រាជធានីភ្នំពេញ ៖ សម្តេច ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានចេញសេចក្តីជូនដំណឹងដល់អាជ្ញាធររាជធានី-ខេត្ត ទូទាំងប្រទេសឲ្យធ្វើការស្រង់ឈ្មោះសមាជិក សមាជិកា ក្រុមប្រឹក្សាឃុំ-សង្កាត់ ដែលនៅក្នុងតួនាទីដោយមានការបញ្ជាក់ពីក្រុមប្រឹក្សាស្រុក ខណ្ឌ រាជធានី ខេត្ត និងបញ្ជូនទៅគណៈកម្មាធិការជាតិរៀបចំការបោះឆ្នោតមិនឲ្យហួសថ្ងៃទី២៨ ខែធ្នូ ឆ្នាំ២០១៧នេះទេ។
ក្រសួងមហាផ្ទៃបានបញ្ជាក់ថា ដើម្បីធានាឱ្យដំណើរការរៀបចំ និងការបិទបញ្ជីបោះឆ្នោតដំបូងសម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី ៤ ឆ្នាំ២០១៨នេះ បានត្រឹមត្រូវ និងទាន់ពេលវេលា ក្រសួងស្នើរដ្ឋបាលរាជធានី-ខេត្តគាំទ្រដល់ប្រធានក្រុមប្រឹក្សាឃុំ សង្កាត់ ធ្វើការស្រង់ឈ្មោះឲ្យបានរួសរាន់ ។
សូមបញ្ជាក់ថា ការបោះឆ្នោតព្រឹទ្ធសភា គឺជាការបោះឆ្នោតអសកលដែលតាមច្បាប់បោះឆ្នោតជ្រើសតាំងសមាជិក សមាជិកាព្រឹទ្ធសភា ក្រុមប្រឹក្សាឃុំ/សង្កាត់ គឺជាអង្គបោះឆ្នោតជ្រើសរើសសមាជិក សមាជិកាព្រឹទ្ធសភា និងរាជធានី ខេត្ត ស្រុកខណ្ឌ។ ការបោះឆ្នោតជ្រើសតាំងសមាជិក សមាជិកា ព្រឹទ្ធសភាអាណិតទី៤ គ្រោងនឹងប្រព្រឹត្តទៅនៅថ្ងៃទី២៥ ខែកុម្ភៈឆ្នាំ២០១៨។ ៕
ចែករំលែកព័តមាននេះ