទុនវិនិយោគនេះ វាក៏បង្ហាញពីភាពខ្លាំង ក៏ដូចភាពរីកចម្រើនរបស់វិស័យទេសចរណ៍ បន្ទាប់ពីកម្ពុជាបើកចំហរជើងមេឃកាលពីឆ្នាំ១៩៩៩មក ។
លោក ហូ វណ្ឌី អគ្គលេខាធិការនៃសម្ព័ន្ធ ទេសចរណ៍ជាតិកម្ពុជាមានប្រសាសន៍ថា ៖«ទុនវិនិយោគក្នុងវិស័យទេសចរណ៍ដែលកម្ពុជាទទួលបាន វាបានបង្ហាញពីភាពខ្លាំងមួយទៀត បន្ទាប់ពីវិស័យផ្សេងៗដែលកម្ពុជាមានបច្ចុប្បន្ន។ ទន្ទឹមនឹងនេះ រាជរដ្ឋាភិបាលក្តី ក៏ដូចជាក្រសួងជំនាញក្តីថា វិស័យទេសចរណ៍ជាវិស័យមួយលេចធ្លោជាងវិស័យផ្សេងៗ »។
បើតាមលោក ហូវណ្ឌី ថា ៖« ចាប់តាំងពីឆ្នាំ១៩៩៩មក វិស័យទេសចរណ៍កម្ពុជា មានភាពលេចធ្លោជាបន្តបន្ទាប់ តាមរយៈការពង្រឹងការអភិបាលកិច្ចរបស់ក្រសួង មន្ទីរជំនាញ រួមនឹងវិស័យឯកជន បានចូលរួមយ៉ាងសកម្ម ។ លើសពីនេះ គោលនយោបាយ ជាពិសេសច្បាប់ក្នុងស្រុក មានភាពប្រទាក់ក្រឡាគ្នានៅក្នុងតំបន់ និងច្បាប់អន្តរជាតិដែលកត្តាទាំងនេះ វាជាចំណុចល្អរបស់កម្ពុជា »។
អ្នកស្រាវជ្រាវសេដ្ឋកិច្ចនៅរាជបណ្ឌិត្យសភាកម្ពុជាមើលឃើញថា ភ្ញៀវទេសចរដែលចូលមកទស្សនានៅកម្ពុជាច្រើនជាងគេនាសព្វថ្ងៃនេះ គឺភ្ញៀវទេចរចិន មកទស្សនាផង និងវិនិយោគក្នុងវិស័យនេះផង ជាហេតុធ្វើឱ្យសេដ្ឋកិច្ចកម្ពុជាដើរទៅមុខកាន់តែខ្លាំងបន្ថែមទៀត ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៅរាជបណ្ឌិត្យសភាកម្ពុជាមានប្រសាសន៍ថា ៖« កម្ពុជាទទួលបានភ្ញៀវទេសចរចូលមកទស្សនាច្រើនជាងគេភ្ញៀវទេសចរចិន។ ភ្ញៀវទេសចរចិន គាត់ទស្សនាផងនិងបានទម្លាក់កញ្ចប់លុយវិនិយោគលើវិស័យនេះផង »។
លោកបណ្ឌិតបន្តថា ៖«ភ្ញៀវទេសចរចិន ហូរមកផ្ទាល់នេះ គឺបានជួយឱ្យសេដ្ឋកិច្ចកម្ពុជាដើរបានខ្លាំង បានន័យថា ទេសចរមកតាមយន្តហោះ ហើយស្នាក់នៅយ៉ាងតិចពី៣ទៅ៥ថ្ងៃនេះ បានរួមចំណែកក្នុងកំណើនសេដ្ឋកិច្ចកម្ពុជាបានច្រើន ព្រោះការចំណាយរបស់ភ្ញៀវទេសចរម្នាក់ក្នុងមួយថ្ងៃអស់ប្រាក់ប្រហែល១០០ដុល្លារ »។
លោកបណ្ឌិត គី សេរីវឌ្ឍន៍ បញ្ជាក់ថា ៖« វិស័យទេសចរណ៍ ជាវិស័យសក្តានុពលជាងគេ ដោយសារយើងមានសក្តានុពលទៅផ្នែកវប្បធម៌, ធនធានធម្មជាតិ និងសក្តានុពលនៅតំបន់សមុទ្រ ។ អីចឹងសក្តានុពលទាំងនេះ ជាអំណោយផលធម្មជាតិសុទ្ធសាទ ដោយគ្រាន់តែការគ្រប់គ្រង់របស់កម្ពុជានៅមានកម្រិត ដូច្នេះបើសិនការរៀបចំគោលនយោបាយ និងគ្រប់គ្រងទេសចរណ៍បានប្រសើរ នោះវិស័យទេសចរណ៍នឹងដើរជាតួនាទីស្នូលសម្រាប់សេដ្ឋកិច្ចជាតិ » ។
លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍កាលពីថ្ងៃទី ២៣ វិច្ចិកា កន្លងទៅថា គិតត្រឹមរយៈពេល៩ខែដើមឆ្នាំ២០១៧កន្លងមក កម្ពុជាទទួលបានទេសចរអន្តរជាតិចំនួន៣.៩១២.៧៦១នាក់ ក្នុងកំណើន១១,៥% ដោយបាននាំមកនូវប្រាក់ចំណូលប្រមាណ៣.៤០០លានដុល្លារ បង្កើតឱកាសការងារដោយផ្ទាល់ប្រមាណជាង៦២ម៉ឺននាក់ និងដោយប្រយោលរាប់សិបម៉ឺននាក់បន្ថែមទៀត ដោយក្នុងនោះកម្លាំងជាស្ត្រីមានប្រមាណ៦០% ៕
ចែករំលែកព័តមាននេះ