ខេត្តបាត់ដំបង ៖ បុរសវ័យចំណាស់ម្នាក់ បានចង.កសម្លាប់ខ្លួននៅមុនពេលថ្ងៃរះ ដែលជាថ្ងៃភ្ជាប់ពាក្យកូនស្រី ដោយសារគាត់តូចចិត្តនឹងផ្ទះតូចចង្អៀតមិនស័ក្តិសមនឹងរៀបចំពិធីឲ្យកូន រីឯស្រូវក្នុងស្រែក៏ត្រូវទឹកលិចអស់ទៀត។ នេះជាការរៀបរាប់របស់ក្រុមគ្រួសារប្រាប់ទៅសមត្ថកិច្ចដែលចុះទៅកាន់កន្លែងកើតហេតុ។
ជុំវិញករណីនេះ សមត្ថកិច្ចបានប្រាប់ថា សពបុរសនោះត្រូវក្រុមគ្រួសារប្រទះឃើញ នៅម៉ោង៥ព្រឹក ថ្ងៃទី២៦ ធ្នូ នៅភូមិទួលតាថុន ឃុំជ្រៃ ស្រុកមោងឫស្សី ដែលជនរងគ្រោះឈ្មោះ សុង សល់ អាយុ៥៦ឆ្នាំជាកសិករ រស់នៅភូមិឃុំកើតហេតុខាងលើ។ មន្ត្រីដដែលបានបញ្ជាក់ថា ជនរងគ្រោះបានយកកន្សែងទៅចង.ក លើដើមស្វាយនៅខាងក្រោយផ្ទះប្រហែល១០ម៉ែត្រ ។ ប៉ុន្តែក្រុមគ្រួសារមិនបានដឹងថា គាត់ធ្វើអត្តឃាតបែបនេះតាំងពីពេលណានោះទេ លុះនៅម៉ោង៥ព្រឹក ពេលងើបពីដំណេកទើបមានការភ្ញាក់ផ្អើល ដោយសារឃើញគាត់ចង.កសម្លាប់នៅលើដើមស្វាយ ។
បើតាមការអះអាងរបស់ក្រុមគ្រួសារ ដែលសមត្ថកិច្ចបានស្រង់សំដីបាននិយាយថា ជនរងគ្រោះនឹងត្រូវរៀចចំផ្ទះសម្បែង ដើម្បីរៀបចំពិធីភ្ជាប់ពាក្យកូនស្រីនៅព្រឹកថ្ងៃទី២៦ ធ្នូ តែមុនពេលថ្ងៃរះគាត់បានធ្វើអត្តឃាតបាត់ទៅហើយ ។ ប្រភពពីសាច់ញាតិដដែលបានប្រាប់សមត្ថកិច្ចថា ជនរងគ្រោះហាក់មានអារម្មណ៍មិនល្អមួយរយៈកន្លងទៅនេះ ។ គាត់តែងរអ៊ូរទាំពីរឿងទឹកលិចស្រូវអស់ និងម្យ៉ាងទៀតផ្ទះតូចចង្អៀតពិបាករៀបចំពិធីភ្ជាប់ពាក្យឲ្យកូនស្រី។ ទំនងផលវិបាកទាំងនេះហើយដែលនាំឲ្យគាត់សម្រេចបញ្ចប់បញ្ហាគ្រប់បែបយ៉ាងតាមរយៈការធ្វើអត្តឃាតបែបនេះ។ ប៉ុន្តែទាំងក្រុមគ្រួសារ ទាំងអ្នកភូមិមានការរន្ធត់ចិត្ត និងសោកស្ដាយចំពោះជនរងគ្រោះ ដែលមិនគួរជ្រើសរើសយកផ្លូវទាល់ច្រកបែបនេះមកដោះស្រាយបញ្ហាទេ ។
លោកសោម រ៉ាវុធ មន្ត្រីនគរបាលដែលបានរាយការណ៍អំពីករណីនេះ បាននិយាយថា មូលហេតុខាងលើ គឺជាការបំភ្លឺខ្លះៗពីក្រុមគ្រួសារជនរងគ្រោះ ជុំវិញការធ្វើអត្ដឃាតរបស់ជនរងគ្រោះ។ ប៉ុន្តែបន្ទាប់ពីមានសេចក្ដីរាយការណ៍ មន្ត្រីជំនាញបានចុះទៅពិនិត្យដល់កន្លែងកើតហេតុភ្លាមៗដែរ ។ មន្ត្រីដដែលបានបញ្ជាក់ថា គេមិនទាន់ដឹងថា ក្រោយពីក្រុមគ្រួសារជួបសោកនាដកម្មបែបនេះ តើពិធីភ្ជាប់ពាក្យកូននឹងលើកពេលឬបែបណានោះទេ ព្រោះពេលនេះសាច់ញាតិនិងអ្នកភូមិកំពុងរៀបចំធ្វើបុណ្យសពជនរងគ្រោះនៅក្នុងលំនៅឋានដ៏តូចចង្អៀតនេះ ៕
ចែករំលែកព័តមាននេះ