រាជធានីភ្នំពេញ ៖ ក្រោយពីទទួលបានសម្បទានពីរាជរដ្ឋាភិបាលកម្ពុជា ក្នុងការអភិវឌ្ឍតំបន់បឹងកក់ បច្ចុប្បន្ន តំបន់នេះបានកែប្រែមុខមាត់បន្តិចម្ដងៗ ដោយជំហានដំបូង ក្រុមហ៊ុនអភិវឌ្ឍន៍បានសាងសង់ហេដ្ឋារចនាសម្ព័ន្ធផ្លូវកាត់តាមតំបន់នោះ ហើយក៏បាននិងកំពុងសាងសង់លំនៅឋានមួយចំនួននៅជុំវិញផងដែរ ដោយទុកទីតាំងកណ្ដាលឲ្យនៅទំនេរសិន ។
លោក ប៉ូ អ៊ាវគង់ នាយកប្រតិបត្តិក្រុមហ៊ុនវាយតម្លៃអចលនទ្រព្យ Advance ឲ្យដឹងថា តាមរយៈការអភិវឌ្ឍនៅពេលនេះ គេអាចដឹងបានថា នៅពេលអនាគតដ៏ខ្លីខាងមុខ បឹងកក់នឹងក្លាយទៅជាតំបន់ពាណិជ្ជកម្មដ៏មានសក្ដានុពលមួយនៅរាជធានីភ្នំពេញ ។
លោកថា ៖« យើងបានមើលឃើញហើយ អ្នកអភិវឌ្ឍន៍កំពុងអភិវឌ្ឍន៍ជាលំនៅឋាននៅជុំវិញតំបន់បឹងកក់ ដោយទុកទីតាំងកណ្ដាលមិនទាន់អភិវឌ្ឍន៍អ្វីទាំងអស់ ។ ដូចនេះ ខ្ញុំគិតថា អ្នកអភិវឌ្ឍន៍នឹងទុកទីតាំងកណ្ដាលនោះទៅជាកន្លែងពាណិជ្ជកម្មដ៏សំខាន់ » ។
លោកបន្តថា នៅរយៈពេលប្រមាណពី៥ទៅ១០ឆ្នាំទៀត បឹងកក់នឹងក្លាយទៅជាតំបន់មានសក្ដានុពលសម្រាប់ពាណិជ្ជកម្មដ៏សំខាន់ ពីព្រោះបើក្រឡេកមើលតំបន់នោះ វានៅជាប់ព្រំប្រទល់ខណ្ឌទួលគោក និងខណ្ឌដូនពេញ ។ ម្យ៉ាងទៀត ការអភិវឌ្ឍនៅពេលបច្ចុប្បន្នរបស់វិនិយោគិន នឹងទទួលផលនៅពេលខាងមុខដ៏ខ្លី។ ជាក់ស្ដែង លំនៅឋានដែលអភិវឌ្ឍន៍នេះ ក្នុងតំបន់តម្លៃត្រឹមជុំវិញ១០ម៉ឺនដុល្លារអាមេរិក វានឹងឡើងដល់៥០ម៉ឺនដុល្លារអាមេរិក ឬ៦០ម៉ឺនដុល្លារអាមេរិកនៅរយៈពេលចន្លោះពី៥ឆ្នាំ ទៅ១០ឆ្នាំទៀត។
លោកបន្ថែមថា បឹងកក់ជាតំបន់ដែលភ្ជាប់ទៅកាន់មហាវិថីធំៗមួយចំនួននៅក្នុងរាជធានីភ្នំពេញ ។ ជាក់ស្ដែង ផ្លូវមួយដែលទើបអភិវឌ្ឍន៍កាត់តាមតំបន់បឹងកក់ គឺបានកាត់ពីមហាវិថីសហព័ន្ធរុស្ស៊ី ទៅកាន់ផ្លូវទំនប់ទួលគោក ហើយមានផ្លូវខ្វាត់ខ្វែងជាច្រើនទៀត ដែលអ្នកអភិវឌ្ឍន៍កំពុងគិតគូរកសាងឡើង ។
លោក ឌឹត ចណ្ណា អ្នកគ្រប់គ្រងក្រុមហ៊ុនអចលនទ្រព្យឡាក់គី ឲ្យដឹងថា ជាការពិតណាស់ បើតាមអ្វីដែលលោកទទួលបាននាពេលនេះ បឹងកក់មានគម្រោងអភិវឌ្ឍន៍ជាច្រើន ហើយគម្រោងទាំងនោះមាន ធនាគារធំៗ និងអគារការិយាល័យមួយចំនួនផងដែរ ។ ដូចនេះ នៅពេលខាងមុខ បឹងកក់នឹងអភិវឌ្ឍន៍ខ្លាំង ហើយវានឹងជួយឱ្យតំបន់ជិតខាងមានតម្លៃខ្ពស់ទៅតាមនោះដែរ ។
លោកបន្តថា ការអភិវឌ្ឍតំបន់បឹងកក់លឿនឬយឺត គឺអាស្រ័យលើម្ចាស់គម្រោងនោះទាក់ទាញបណ្ដាវិនិយោគិនបានកម្រិតណា ហើយវិនិយោគិននឹងចាប់ផ្ដើមអភិវឌ្ឍន៍គម្រោងរបស់ខ្លួននៅពេលណា ។ ប៉ុន្តែបើតាមលោក ចណ្ណា ថា មិនយូរទេ បឹងកក់នឹងទាក់ទាញបណ្ដាវិនិយោគិននានាបន្ថែម ព្រោះតំបន់នេះមានផ្លូវខ្វាត់ខ្វែងល្អ និងផ្លូវធំៗ ហើយផ្លូវទាំងនោះក៏បានភ្ជាប់ទៅតំបន់ផ្សេងទៀតនៅជុំវិញរួចជាស្រេចដែរ ។
លោកថា ៖« បើយើងប្រៀបធៀបទៅនឹងតំបន់ផ្សេងទៀតក្នុងរាជធានីភ្នំពេញ បឹងកក់ជាតំបន់ទាក់ទាញមួយ ហើយធៀបនឹងកោះពេជ្រ វាម្យ៉ាងម្នាក់ទេ ។ កោះពេជ្រ ជាតំបន់ស៊ីវិល័យ និងជាតំបន់សម្រាប់អ្នកមានរស់នៅ ហើយបឹងកក់វិញជាតំបន់លំនៅឋានចម្រុះ ទាំងអ្នកមាន និងអ្នកមធ្យម » ។
គួរបញ្ជាក់ថា គម្រោងធំមួយនៅក្នុងតំបន់បឹងកក់ នឹងលេចរូបរាងនៅពេលឆាប់ៗនេះ ហើយវានឹងលើកកម្ពស់រាជធានីភ្នំពេញឲ្យកាន់តែមានមុខមាត់មួយកម្រិតទៀត ។
ម្យ៉ាងទៀត តាមការសង្កេតជាក់ស្ដែង នៅជុំវិញតំបន់បឹងកក់ ក៏មានការអភិវឌ្ឍគម្រោងជាច្រើនទៀតដែរ ដូចជា ផ្សារទំនើបផាកសុន ដែលចាត់ទុកជាផ្សារទំនើបធំជាងគេនៅកម្ពុជា, គម្រោងខុនដូជាច្រើនកំពុងអភិវឌ្ឍន៍នៅតំបន់ទួលគោក និងដូនពេញផងដែរ ។ ដូចនេះ យ៉ាងយូរ១០ឆ្នាំទៀត រាជធានីភ្នំពេញនឹងកាន់តែទាក់ទាញវិនិយោគិននិងទេសចរ ព្រមទាំងជំរុញឲ្យវិស័យអចលនទ្រព្យកាន់តែរីកចម្រើន ៕
ចែករំលែកព័តមាននេះ