ខេត្តកណ្ដាល ៖ បុរសជាកម្មករសំណង់ម្នាក់បានស្លាប់ភ្លាមៗនៅនឹងកន្លែង ដោយសាររថយន្តម៉ាកហ៊ីយ៉ាន់ដាយ១គ្រឿងបើកបុក ខណៈពេលដែលគាត់កំពុងជិះម៉ូតូឆ្លងផ្លូវជាតិលេខ៤ កាលវេលាម៉ោង០៧និង១០នាទីព្រឹក ថ្ងៃទី២៨ ខែធ្នូ ឆ្នាំ២០១៧ ត្រង់ចំណុចគីឡូម៉ែត្រលេខ២៥…
ខេត្តកណ្ដាល ៖ បុរសជាកម្មករសំណង់ម្នាក់បានស្លាប់ភ្លាមៗនៅនឹងកន្លែង ដោយសាររថយន្តម៉ាកហ៊ីយ៉ាន់ដាយ១គ្រឿងបើកបុក ខណៈពេលដែលគាត់កំពុងជិះម៉ូតូឆ្លងផ្លូវជាតិលេខ៤ កាលវេលាម៉ោង០៧និង១០នាទីព្រឹក ថ្ងៃទី២៨ ខែធ្នូ ឆ្នាំ២០១៧ ត្រង់ចំណុចគីឡូម៉ែត្រលេខ២៥ លេខ២៦ ស្ថិតនៅក្នុងភូមិត្រពាំងភូមិ ឃុំពើក ស្រុកអង្គស្នួល ខេត្តកណ្ដាល ។ ចំណែករថយន្តបានឈប់នៅនឹងកន្លែង ប៉ុន្តែអ្នកបើកបរបានចុះរត់គេចខ្លួនបាត់ស្រមោល ។ ក្រោយមកនគរបាលបានប្រគល់សាកសពជូនក្រុមគ្រួសារនាំយក ទៅធ្វើបុណ្យតាមប្រពៃណី ។
បុរសរងគ្រោះខាងលើឈ្មោះ ភុន វ័ន អាយុ២៨ឆ្នាំ មុខរបរកម្មករសំណង់ មានទីលំនៅក្នុងភូមិក្រាំង ឃុំព្រៃពួច ស្រុកអង្គស្នួល ខេត្តកណ្ដាល ។ ជិះម៉ូតូ១គ្រឿងម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ ១JF-៦៥២៤ ដោយម៉ូតូរបស់គាត់មានកញ្ចក់ ហើយគាត់ក៏បានពាក់មួកសុវត្ថិភាពត្រឹមត្រូវដែរ ។ ចំណែករថយន្តដែលបានបើកបុកជនរងគ្រោះរហូតដល់ស្លាប់នោះម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣C-៤៤៣២ ហើយអ្នកបើកបរបានរត់គេចខ្លួនបាត់ស្រមោល និងមិនត្រូវបានស្គាល់អត្តសញ្ញាណនោះឡើយ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ ជនរងគ្រោះបានជិះម៉ូងូ១គ្រឿង ធ្វើដំណើរតាមផ្លូវជាតិលេខ៤ ក្នុងទិសដៅពីលិចទៅកើត លុះពេលទៅដល់ត្រង់ចំណុចកើតហេតុខាងលើ បានបត់ឆ្លងផ្លូវហើយស្របពេលនោះដែរ រថយន្តហ៊ីយ៉ាន់ដាយបានបើកបរក្នុងទិសដៅពីកើតទៅលិច (បញ្ច្រាសទិសគ្នា) ទៅដល់ជាន់ហ្វ្រាំងឈប់មិនទាន់ ក៏បានបុកពេញទំហឹង បណ្ដាលឲ្យដួល ហើយត្រូវរថយន្តកិនពីលើថែមទៀតស្លាប់ភ្លាមៗតែម្ដង ។
ក្រោយពេលកើតហេតុ រថយន្តបានឈប់ស្ងៀម ហើយអ្នកបើកបរបានចុះរត់គេចខ្លួនបាត់ស្រមោល មិនត្រូវបានស្គាល់ឈ្មោះនោះឡើយ ចំណែកសាកសពជនរងគ្រោះ និងម៉ូតូស្ថិតនៅក្រោមរថយន្ត លើទ្រូងផ្លូវគួរឲ្យរន្ធត់ ។
ប្រភពដដែលបានបន្តទៀតថា ក្រោយពេលកើតហេតុ កម្លាំងនគរបាលចរាចរណ៍ស្រុកអង្គស្នួល បានចុះទៅធ្វើការវាស់វែងលើកសាកសពចេញពីកន្លែងកើតហេតុ ប្រគល់ជូនក្រុមគ្រួសារនាំយកទៅធ្វើបុណ្យ ព្រមទាំងអូសរថយន្តចេញអែបខាងសម្រួលមិនឲ្យមានការកកស្ទះចរាចរលើកំណាត់ផ្លូវនោះ បន្ទាប់មកនាំយករថយន្ត និងម៉ូតូរងទៅរក្សាទុកនៅអធិការដ្ឋានគរបាលស្រុកអង្គស្នួល រង់ចាំការដោះស្រាយតាមច្បាប់នៅពេលក្រោយ ៕
ចែករំលែកព័តមាននេះ